អាល្លឺម៉ង់៖ ប្រភពពីសភាអាឡឺម៉ង់ បានបង្ហាញកាលពីថ្ងៃទី ១៤ ខែមីនាថា អាល្លឺម៉ង់មានបំណងទិញយន្តហោះចម្បាំងបំបាំងកាយ F-35 ចំនួន ៣៥ គ្រឿង ដែលផលិតដោយក្រុមហ៊ុនអាម៉េរិក Lockheed Martin ដើម្បីជំនួសម៉ូដែលចាស់ៗ។ នេះបើតាមទីភ្នាក់ងារព័ត៌មានចិនស៊ិនហួរ។
ប្រភពបានបញ្ជាក់ថា យន្តហោះចម្បាំង F-35s ដែលទើបទិញថ្មីនឹងជំនួសយន្តហោះ "Tornados" របស់អាល្លឺម៉ង់។ យោងតាម Deutsche Presse-Agentur យន្តហោះ "Tornados" គ្រោងនឹងចូលនិវត្តន៍នៅឆ្នាំ ២០២៥ ។
បន្ទាប់ពីរុស្ស៊ីចាប់ផ្តើមប្រតិបត្តិការយោធាពិសេសនៅថ្ងៃទី ២៤ ខែកុម្ភៈ លោក Scholz បានប្រកាសពីការកើនឡើងយ៉ាងខ្លាំងនៃការចំណាយលើវិស័យការពារជាតិនៅចុងខែនេះ រួមទាំងការយល់ព្រមលើមូលនិធិពិសេសចំនួន ១០០ ពាន់លានអឺរ៉ូ និងការបង្កើនសមាមាត្រនៃការចំណាយលើវិស័យការពារជាតិរបស់ប្រទេសអាឡឺម៉ង់ទៅនឹង GDP បន្ថែមទៀត ដែលមានជាង ២% ក្នុងមួយឆ្នាំនាពេលអនាគត។
យោងតាមការវិភាគប្រព័ន្ធផ្សព្វផ្សាយមួយចំនួន នេះជាលើកទីមួយហើយ ដែលអាល្លឺម៉ង់បានបង្កើនថវិកាការពារជាតិរបស់ខ្លួនយ៉ាងច្រើន ចាប់តាំងពីការបង្រួបបង្រួមប្រទេសទាំងពីរក្នុងឆ្នាំ ១៩៩០ ដែលជាការកត់សម្គាល់ការផ្លាស់ប្តូរដ៏សំខាន់នៅក្នុងគោលនយោបាយការពារជាតិរបស់អាល្លឺម៉ង់៕
