អាមេរិក៖ លោកប្រធានាធិបតីចូ បៃដិន នៅថ្ងៃទី ២៧ សីហាម៉ោងនៅកម្ពុជា បានប្រកាសតាមចាប់ខ្លួនអ្នកទទួលខុសត្រូវ ចំពោះការបំផ្ទុះគ្រាប់បែកភ្លោះនៅឯអាកាសយានដ្ឋានកាប៊ុលក្នុងប្រទេសអាហ្វហ្គានីស្ថាន ហើយបាននិយាយថាលោកបានសុំឱ្យមន្ទីរបញ្ចកោណបង្កើតផែនការវាយប្រហារតបតវិញ។ការប្រកាសនេះធ្វើឡើងប៉ុន្មានម៉ោងបន្ទាប់ពីការផ្ទុះនេះបានសម្លាប់ទាហានអាមេរិកយ៉ាងតិច ១៣ នាក់ និងជនស៊ីវិលជាច្រើននាក់នៅក្នុងក្រុងកាប៊ុល។
លោកប្រធានាធិបតីចូ បៃដិន បានថ្លែងសារទៅកាន់ពលរដ្ឋអាមេរិកាំង ដោយប្តេជ្ញាតាមសងសឹកអ្នកបញ្ជាឲ្យវាយប្រហារនៅទីក្រុងកាប៊ុលដែលសម្លាប់ទាហានអាមេរិកាំងយ៉ាងហោចណាស់១៣នាក់និងរបួស១៥នាក់។ លោកបានបញ្ជាឲ្យរៀបចំផែនការវាយប្រហារលើក្រុមភេរវករ ISIS-K ដោយវាយប្រហារមេដឹកនាំ និងទីតាំងរបស់ពួកគេតាមពេលវេលាដែលអាមេរិកយល់ថា សមស្រប។
លោកចូ បៃដិន បាននិយាយថា "យើងនឹងមិនអភ័យទោសទេយើងនឹងមិនភ្លេចទេ យើងនឹងតាមប្រមាញ់អ្នកហើយធ្វើឱ្យអ្នកបង់ជីវិតរបស់ពលរដ្ឋអាមេរិក" ។
លោកចូ បៃដិន បានថ្លែងទាំងអួលដើមករ និយាយអំពី“ វីរបុរស” ជនជាតិអាមេរិកដែលបានស្លាប់។ លោកបានបញ្ជាឱ្យដាក់ទង់ជាតិនៅសេតវិមាន និងអគារសាធារណៈនៅទូទាំងប្រទេសពាក់កណ្តាល ដើម្បីរំលឹកទាហានអាមេរិកដែលបានស្លាប់។
គួរបញ្ជាក់ថា រដ្ឋអ៊ិស្លាម Khorasan (ISIS-K) ដែលជាសម្ព័ន្ធរបស់ក្រុមសកម្មប្រយុទ្ធដែលពីមុនបានប្រយុទ្ធជាមួយកងកម្លាំងអាមេរិកនៅស៊ីរី និងអ៊ីរ៉ាក់បានអះអាងទទួលខុស ត្រូវចំពោះការវាយប្រហារនេះ។
អង្គការសហប្រជាជាតិ និងអង្គការណាតូ ថ្កោលទោសការវាយប្រហារដោយគ្រាប់បែកអត្តឃាតនៅអាកាសយានដ្ឋានក្នុងកាប៊ុលកាលពីថ្ងៃព្រហស្បតិ៍ដែលបានសម្លាប់មនុស្សអស់យ៉ាងហោចណាស់៧៣នាក់ ក្នុងនោះមានពលរដ្ឋអាហ្វហ្គានីស្ថាន៦០នាក់និងទាហានអាមេរិកាំងយ៉ាងហោចណាស់១៣នាក់៕
