ការ​នាំ​ចេញ​វៀត​ណាម​ទៅ​រុស្ស៊ី​បានរាំងស្ទះ​ដោយ​ទណ្ឌកម្ម​អាម៉េរិក និងអឺរ៉ុប

វៀតណាម៖ ការចេញទំនិញនានារបស់ប្រទេសវៀតណាមទៅកាន់ទីផ្សារនៃប្រទេសរុស្ស៊ី កំពុងជួបបញ្ហាកកស្ទះ ដោយសារទណ្ឌកម្មដែលដាក់ដោយសហរដ្ឋអាម៉េរិក និង លោកខាងលិចលើរុស្ស៊ី។ក្រុមហ៊ុនមួយចំនួនរបស់វៀតណាមដែលធ្លាប់នាំចេញផ្លែឈើ និង បន្លែទៅកាន់ប្រទេសរុស្ស៊ីជួបបញ្ហាដោយសារការផ្អាកការបញ្ជាទិញ និង បញ្ហាការដឹកជញ្ជូន។

ម្ចាស់ក្រុមហ៊ុនមួយចំនួន បានអះអាងថា ក្រុមហ៊ុនដឹកជញ្ជូនអន្តរជាតិទាំងអស់មិនអាចទទួលបានទំនិញទេ ខណៈដែលជើង​ហោះ​ហើរទៅកាន់ប្រទេសរុស្ស៊ីមានកម្រិត។ ការបញ្ជាទិញត្រូវបានពន្យារពេល ហើយការទូទាត់មិនអាចទៅរួចនោះទេ។វិបត្តិនេះកំពុងមានផលប៉ះពាល់យ៉ាងទូលំទូលាយ និងអវិជ្ជមាន ទាំងក្នុងរយៈពេលខ្លី និងវែងសម្រាប់សេដ្ឋកិច្ច ពាណិជ្ជកម្ម ហិរញ្ញវត្ថុ និងខ្សែសង្វាក់ផ្គត់ផ្គង់សកល"។

ទំនិញដែលត្រូវរងផលប៉ះពាល់ គឺការផ្គត់ផ្គង់ប្រេងឥន្ធនៈ និង វត្ថុធាតុដើម ថ្លៃប្រេង និងឧស្ម័ន ម្សៅ អាលុយមីញ៉ូម នីកែល និងពោត ដែលជាផលិតផលសំខាន់ៗរបស់រុស្ស៊ី និង អ៊ុយក្រែន។ការទូទាត់កិច្ចសន្យាពាណិជ្ជកម្មជាមួយរុស្ស៊ីក៏នឹងមានការពិបាកផងដែរ ដោយសារតែការដាក់ទណ្ឌកម្មរបស់លោកខាងលិច។ ក្រុមហ៊ុននាំចេញរបស់រុស្ស៊ីជាច្រើនបានស្នើឱ្យផ្អាកការទូទាត់ប្រហែល២ ទៅ៣សប្តាហ៍ ដើម្បីមើលថាតើស្ថានភាពនឹងវិវឌ្ឍ។

ក្រុមហ៊ុនដឹកជញ្ជូនមួយចំនួន បានបដិសេធមិនបញ្ជូនទំនិញពីវៀតណាមទៅរុស្ស៊ី ខណៈដែលថ្លៃដឹកជញ្ជូនកើនឡើងជាមួយនឹងការពន្យារពេលក្នុងការដឹកជញ្ជូនបន្ថែមទៀត។ការដឹកជញ្ជូនតាមផ្លូវអាកាសក៏បានបង្ខំឱ្យក្រុមហ៊ុនអាកាសចរណ៍ជ្រើសរើសផ្លូវហោះហើរជំនួស ការបង្កើនថ្លៃដើម និងបន្ទុកលើប្រព័ន្ធដឹកជញ្ជូនសកល ក៏ដូចជាតម្លៃផលិតផលផងដែរ។

យោងតាមទិន្នន័យគយវៀតណាម បានឱ្យដឹងថា ការនាំចេញរបស់វៀតណាមទៅកាន់ប្រទេសរុស្ស៊ីបានកើនឡើងដល់ប្រហែល ៣,២ ពាន់លានដុល្លារនៅក្នុងតម្លៃពាណិជ្ជកម្ម និងការនាំចូលប្រហែល ២,៣ ពាន់លានដុល្លារក្នុងឆ្នាំ ២០២១។ការនាំចេញសំខាន់ៗទៅកាន់ប្រទេសរុស្ស៊ីរួមមានកុំព្យូទ័រ គ្រឿងបន្លាស់ ទូរស័ព្ទ វាយនភ័ណ្ឌ កាហ្វេ និងផលិតផលអគ្គិសនី។

ចំណែក​ទំហំ​ពាណិជ្ជកម្ម​អ៊ុយក្រែនជាមួយ​វៀតណាម​មាន​ក្រោម ១ ពាន់​លាន​ដុល្លារ។នៅឆ្នាំ ២០២១ ទំហំពាណិជ្ជកម្មរវាងប្រទេសទាំងពីរបានឈានដល់ ៧២០.៥លានដុល្លារ កើនឡើង ៥១ ភាគរយពីឆ្នាំ ២០២០។ ការនាំចេញចម្បងទៅកាន់អ៊ុយក្រែនគឺកុំព្យូទ័រ និងស្បែកជើង ក្នុងចំណោមផលិតផលផ្សេងទៀត៕