UN ៖ អគ្គលេខាធិការអង្គការសហប្រជាជាតិ លោក Antonio Guterres នៅថ្ងៃចន្ទនេះ បានផ្តួចផ្តើមគំនិតមួយសម្រាប់បទឈប់បាញ់មនុស្សធម៌នៅអ៊ុយក្រែន។
លោក Guterres បានស្នើឱ្យ Martin Griffiths ដែលជាអ្នកសម្របសម្រួលការងារមនុស្សធម៌ទូទាំងពិភពលោក ឱ្យស្វែងយល់ជាបន្ទាន់ជាមួយភាគីពាក់ព័ន្ធអំពីកិច្ចព្រមព្រៀង និងការរៀបចំសម្រាប់បទឈប់បាញ់មនុស្សធម៌នៅអ៊ុយក្រែន។
លោកបញ្ជាក់ថា ជម្លោះរវាងអ៊ុយក្រែន និងរុស្ស៊ីបាននាំឱ្យបាត់បង់ជីវិតរាប់ពាន់នាក់ ការផ្លាស់ទីលំនៅរបស់មនុស្ស ១០ លាននាក់ ការបំផ្លិចបំផ្លាញជាប្រព័ន្ធនៃហេដ្ឋារចនាសម្ព័ន្ធសំខាន់ៗ និងការឡើងថ្លៃអាហារ និងថាមពលនៅទូទាំងពិភពលោកត្រូវតែបញ្ឈប់។
លោក Guterres បានអំពាវនាវឱ្យមានបទឈប់បាញ់មនុស្សធម៌ជាបន្ទាន់ ដើម្បីអនុញ្ញាតឱ្យមានវឌ្ឍនភាពក្នុងការចរចានយោបាយដ៏ធ្ងន់ធ្ងរ សំដៅឈានដល់កិច្ចព្រមព្រៀងសន្តិភាព ដោយផ្អែកលើគោលការណ៍ និង ធម្មនុញ្ញរបស់ប្រជាជាតិ ការបញ្ឈប់អរិភាពនឹងអនុញ្ញាតឱ្យផ្តល់ជំនួយមនុស្សធម៌សំខាន់ៗ និងអាចឱ្យជនស៊ីវិលផ្លាស់ទីជុំវិញដោយសុវត្ថិភាព។
លោក Guterres បានធ្វើការអំពាវនាវយ៉ាងខ្លាំងក្លាទៅកាន់ភាគីជម្លោះ និងសហគមន៍អន្តរជាតិទាំងមូល ដើម្បីធ្វើការជាមួយអង្គការសហប្រជាជាតិ ដើម្បីសន្តិភាពនៅអ៊ុយក្រែន។ លោកបាននិយាយថា ទីភ្នាក់ងារមនុស្សធម៌ និងដៃគូរបស់អង្គការសហប្រជាជាតិបានឈានដល់មនុស្សជិត ៩០០,០០០ នាក់ ភាគច្រើននៅភាគខាងកើតអ៊ុយក្រែនជាមួយនឹងអាហារ ទីជម្រក ភួយ ថ្នាំពេទ្យ ទឹកដប និងការផ្គត់ផ្គង់អនាម័យនៅក្នុងខែមុន៕
