អាមេរិកបញ្ជូនយោធានិងសព្វាវុធទៅអ៊ុយក្រែនសរុបជាទឹកប្រាក់រាប់លានដុល្លារ

អាមេរិក៖ អ្នកនាំពាក្យក្រសួងការពារជាតិអាមេរិក លោក John Kirby បាននិយាយកាលពីថ្ងៃទី៨ ខែធ្នូថា កន្លងមក សហរដ្ឋអាមេរិកបានយល់ព្រមផ្តល់អាវុធដល់អ៊ុយក្រែន សរុបចំនួន ៦០លានដុល្លារអាមេរិក ដែលជាកញ្ចប់ចុងក្រោយនៃអាវុធ និងគ្រាប់រំសេវ ត្រូវបានរំពឹងថា នឹងមកដល់អ៊ុយក្រែនក្នុងសប្តាហ៍នេះ។

ប្រធានាធិបតីអាមេរិកលោក Joseph Biden បានអនុម័តកាលពីថ្ងៃទី ១ ខែកញ្ញា ដើម្បីផ្តល់ឱ្យអ៊ុយក្រែននូវអាវុធសរុបចំនួន ៦០ លានដុល្លារអាមេរិក រួមទាំងអាវុធដ៍សាហាវដូចជា កាំជ្រួចប្រឆាំងរថក្រោះ "Light Javelin" អាវុធធុនតូចផ្សេងៗទៀត។ សហរដ្ឋអាមេរិកបានសម្តែងការយកចិត្តទុកដាក់យ៉ាងខ្លាំងចំពោះការផ្លាស់ប្តូរស្ថានភាពនៅតាមព្រំដែនរវាងអ៊ុយក្រែន និងរុស្ស៊ី ហើយបានផ្តល់អាវុធដល់អ៊ុយក្រែន ដើម្បីបង្កើនសមត្ថភាពការពាររបស់ខ្លួន។

សហរដ្ឋអាមេរិកកំពុងទាក់ទងជាមួយរដ្ឋជាសមាជិកនៃអង្គការសន្ធិសញ្ញាអាត្លង់ទិកខាងជើង និងសម្ព័ន្ធមិត្តអឺរ៉ុប ដើម្បីពិភាក្សាអំពីយុទ្ធសាស្រ្តក្នុងការដោះស្រាយស្ថានការណ៍នៅព្រំដែនរុស្ស៊ី - អ៊ុយក្រែន។

លោក Kirby បាននិយាយថា ចាប់តាំងពីវិបត្តិ Crimean ក្នុងឆ្នាំ ២០១៤ មក សហរដ្ឋអាមេរិកបានផ្តល់ជំនួយជាង ២.៥ ពាន់លានដុល្លារអាមេរិកដល់អ៊ុយក្រែន។ មកទល់ពេលនេះ សហរដ្ឋអាមេរិកបានផ្តល់ជំនួយផ្នែកសន្តិសុខប្រមាណ ៤៥០ លានដុល្លារដល់អ៊ុយក្រែន រួមទាំងសព្វាវុធដែលនឹងមកដល់ក្នុងសប្តាហ៍នេះ។

លើសពីនេះ យោធាអាមេរិកកំពុងជួយអ៊ុយក្រែនក្នុងការបណ្តុះបណ្តាលកងទ័ព ក្រៅពីការពិចារណាលើការរក្សាការសម្ងាត់ ក្រសួងការពារជាតិអាមេរិកមិនបានបង្ហាញចំនួនទាហានកងកម្លាំងពិសេសដែលឈរជើងក្នុងប្រទេសអ៊ុយក្រែន កាលវិភាគហ្វឹកហ្វឺន ប្រតិបត្តិការជាក់លាក់ និងផែនការដាក់ពង្រាយជាដើម។

យោងតាម CNN សមាជិកប្រហែល ១៥០ នាក់នៃឆ្មាំជាតិរដ្ឋផ្លរីដាត្រូវបានបញ្ជូនទៅអ៊ុយក្រែនក្នុងខែវិច្ឆិកា ដើម្បីជំនួសអតីតសមាជិកឆ្មាំជាតិរដ្ឋវ៉ាស៊ីនតោន ហើយបន្តជួយបណ្តុះបណ្តាលកងទ័ពអ៊ុយក្រែន៕