អាមេរិក៖ នាវាមុជទឹករបស់កងទ័ពជើងទឹកអាមេរិកមួយគ្រឿង ដែលផ្ទុកក្បាលគ្រាប់នុយក្លេអ៊ែររាប់សិបគ្រាប់ បានធ្វើដំណើរចូលទៅក្នុងមូលដ្ឋានប៉ាស៊ីហ្វិក សម្រាប់ដំណើរទស្សនកិច្ចដ៏កម្រមួយកាលពីថ្ងៃសៅរ៍ ដោយកងទ័ពជើងទឹកបានហៅវាថាជា «សារទៅកាន់សម្ព័ន្ធមិត្តនៅក្នុងតំបន់»។
មូលដ្ឋានទ័ពជើងទឹកនៅលើកោះ Guam គឺជាការដំឡើងយោធារបស់សហរដ្ឋអាមេរិក ដែលមានមូលដ្ឋាននៅជិតប្រទេសចិនបំផុត។ នាវា USS Nevada ដែលជានាវាមុជទឹកដើរដោយថាមពលនុយក្លេអែរ ដែលត្រូវបានដាក់ឱ្យដំណើរការក្នុងឆ្នាំ ១៩៨៦ ផ្ទុករហូតដល់ 20 Trident II D-5 និង ក្បាលគ្រាប់នុយក្លេអ៊ែររាប់សិប។
CNN បានរាយការណ៍ថា នាវាមុជទឹកបានធ្វើទស្សនកិច្ចនៅមូលដ្ឋានទ័ពជើងទឹកអាមេរិកនៅកោះ Guam កាលពីថ្ងៃទី ១៥ ខែមករា នៅក្នុងអ្វីដែលជាដំណើរទស្សនកិច្ចលើកដំបូងរបស់នាវាមុជទឹកបែបនេះចាប់តាំងពីឆ្នាំ ២០១៦មក។
នៅក្នុងសេចក្តីថ្លែងការណ៍មួយ កងទ័ពជើងទឹកអាមេរិកបាននិយាយថា «ដំណើរទស្សនកិច្ចនេះ ពង្រឹងកិច្ចសហប្រតិបត្តិការរវាងសហរដ្ឋអាមេរិក និងសម្ព័ន្ធមិត្តនៅក្នុងតំបន់ និងបង្ហាញពីសមត្ថភាព ភាពបត់បែន ការត្រៀមខ្លួន និងការបន្តការប្តេជ្ញាចិត្តចំពោះសន្តិសុខ និងស្ថិរភាពក្នុងតំបន់ឥណ្ឌូប៉ាស៊ីហ្វិករបស់សហរដ្ឋអាមេរិក»។
ដំណើរទស្សនកិច្ចនេះ បានធ្វើឡើងខណៈដែលក្រុងវ៉ាស៊ីនតោននិងក្រុងប៉េកាំង កំពុងមានបញ្ហាកាន់តែខ្លាំងឡើងជុំវិញបញ្ហាកោះតៃវ៉ាន់ ដោយសហរដ្ឋអាមេរិកគាំទ្រដល់រដ្ឋបាលកោះតៃវ៉ាន់ក្នុងការគ្រប់គ្រងដោយខ្លួនបឯង។ នៅក្នុងខែធ្នូ សហរដ្ឋអាមេរិក និងជប៉ុនបានព្រាងផែនការយោធាបន្ទាន់មួយ ដើម្បីត្រៀមសម្រាប់ជម្លោះដ៏មានសក្តានុពលរវាងចិន និងតៃវ៉ាន់។
ប្រទេសចិនបានព្រមានថា ខ្លួននឹង “ចាត់វិធានការយ៉ាងខ្លាំងដើម្បីតបត” ប្រសិនបើ “កងកម្លាំងនៅតៃវ៉ាន់ស្វែងរកឯករាជ្យ បង្កហេតុ ប្រើកម្លាំង ឬសូម្បីតែបំបែកខ្សែបន្ទាត់ក្រហមណាមួយ”៕
.PNG?1713408343)
