លីបង់ជំទាស់នឹងកិច្ចសន្យារវាងអ៊ីស្រាអែលនិងក្រុមហ៊ុនអាមេរិកដើម្បីរុករកប្រេងនៅក្នុងជម្លោះដែនទឹក

លីបង់៖ ប្រទេសលីបង់ នៅថ្ងៃទី ២២ ខែកញ្ញា បានប្រកាសប្រឆាំងនឹងការដែលអ៊ីស្រាអែលចុះកិច្ចសន្យាថ្មីៗជាមួយក្រុមហ៊ុនអាមេរិក ដើម្បីរុករកប្រេង និងឧស្ម័ននៅក្នុងដែនទឹកដែលមានជម្លោះ។ ប្រទេសលីបង់សង្ឃឹមថា នឹងបន្តការចរចា ស្តីពីព្រំដែនសមុទ្រជាមួយអ៊ីស្រាអែល។

យោងតាមសេចក្តីថ្លែងការណ៍ ដែលចេញដោយវិមានប្រធានាធិបតីលីបង់ លីបង់បានប្រកាសក្នុងការអនុវត្តពេញលេញនូវដំណោះស្រាយដែលចេញដោយក្រុមប្រឹក្សាសន្តិសុខអង្គការសហប្រជាជាតិ និងដើម្បីការពារសិទ្ធិដែនទឹកនិងធនធានធម្មជាតិរបស់ប្រទេស។

លោកប្រធានាធិបតីលីបង់ Michel Aoun បានសង្កត់ធ្ងន់ថា លីបង់នឹងបន្តការចរចាដោយប្រយោលជាមួយអ៊ីស្រាអែល ដើម្បីកំណត់ព្រំដែនសមុទ្ររវាងប្រទេសទាំងពីរ។ លោកបានចង្អុលបង្ហាញថា ការងាររុករកទាំងអស់នៅក្នុងតំបន់ជម្លោះ គួរតែត្រូវបានផ្អាកជាបណ្ដោះអាសន្នសិន ហើយជម្លោះគួរតែត្រូវបានដោះស្រាយតាមរយៈការចរចាដោយគ្មានលក្ខខណ្ឌ។

កាលពីសប្តាហ៍មុន ក្រុមហ៊ុន Halliburton របស់សហរដ្ឋអាមេរិក បានចុះហត្ថលេខាលើកិច្ចសន្យាជាមួយអ៊ីស្រាអែល ដើម្បីទទួលបានគម្រោងសម្រាប់ការរុករកប្រេងនិងឧស្ម័ននៅក្នុងដែនទឹកដែលមានជម្លោះរវាងអ៊ីស្រាអែលនិងលីបង់។ ភាគីលីបង់បានសម្តែងការជំទាស់យ៉ាងខ្លាំងចំពោះកិច្ចសន្យានេះទៅអង្គការសហប្រជាជាតិ ដោយទាមទារឱ្យមានការហាមឃាត់ការរុករកធនធានប្រេងនិងឧស្ម័ននៅក្នុងតំបន់ជម្លោះនេះ។

សូមបញ្ជាក់ថា ចាប់ពីខែតុលាឆ្នាំ ២០២០ ដល់ខែឧសភាឆ្នាំ ២០២១ ក្រោមការជួយជ្រោមជ្រែងរបស់សហរដ្ឋអាមេរិកនិងអង្គការសហប្រជាជាតិ ប្រទេសលីបង់និងអ៊ីស្រាអែលបានរៀបចំកិច្ចចរចាដោយប្រយោលចំនួន ៥ លើក តែដោយសារភាពខុសប្លែកគ្នានៅក្នុងស្តង់ដារបច្ចេកទេស ធ្វើឲ្យការចរចាលើកទី ៦ ត្រូវបានពន្យារពេល៕