អារ៉ាប៊ីសាអូឌីត៖ មនុស្សដែលធ្លាប់ដឹងពីបញ្ហានេះ បានលាតត្រដាងថា កងកម្លាំងចម្រុះជាតិសាសន៍ដែលដឹកនាំដោយអារ៉ាប៊ីសាអូឌីត កំពុងជម្លៀសចេញពីប្រទេសយេម៉ែនភាគខាងត្បូង។ តែទោះជាយ៉ាងណាអ្នកនាំពាក្យកងកម្លាំងចម្រុះជាតិសាសន៍អារ៉ាប៊ីសាអូឌីត លោក Turki Maleki បានឆ្លើយតបនៅថ្ងៃទី១០ថា សម្ព័ន្ធពហុជាតិ កំពុងដាក់ពង្រាយកងទ័ពឡើងវិញ មិនមែនដកថយទេ។
ប្រភពយោធារបស់រដ្ឋាភិបាលយេម៉ែនជាច្រើន ដែលសុំមិនបញ្ចេញឈ្មោះបានប្រាប់សារព័ត៌មាន Reuters ថា កងទ័ពអារ៉ាប៊ីសាអូឌីត បានដកខ្លួនចេញពីមូលដ្ឋានយោធានៅទីក្រុង Aden ភាគខាងត្បូងប្រទេសយេម៉ែន ជាមួយនឹងអាវុធធុនធ្ងន់ និងឧបករណ៍ផ្សេងទៀត។ យោធាបានជម្លៀសចេញពីអាកាសយានដ្ឋាន ខណៈអ្នកផ្សេងទៀតបានយកអាវុធ ហើយបានចាកចេញនៅលើនាវាចម្បាំង។
សាក្សីបានឃើញថា ក្បួនរថយន្តរបស់កងទ័ពអារ៉ាប៊ីសាអូឌីត បានធ្វើដំណើរពីមូលដ្ឋានយោធាទៅកាន់កំពង់ផែ Aden នៅថ្ងៃទី ៩។ យោងតាមរបាយការណ៍របស់ប្រព័ន្ធផ្សព្វផ្សាយក្នុងស្រុក កងកម្លាំងចម្រុះ ជាតិសាសន៍ដឹកនាំដោយអារ៉ាប៊ីសាអូឌីតកំពុងដកខ្លួន។
កាលពីពេលថ្មីៗនេះ អង្គការសហប្រជាជាតិ និងសហរដ្ឋអាមេរិកបានបង្កើនការសម្រុះសម្រួលការទូតរបស់ពួកគេក្នុងការប៉ុនប៉ងបញ្ចប់វិបត្តិយេម៉ែនរយៈពេលប្រាំពីរឆ្នាំ។ តែរដ្ឋាភិបាលអារ៉ាប៊ីសាអូឌីត ទាមទារឱ្យសហរដ្ឋអាមេរិកជួយកែលម្អសមត្ថភាពការពារដែនអាកាសអារ៉ាប៊ីសាអូឌីត ដើម្បីទប់ទល់នឹងការវាយប្រហារដោយ UAV និងមីស៊ីលផ្លោង ដែលបាញ់ដោយកងកម្លាំងប្រដាប់អាវុធ Houthi ។
រដ្ឋាភិបាលសហរដ្ឋអាមេរិកបានប្រកាសកាលពីថ្ងៃទី ៤ ខែនេះថា សហរដ្ឋអាមេរិកបានយល់ព្រមលក់មីស៊ីលពីអាកាសទៅអាកាសចំនួន ២៨០ គ្រាប់ទៅឱ្យអារ៉ាប៊ីសាអូឌីត ជាមួយនឹងតម្លៃកិច្ចសន្យាសរុបប្រមាណ ៦៥០ លានដុល្លារអាមេរិក។ ការលក់អាវុធរួមមាន មីស៊ីលរយៈចម្ងាយមធ្យមកម្រិតខ្ពស់ AIM-120C ផលិតដោយក្រុមហ៊ុនបច្ចេកវិទ្យា Raytheon របស់អាមេរិក ក៏ដូចជាកាំជ្រួច LAU-128 ជំនួយឧបករណ៍ និងជំនួយបច្ចេកទេស។
យោងតាមសារព័ត៌មាន Reuters នេះ គឺជាការលក់អាវុធដ៏ធំដំបូងគេបង្អស់របស់សហរដ្ឋអាមេរិក ទៅកាន់ប្រទេសអារ៉ាប៊ីសាអូឌីត ចាប់តាំងពីការឡើងកាន់តំណែងជាប្រធានាធិបតីនៃគណបក្សប្រជាធិបតេយ្យ លោក Joseph Biden។
នៅក្នុងខែកញ្ញា ២០១៤ កងកម្លាំងប្រដាប់អាវុធ Houthi បានដណ្តើមយករដ្ឋធានី Sana'a របស់យេម៉ែន ហើយក្រោយមកបានកាន់កាប់ផ្នែកភាគខាងត្បូងនៃប្រទេសយេម៉ែន។ នៅខែមីនា ឆ្នាំ ២០១៥ អារ៉ាប៊ីសាអូឌីត និងប្រទេសផ្សេងទៀត បានចាប់ផ្តើមប្រតិបត្តិការយោធាប្រឆាំងនឹងពួក Houthi ។ នៅខែធ្នូ ឆ្នាំ ២០១៨ ក្រោមការសម្រុះសម្រួលរបស់អង្គការសហប្រជាជាតិ រដ្ឋាភិបាលយេម៉ែន និងក្រុម Houthi បានឈានដល់កិច្ចព្រមព្រៀងមួយស្តីពីបទឈប់បាញ់ និងការផ្លាស់ប្តូរអ្នកទោស ប៉ុន្តែភ្លាមៗនោះភាគីទាំងពីរបានចោទប្រកាន់គ្នាទៅវិញទៅមកថា បានបំពានកិច្ចព្រមព្រៀងបទឈប់បាញ់៕
