ភ្នំពេញ៖ ចៅក្រមស៊ើបសួរនៃសាលាដំបូងរាជធានីភ្នំពេញ នៅថ្ងៃទី២១ ខែមិថុនា ឆ្នាំ២០២១នេះ បានសម្រេចឃុំខ្លួន សកម្មជនចលនាមាតាធម្មជាតិ៣នាក់ នៅពន្ធនាគារព្រៃសជាបណ្តោះអាសន្ន ក្រោមការចោទប្រកាន់ពីបទ ប្រមាថចំពោះអង្គព្រះមហាក្សត្រ និងបទរួមគំនិតក្បត់។
សកម្មជនដែលត្រូវតុលាការសម្រេចឃុំខ្លួននោះមាន៖កញ្ញា ស៊ុន រដ្ឋា លោក យីម លាងហ៊ី និងលោក លី ចាន់ដារ៉ាវុទ្ធ។ កញ្ញា ស៊ុន រដ្ឋា និងលោក លី ចាន់ដារ៉ាវុធ ត្រូវបានចាប់ខ្លួន បន្ទាប់ពីពួកគេចុះថតទីតាំងបង្ហូរទឹកស្អុយមួយកន្លែងចូលទៅក្នុងទន្លេ ក្បែរព្រះបរមរាជវាំង។ ដោយឡែក លោក យីម លាងហ៊ី ត្រូវបានចាប់ខ្លួននៅឯស្រុកកំណើត ក្នុងស្រុកកោះធំ ខេត្តកណ្ដាល។
របាយការណ៍របស់យអគ្គស្នងការដ្ឋាននគរបាលជាតិ បានបង្ហាញថា សកម្មជនទាំង៣នាក់នេះ បានធ្វើសកម្មភាព ដោយមានអង្គការចាត់តាំងច្បាស់លាស់ ដែលមានជនបរទេសជាអ្នកគូសវាសផែនទីឱ្យធ្វើសកម្មភាព និង ប្រតិបិត្តិការ។
ចំណែកឯកឧត្តម ជិន ម៉ាលីន អ្នកនាំពាក្យក្រសួងយុត្តិធម៌ បានគូសបញ្ជាក់ថា ការចាប់ខ្លួនសកម្មជនទាំង៣នាក់ គឺជាវិធានការច្បាប់របស់សមត្ថកិច្ច ហើយសមត្ថកិច្ចមានភស្តុតាងច្បាស់ក្នុងការចាប់ខ្លួន ហើយការចាប់ខ្លួននេះ មិនជាប់ពាក់ព័ន្ធរឿងបរិស្ថាននោះទេ។
