ស៊ូដង់៖ ក្រុមបាតុកររាប់ពាន់នាក់ បានប្រមូលផ្តុំគ្នានៅរដ្ឋធានីខាតទូម (Khartoum) នៃប្រទេសស៊ូដង់កាលពីថ្ងៃសៅរ៍ ដើម្បីប្រឆាំងការសម្រេចចិត្តជាឯកតោភាគីរបស់យោធា ក្នុងការតែងតាំងក្រុមប្រឹក្សាអធិបតេយ្យភាពថ្មីមួយដែលកំពុងកាន់អំណាច។ ការតែងតាំងនេះកើតមានតែប៉ុន្មានសប្តាហ៍បន្ទាប់ពីការចូលកាន់កាប់យោធាក្នុងប្រទេសស៊ូដង់។
កាលពីថ្ងៃទី ២៥ ខែតុលា កងទ័ពស៊ូដង់ បានចាត់វិធានការបញ្ចប់ភាពជាដៃគូរវាងយោធា និងរដ្ឋាភិបាលចម្រុះស៊ីវិល នៅស៊ូដង់។ អគ្គមេបញ្ជាការនៃកងកម្លាំងប្រដាប់អាវុធស៊ូដង់លោក អាប់ដុល ហ្វាត់តា អាល់ បួរហាន់ (Abdel Fattah Al-Burhan) បានប្រកាសដាក់រដ្ឋក្នុងភាពអាសន្ននៅទូទាំងប្រទេស រំលាយក្រុមប្រឹក្សាអធិបតេយ្យភាពអន្តរកាល និងរដ្ឋាភិបាល ចេញពីគណៈរដ្ឋមន្ត្រី។
លោក អាល់ បួរហាន់ បានចេញក្រឹត្យមួយកាលពីថ្ងៃព្រហស្បតិ៍ ដើម្បីបង្កើតក្រុមប្រឹក្សាអធិបតេយ្យភាពថ្មី ដោយតែងតាំងខ្លួនឯងជាប្រធាន។ ហើយប្រទេសលោកខាងលិចជាច្រើន បានព្រមានប្រឆាំងនឹងឧត្តមសេនីយ ដែលទទួលយកការសម្រេចចិត្តឯកតោភាគី និងបានជំរុញឱ្យមេដឹកនាំស៊ូដង់រៀបចំកិច្ចពិភាក្សា។
ទោះបីជាយ៉ាងណាក៏ដោយ យោធាស៊ូដង់បាននិយាយថា ក្រុមប្រឹក្សាថ្មី គឺចាំបាច់ដើម្បីបំពេញគម្លាតនយោបាយនៅក្នុងប្រទេស បន្ទាប់ពីក្រុមបាតុករគាំទ្រយោធាបានជំរុញឱ្យឧត្តមសេនីយដណ្តើមអំណាចកាលពីខែមុន។
នាយករដ្ឋមន្រ្តីស៊ូដង់ លោក Abdallah Hamdok ដែលកំពុងស្ថិតនៅក្រោមការឃុំខ្លួនក្នុងផ្ទះបានបដិសេធមិនចូលរួមក្នុងការរៀបចំរបស់យោធា ហើយបានកំណត់លក្ខខណ្ឌនៃការចូលនិវត្តន៍របស់គាត់ជាមួយនឹងការដោះលែងអ្នកជាប់ឃុំនយោបាយ។
ក្រុមគាំទ្រលទ្ធិប្រជាធិបតេយ្យកំពុងអំពាវនាវឱ្យមានការតវ៉ា និងកូដកម្មកាន់តែទូលំទូលាយប្រសិនបើយោធាមិនផ្លាស់ប្ដូរការដណ្តើមអំណាចរបស់ខ្លួន៕
