ភ្នំភ្លើងនៅអេស្ប៉ាញបាននិងកំពុងផ្ទុះឡើងអស់រយៈពេល៣សប្តាហ៍

អេស្ប៉ាញ៖ ភ្នំភ្លើង Cumbre នៅឡាប៉ាម៉ាប្រទេសអេស្ប៉ាញ បាននិងកំពុងផ្ទុះឡើងអស់រយៈពេល ៣ សប្តាហ៍ ហើយគិតត្រឹមថ្ងៃទី ១១ នេះ មិនមានសញ្ញានៃការបញ្ឈប់នូវកំអែលក្តៅធំបំផុត ដែលហូរចេញមកក្រៅទេ។

បណ្តាញទូរទស្សន៍ Sky News របស់ចក្រភពអង់គ្លេសបានឲ្យដឹងថា កំអែលក្រហមដែលបានឆាបឆេះចេញពីភ្នំភ្លើងនេះ មានសីតុណ្ហភាព ១២៤០ អង្សាសេ ដោយបំផ្លាញអគារ ភូមិ ដែលនៅជុំវិញតាមផ្លូវ។

យោងតាមទិន្នន័យពីវិទ្យាស្ថានភ្នំភ្លើងនៃកោះកាណារីចាប់តាំងពីការផ្ទុះភ្នំភ្លើងនៅថ្ងៃទី ១៩ ខែកញ្ញាមក កំអែលភ្នំភ្លើងបានលេបត្របាក់ដីជាង ៤៩៣ ហិកតា និងបំផ្លាញអគារចំនួន ១.១៨៦ ។

ក្រុមអ្នកជំនាញបានប៉ាន់ប្រមាណថា ចំណុចធំបំផុតនៃកំអែលភ្នំភ្លើងគឺ ១.៥ គីឡូម៉ែត្រ ហើយតំបន់នៃ“ ឧបទ្វីប” ដែលបង្កើតឡើងដោយកំអែលភ្នំភ្លើងបានចុះត្រជាក់ពេលហូរចូលទៅក្នុងសមុទ្របានឈានដល់ ៣៤ ហិកតា។

គណៈកម្មាធិការជំនាញមួយបានព្រមានថា នៅពេលដែលកំអែលភ្នំភ្លើងចូលសមុទ្រកាន់តែច្រើននោះ“ ឧបទ្វីប” អាចនឹងបែកបាក់ នៅពេលវាបន្តពង្រីកខ្លួនចូលទៅក្នុងសមុទ្រ ដែលនឹងបង្កឱ្យមានការផ្ទុះ រលកសមុទ្រធំៗ និងបញ្ចេញឧស្ម័នពុលជាដើម។

ផ្ទាំងថ្មធំៗ ដែលហូរចេញពីភ្នំភ្លើងនេះបានរមៀលចុះពីលើកំពូលភ្នំ ដែលទិដ្ឋភាពគួរឱ្យរន្ធត់នេះ បានធ្វើឲ្យរដ្ឋាភិបាលអេស្ប៉ាញបាន បង្ហោះការពន្យល់មួយនៅលើបណ្តាញសង្គមថា៖ «ភ្នំភ្លើងផ្នែកខាងជើងបានដួលរលំ ដែលបណ្តាលឱ្យដុំថ្មធំៗ បន្តរមៀលចុះ ហើយកំអែលភ្នំភ្លើងជាច្រើនបានហូរមកលើតំបន់ដែលប្រជាជនត្រូវបានជម្លៀសចេញ»។

រួមជាមួយការផ្ទុះភ្នំភ្លើង ការរញ្ជួយដីជាញឹកញាប់នៅតំបន់ជុំវិញ ឧទាហរណ៍ការរញ្ជួយដីចំនួន ២១ ត្រូវបានត្រួតពិនិត្យនៅថ្ងៃទី ១០ ដែលមានទំហំធំបំផុតឈានដល់ ៣.៨ រ៉ិចទ័រ។ ក្នុងរយៈពេលពីរថ្ងៃកន្លងមកនេះ មនុស្សជាច្រើនក៏បានមើលឃើញ ភ្នំភ្លើងបានផ្ទុះឡើងជាមួយផ្លេកបន្ទោរ និងផ្គរលាន់ ដែលធ្វើឲ្យមានការភ្ញាក់ផ្អើលយ៉ាងខ្លាំង។

របាយការណ៍ស្រាវជ្រាវវិទ្យាសាស្ត្រមួយ ដែលត្រូវបានបោះពុម្ពផ្សាយនៅឆ្នាំ ២០១៦ បានបញ្ជាក់ថានេះអាចបណ្តាលមកពីការប៉ះទង្គិចនិងការកកិតនៃភាគល្អិតផេះភ្នំភ្លើង ដែលប្រមូលផ្តុំបន្ទុកអគ្គីសនីហើយនៅពេលដែលវាឈានដល់កម្រិតមួយវាបញ្ចេញជាផ្គររន្ទះ ។

សូមបញ្ជាក់ថា ឡាប៉ាម៉ាមានប្រជាជនប្រមាណ ៨៣.០០០ នាក់ ដែលភាគច្រើនធ្វើអាជីវកម្មដាំផ្លែឈើនិងទេសចរណ៍។ គិតត្រឹមថ្ងៃទី ១១ រដ្ឋាភិបាលក្នុងតំបន់បានជម្លៀសប្រជាជនប្រមាណ ៦.០០០ នាក់ ដោយសារភ្នំភ្លើងនៅតែបន្តផ្ទុះ៕