Cct850x100 1

«គ្រឿងញៀន»ជិត៨តោនត្រូវបានដុតបំផ្លាញចោលនៅថ្ងៃនេះ

សង្គម
/
អ្នកយកព័ត៌មាន:
ឃុន សម្ផស្ស
/
ពិធីរដុតបំផ្លាញគ្រឿងញៀននៅថ្ងៃទី១៩កក្កដានេះ (រូបភាព៖ សហការីស៊ីស៊ីថាមស៍)

ភ្នំពេញ៖ គ្រឿងញៀនសរុបជិត៨តោន ដែលបង្ក្រាបបាននាពេលកន្លងទៅ ត្រូវបានដុតបំផ្លាញចោល នៅព្រឹកថ្ងៃទី១៩ ខែកក្កដា ឆ្នាំ២០២១នេះ ក្នុងឱកាសរៀបចំទិវាអន្ដរជាតិប្រយុទ្ធប្រឆាំងគ្រឿងញៀន។ នេះបើយោងតាមរបាយការណ៍របស់អាជ្ញាធរជាតិប្រយុទ្ធប្រឆាំងគ្រឿងញៀន។

គ្រឿងញៀនដែលត្រូវធ្វើការដុតបំផ្លាញចោលនៅថ្ងៃទី១៩កក្កដានេះ ក្នុងនោះរួមមានវត្ថុតាងទទួលបានពីសាលាដំបូង និងអយ្យការអមសាលាដំបូងរាជធានីភ្នំពេញ ខេត្តស្វាយរៀង ខេត្តកំពង់ឆ្នាំង , ខេត្តព្រៃវែង ខេត្តតាកែវ ដែលគណៈកម្មការបានរៀបចំរួចជាស្រេចតាមអំណាចសាលក្រម និសាលដីកាឲ្យធ្វើការដុតបំផ្លាញតាមលក្ខណៈបច្ចេកទេស និងមានសុវត្ថិភាព។

របាយការណ៍អាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា គ្រឿងញៀនដែលត្រូវដុតបំផ្លាញនោះរួមមាន៖ ហេរ៉ូអ៉ីន ២៩១គីឡូក្រាម, អឹមដេអឹមអា (ថ្នាំគ្រវី) ៥គីឡូក្រាម, កញ្ឆា ៨គីឡូក្រាម, កាទីណូន ១០គីឡូក្រាម, មេតំហ្វេតាមីន ៦២៦គីឡូក្រាម, កេតាមីន ៤១គីឡូក្រាម, នីមេតាហ្សេប៉ាម ១៣គីឡូក្រាម, សារធាតុគីមីផ្សំ ២.៥គីឡូក្រាម, សារធាតុគីមី ៨១២គីឡូក្រាម សរុបគ្រឿងញៀនដែលសម្រេចឲ្យបំផ្លាញចំនួន៧តោន៥៥១គីឡូក្រាម។

សូមជម្រាបថា នៅឆ្នាំ២០២០ អាជ្ញាធរកម្ពុជាបង្រ្កាបបទល្មើសគ្រឿងញៀន បានចំនួន១០៤៦១ករណី ច្រើនជាងឆ្នាំ២០១៩ ៦.៧៩% ដោយក្នុងនោះ រឹបអូសគ្រឿងញៀនបាន៣៨៧៥គីឡូក្រាម មានការកើនឡើង៥១៦% បើធៀបទៅនឹងបរិមាណគ្រឿងញៀនដែលរឹបអូសបានកាលពីឆ្នាំ២០១៩។

សម្តេច ហ៊ុន សែន នាយករដ្ឋមន្ត្រីនៃកម្ពុជា ធ្លាប់បានបានសង្កត់ថា បញ្ហាគ្រឿងញៀនបានគំរាមកំហែងដល់សុខភាពសាធារណៈ សន្តិសុខ សណ្តាប់ធ្នាប់សាធារណៈ និងរាំងស្ទះការអភិវឌ្ឍសង្គម។ ដូច្នេះ ប្រជាពលរដ្ឋជាពិសេសអាណាព្យាបាល ត្រូវយកចិត្តទុកដាក់លើសមាជិកក្នុងគ្រួសារ កុំឲ្យពាក់ព័ន្ធនឹងគ្រឿងញៀន ដោយណែនាំពីឥទ្ធិពលនិងគ្រោះថ្នាក់នៃការប្រើប្រាស់៕

Khcct banner

អត្ថបទទាក់ទង