រុស្ស៊ី៖ វិមានក្រឹមឡាំង បាននិយាយកាលពីថ្ងៃទី១៦ ថា រុស្ស៊ីកំពុងពិភាក្សាជាមួយអ៊ុយក្រែនអំពីស្ថានភាពអព្យាក្រឹតភាពនាពេលអនាគតរបស់អ៊ុយក្រែន ហើយគំរូអព្យាក្រឹតនៃការរក្សាយោធាដូច អូទ្រីស ឬស៊ុយអែត គឺជាជម្រើសមួយក្នុងការសម្របសម្រួល។
RIA Novosti បានដកស្រង់សម្តីលេខាធិការសារព័ត៌មានរបស់ប្រធានាធិបតីរុស្ស៊ី លោក Dmitry Peskov ដែលបាននិយាយថា គំរូដូចជា "អូទ្រីស ឬស៊ុយអែត" អាចត្រូវបានគេមើលឃើញថាជាការសម្របសម្រួលមួយ។
អូទ្រីស និងស៊ុយអែត គឺជាសមាជិកទាំងពីរនៃសហភាពអឺរ៉ុប ប៉ុន្តែទាំងពីរមិនមែនជាសមាជិកនៃអង្គការសន្ធិសញ្ញាអាត្លង់ទិកខាងជើង និងបន្តគោលនយោបាយអព្យាក្រឹតភាព។ ស្ថានភាពអព្យាក្រឹតអចិន្ត្រៃយ៍របស់អូទ្រីសត្រូវបានសរសេរនៅក្នុងរដ្ឋធម្មនុញ្ញរបស់ខ្លួន វាមិនចូលបក្សសម្ព័ន្ធក្នុងលក្ខណៈយោធា និងមិនអនុញ្ញាតឱ្យកងទ័ពបរទេសបង្កើតមូលដ្ឋានយោធានៅលើទឹកដីរបស់ខ្លួន។
អ្នកចរចាអ៊ុយក្រែន និងជាទីប្រឹក្សាការិយាល័យប្រធានាធិបតីអ៊ុយក្រែន លោក Mikhailo Podoljak បានឆ្លើយតបយ៉ាងត្រជាក់ចំពោះសេចក្តីថ្លែងការណ៍ចុងក្រោយរបស់វិមានក្រឹមឡាំងកាលពីល្ងាចថ្ងៃទី ១៦ ថា “អ៊ុយក្រែន និងរុស្ស៊ីស្ថិតក្នុងស្ថានភាពនៃសង្រ្គាមផ្ទាល់ ដូច្នេះហើយ ម៉ូដែលណាមួយអាចគ្រាន់តែជា គំរូអ៊ុយក្រែន ហើយផ្អែកលើមូលដ្ឋាននៃការធានាសុវត្ថិភាពដែលបានផ្ទៀងផ្ទាត់ស្របច្បាប់ប៉ុណ្ណោះ»។
នៅក្នុងបទសម្ភាសន៍ជាមួយទូរទស្សន៍រដ្ឋរុស្ស៊ី Mekinsky បាននិយាយថា អ៊ុយក្រែនបានស្នើឱ្យក្លាយជាប្រទេសគ្មានយោធាដូចអូទ្រីស ឬស៊ុយអែត ប៉ុន្តែជាមួយកងទ័ព និងកងទ័ពជើងទឹករបស់ខ្លួន។
រដ្ឋមន្ត្រីការបរទេសរុស្ស៊ីលោក Sergei Lavrov បាននិយាយថា អព្យាក្រឹតភាព គឺជាបញ្ហាស្នូលនៃជុំចរចានេះ។ លោក Lavrov បានប្រាប់ប្រព័ន្ធផ្សព្វផ្សាយរុស្ស៊ីកាលពីថ្ងៃទី ១៦ ថា ភាគីទាំងពីរកំពុងពិភាក្សាយ៉ាងយកចិត្តទុកដាក់លើបញ្ហាដូចជាស្ថានភាពអព្យាក្រឹត និងការធានាសន្តិសុខសម្រាប់ហេតុផលជាក់ស្តែង ហើយការចរចា គឺពិតជាមិនងាយស្រួលទេ ប៉ុន្តែក៏មានក្តីសង្ឃឹមក្នុងការឈានដល់ការសម្របសម្រួលផងដែរ៕
