អាមេរិក៖ មន្ទីរបញ្ចកោណបានចេញផ្សាយវីដេអូឃ្លាំមើលដែលបង្ហាញពីការវាយប្រហារតាមអាកាសរបស់សហរដ្ឋអាមេរិក ដែលបានសម្លាប់ជនស៊ីវិល 10 នាក់នៅក្នុងរដ្ឋធានីអាហ្វហ្គានីស្ថានកាលពីឆ្នាំមុន ដែលជាបេសកកម្មប្រយុទ្ធចុងក្រោយរបស់អាមេរិកមួយនៅក្នុងប្រទេសអាហ្វហ្គានីស្ថាន ក្រោយទីក្រុងវ៉ាស៊ីនតោនបានបញ្ចប់សង្រ្គាមរយៈពេលពីរទសវត្សរ៍របស់ខ្លួន។
វីដេអូដែលមានរយៈពេល 25 នាទី ចេញផ្សាយដោយកាសែត New York Times កាលពីថ្ងៃពុធ បានបង្ហាញពីពេលដែលបុគ្គលិកជំនួយអាហ្វហ្គានីស្ថាន និងអ្នកមិនប្រយុទ្ធ ៩ នាក់ផ្សេងទៀតរួមទាំងកុមារ ៧ នាក់ត្រូវបានសម្លាប់នៅក្នុងការវាយប្រហារនេះ ដែលទាំងអស់ត្រូវបានថតដោយដ្រូនកំពុងហោះហើរលើទីក្រុងកាប៊ុលកាលពីថ្ងៃទី 29 ខែសីហាឆ្នាំ 2021។
យោធាអាមេរិក បានអះអាងពីដំបូងថា ការវាយប្រហារនេះសំដៅទៅលើសមាជិកនៃរដ្ឋអ៊ីស្លាម ISIS ដែលកំពុងដឹកជញ្ជូនគ្រឿងផ្ទុះ។ មន្ត្រីជាន់ខ្ពស់ម្នាក់បានចាត់ទុកថា ប្រតិបត្តិការនេះគឺ "សុចរិត" ដូច្នេះទើបបើកការវាយប្រហារ តែក្រោយមកទើបដឹងថាមានតែជនស៊ីវិលប៉ុណ្ណោះ ដែលត្រូវបានសម្លាប់នៅក្នុងការវាយប្រហារនេះ។
ដ្រូន MQ-9 Reaper ពីរគ្រឿង បានតាមពីក្រោយរថយន្ត Toyota Corolla ពណ៌ស ដែលបើកបរដោយបុរសម្នាក់ ក្រោយមកត្រូវបានគេស្គាល់មានឈ្មោះថា Zemari Ahmadi ជាបុគ្គលិកជំនួយរបស់អង្គការផ្នែកអាហារូបត្ថម្ភ និងការអប់រំអន្តរជាតិដែលមានមូលដ្ឋាននៅសហរដ្ឋអាមេរិក។
មួយសន្ទុះក្រោយមក រថយន្តរបស់ Ahmadi ត្រូវបានបើកបុកចូលទៅផ្ទះរបស់គាត់ ស្រាប់តែមានការបំផ្ទុះមួយ បានលេបត្របាក់ទ្រព្យសម្បត្តិ ភ្លាមៗនោះបានសម្លាប់ Ahmadi និងជនស៊ីវិល១០ នាក់ ក្នុងនោះក៏មានកុមារផងដែរ។
ការស៊ើបអង្កេតរបស់កងទ័ពអាកាសបានសន្និដ្ឋានថា ប្រតិបត្តិការនេះមិនបំពានច្បាប់ណាមួយឡើយ និងបានផ្តល់អនុសាសន៍ថា មិនមានវិធានការណ៍វិន័យទេ។ ទោះជាយ៉ាងណា យោធាអាមេរិក ក៏មានការសោកស្ដាយចំពោះឧបត្ថវហេតុនេះផងដែរ៕
