ជនជាតិវៀតណាមពីរនាក់ត្រូវបានចាប់ខ្លួនពីបទជួញដូរគ្រឿងញៀនឆ្លងដែន

ហូជីមិញ៖ ឈ្មួញជនជាតិវៀតណាមពីរនាក់ដែលដឹកជញ្ជូនហេរ៉ូអ៊ីនពីឡាវទៅវៀតណាម ត្រូវបានចាប់ខ្លួនកាលពីថ្ងៃព្រហស្បតិ៍មុនពេលពួកគេអាចដឹកជញ្ជូនវាទៅប្រទេសចិន។

មន្រ្តីវៀតណាម បានឲ្យដឹងថាជនជាប់ទោសចំនួនពីររូបគឺ Giang A Lanh អាយុ ៣៤ ឆ្នាំ និង Ly Thi Mai អាយុ ៣២ ឆ្នាំ នៅខេត្ត Dien Bien ភាគខាងជើងប្រទេសវៀតណាម កំពុងប្រឈមមុខនឹងការចោទប្រកាន់ពីបទ "ដឹកជញ្ជូនសារធាតុញៀនដោយខុសច្បាប់"។ មន្រ្តីបន្តថា ពួកគេត្រូវបានឃាត់ខ្លួនខណៈកំពុងធ្វើដំណើរដើម្បីដឹកជញ្ជូនហេរ៉ូអ៊ីនប្រហែល ១១ គីឡូក្រាមពីទីក្រុង Dien Bien ទៅខេត្ត Lao Cai ដែលជាប់ព្រំដែនប្រទេសចិន។

យ៉ាងណាមិញ អ្នកទាំងពីរបានប្រាប់ប៉ូលីសថា ពួកគេត្រូវបានជួលដោយជនជាតិចិនម្នាក់ ដែលមិនស្គាល់អត្តសញ្ញាណ ដើម្បីធ្វើដំណើរទៅប្រទេសឡាវ និងនាំយកថ្នាំញៀនទៅកាន់ Lao Cai ។ ពួកគេត្រូវបានបង់ចំនួន 320 លានដុង (១៤,០០០ ដុល្លារ) ។

ក្រោយត្រឡប់ទៅក្រុង Dien Bien វិញ ពួកគេបានលាក់ថ្នាំញៀននៅលើភ្នំ មុននឹងត្រូវបានបញ្ជាឱ្យបញ្ជូនទៅប្រទេសចិន។ កាលពីថ្ងៃពុធ លោក Mai បានដាក់ថ្នាំនេះដាក់ក្នុងកាបូបសម្លៀកបំពាក់ ហើយធ្វើដំណើរទៅ Lao Cai តាមរថយន្តក្រុងដឹកអ្នកដំណើរពី Dien Bien។

គួរបញ្ចាក់ថា ក្នុងប៉ុន្មានឆ្នាំថ្មីៗនេះ វៀតណាមបានក្លាយជាមជ្ឈមណ្ឌលជួញដូរគ្រឿងញៀនដ៏ធំនៅជុំវិញត្រីកោណមាស ដែលជាចំណុចប្រសព្វនៃប្រទេសចិន ឡាវ ថៃ និងមីយ៉ាន់ម៉ា និងជាតំបន់ផលិតគ្រឿងញៀនធំជាងគេទីពីររបស់ពិភពលោកបន្ទាប់ពីតំបន់អឌ្ឍចន្ទមាសនៅអាស៊ីខាងត្បូង។

ទោះជាយ៉ាងណាច្បាប់គ្រឿងញៀនដ៏តឹងតែងបំផុតមួយចំនួនរបស់វៀតណាម បានចែងថាអ្នកដែលត្រូវបានផ្តន្ទាទោសពីបទកាន់កាប់ ឬរត់ពន្ធហេរ៉ូអ៊ីនលើសពី ៦០០ ក្រាម ឬមេតំហ្វេតាមីនលើសពី ២,៥ គីឡូក្រាម ប្រឈមមុខនឹងការកាត់ទោសប្រហារជីវិត៕