រុស្ស៊ី៖ ក្រសួងការបរទេសរុស្ស៊ីកាលពីថ្ងៃអង្គារ បានរិះគន់ការបណ្តេញអ្នកការទូតចំនួន ១២ នាក់ដោយសហរដ្ឋអាមេរិក ពីបេសកកម្មអចិន្ត្រៃយ៍ប្រចាំអង្គការសហប្រជាជាតិ។
អ្នកនាំពាក្យក្រសួងការបរទេសលោកស្រី Maria Zakharova បាននិយាយថា ចំណាត់ការរបស់ទីក្រុងវ៉ាស៊ីនតោន គឺជាអ្វីដែលលោកស្រីហៅថា "ការកើនឡើងដោយចេតនា និងគួរឱ្យអស់សំណើច" នៃភាពតានតឹងដែលកំពុងកើតមាននៅក្នុងប្រទេសរុស្ស៊ី និងសហរដ្ឋអាមេរិក។
លោកស្រី បានបន្ថែមថា វាបានរំលោភលើការប្តេជ្ញាចិត្តរបស់សហរដ្ឋអាមេរិកចំពោះសន្ធិសញ្ញាអន្តរជាតិស្តីពីការធ្វើជាម្ចាស់ផ្ទះរបស់អង្គការសហប្រជាជាតិនៅលើដីរបស់ខ្លួន។ ទីក្រុងមូស្គូបានព្រមានថាសហរដ្ឋអាមេរិក កំពុងធ្វើឱ្យខូចតួនាទីរបស់អង្គការសហប្រជាជាតិ ដោយការប៉ុនប៉ងដាក់អ្វីដែលគេហៅថា "សណ្តាប់ធ្នាប់ពិភពលោកផ្អែកលើច្បាប់" ស្របតាមតម្រូវការនយោបាយរបស់សហរដ្ឋអាមេរិក និងសម្ព័ន្ធមិត្តរបស់ខ្លួន។
សហរដ្ឋអាមេរិកកាលពីថ្ងៃចន្ទបានប្រកាសបណ្តេញបុគ្គលិកចំនួន ១២ នាក់នៃបេសកកម្មអចិន្ត្រៃយ៍របស់រុស្ស៊ីប្រចាំអង្គការសហប្រជាជាតិ។
នៅក្នុងសេចក្តីថ្លែងការណ៍មួយ បេសកកម្មអចិន្ត្រៃយ៍របស់សហរដ្ឋអាមេរិកប្រចាំអង្គការសហប្រជាជាតិបានពណ៌នាអ្នកការទូតរុស្ស៊ីទាំង ១២ នាក់ថា ជា "ប្រតិបត្តិការស៊ើបការណ៍សម្ងាត់" ដែលបានរំលោភលើឯកសិទ្ធិរបស់ពួកគេក្នុងការស្នាក់នៅក្នុងសហរដ្ឋអាមេរិក "ដោយពួកគេបានចូលរួមក្នុងសកម្មភាពចារកម្ម" ។
តំណាងអចិន្ត្រៃយ៍របស់រុស្ស៊ីប្រចាំអង្គការសហប្រជាជាតិ លោក Vasily Nebenzia កាលពីថ្ងៃចន្ទ បានសោកស្តាយចំពោះការសម្រេចចិត្តរបស់សហរដ្ឋអាមេរិកផងដែរ៕
