បក្សសាធារណរដ្ឋឱ្យលោកបៃដិនលាលែងពីតំណែង ក្រោយកងទ័ពអាមេរិករងការវាយប្រហារ

អាមេរិក៖ សមាជិកព្រឹទ្ធសភាមកពីគណបក្សសាធារណរដ្ឋ បានស្តីបន្ទោសចំពោះ លោកប្រធានាធិបតីចូ បៃដិន ស្តីពីគោលនយោបាយនៅអាហ្វហ្គានីស្ថាន និងបានពាវនាវឱ្យលោកលាលែងពីតំណែង។ ការស្នើនេះ ធ្វើឡើងក្រោយមួយថ្ងៃបន្ទាប់ពីកងទ័ពអាមេរិករងការវាយប្រហារដោយក្រុមឥស្លាមស្លាប់ចំនួន១៣នាក់។

សមាជិកសភាមកពីគណបក្សសាធារណរដ្ឋ បាននិយាយនៅលើបណ្តាញសង្គមដោយបានចាត់ទុក ការវាយប្រហារមកលើកងទ័ពអាមេរិកគ្រោះមហន្តរាយមនុស្សធម៌ដ៏អាក្រក់ ហើយជាផលវិបាកនៃការដឹកនាំរបស់លោក បៃដិន ដែលគ្មានសមត្ថភាព ។

សមាជិកព្រឹទ្ធសភា Josh Hawley នៃរដ្ឋ Missouri បាននិយាយ “លោកចូ បៃដិន គ្មានអ្វីគួរឱ្យសង្ស័យទេ ដែលថាលោកគ្មានសមត្ថភាពដឹកនាំប្រទេស និង មិនមានឆន្ទៈក្នុងការធ្វើ ដូច្នេះគាត់ត្រូវតែលាលែងពីតំណែង។ ”

សមាជិកព្រឹទ្ធសភា Martha Blackburn នៃរដ្ឋ Tennessee បាននិយាយនៅលើធ្វីតធ័រថា លោក បៃដិន និង ក្រុមសន្តិសុខជាតិរបស់គាត់ "គួរតែលាលែងពីតំណែង ឬត្រូវគេចោទប្រកាន់ហើយចុងក្រោយត្រូវដកចេញ" ។

ក្រៅពីមានមតិប្រតិកម្មពីសមាជិកព្រឹទ្ធសភាខាងលើនៅមានមតិជាច្រើនទៀត ទាក់ទងចំពោះការសម្រេចចិត្តរបស់លោកប្រធានាធីបតីអាមេរិក ចូ បៃដិន ក្រោយការបំផ្ទុះគ្រាប់បែកនៅជិតអាកាសយានដ្ឋានក្រុងកាប៊ុល។

ទីភ្នាក់ងារ AFP បានរាយការណ៍ថា ការបំផ្ទុះគ្រាប់បែកនៅជិតអាកាសយានដ្ឋានក្រុងកាប៊ុល គឺជាការវាយប្រហារដល់រដ្ឋបាលដឹកនាំដោយលោក បៃ ដិន ប៉ុន្តែការស្ទង់មតិថ្មីៗនេះបានបង្ហាញថា ការវាយតម្លៃការយល់ព្រមរបស់លោកបៃដិន គឺជាបុព្វហេតុមួយ ដែលធ្វើឱ្យមានការព្រួយបារម្ភ ចំពោះគោលនយោបាយធ្លាក់ចុះរបស់លោកចំពោះអាហ្វហ្គានីស្ថាន។

ការស្ទង់មតិរបស់ទីភ្នាក់ងារ Reuters បានបង្ហាញថា អត្រាការយល់ព្រមរបស់លោក បៃដិន ធ្លាក់ចុះ ៧ ភាគរយ មកនៅត្រឹម ៤៦ ភាគរយ ដែលជាកម្រិតទាបបំផុត ចាប់តាំងពីលោកឡើងកាន់តំណែងកាលពីខែមករាមក។ រ៉យទ័របាននិយាយថា បៃដិន អាចស្ថិតក្នុងការផ្លាស់ប្តូរបណ្តោះអាសន្ន ដោយផ្តល់ទស្សនៈដល់ការវិលត្រឡប់របស់តាលីបង់ទៅគ្រប់គ្រងអាហ្វហ្កានីស្ថាន និងផលប៉ះពាល់អវិជ្ជមានរបស់អាហ្វហ្គានីស្ថានទៅលើរដ្ឋបាលរបស់លោកបៃដិន៕