វ៉ាក់សាំងចិន«១លានដូស»ទៀតត្រូវបានដឹកមកដល់កម្ពុជាហើយ

ភ្នំពេញ៖ វ៉ាក់សាំងការពារជំងឺកូវីដ-១៩ សរុបចំនួន ១លានដូសបន្ថែមទៀត នៅថ្ងៃទី០៨ ខែមិថុនា ឆ្នាំ២០២១ ត្រូវបានដឹកមកដល់ប្រទេសកម្ពុជាយើងហើយ ក្នុងនោះមានវ៉ាក់សាំងជំនួយចិន ប្រភេទ«ស៊ីណូហ្វាម» (Sinopharm) ចំនួន ៥០ម៉ឺនដូស និងវ៉ាក់សាំងស៊ីណូវ៉ាក់ (Sinovac) ដែលកម្ពុជាបានបញ្ជាទិញពីរដ្ឋាភិបាលចិន ចំនួន ៥០ម៉ឺនដូសបន្ថែមទៀត ក្នុងគោលបំណងចូលរួមប្រយុទ្ធប្រឆាំង ទប់ស្កាត់ការរីករាលដាលនៃជំងឺកូវីដ-១៩ ដើម្បីការពារប្រជាពលរដ្ឋកម្ពុជា ឱ្យចៀសឆ្ងាញពីការឆ្លងជំងឺកូវីដ-១៩ ជាបន្តបន្ទាប់ទៀត។

គិតមកដល់បច្ចុប្បន្ន កម្ពុជាទទួលបានវ៉ាក់សាំងប្រឆាំងជំងឺកូវីដ-១៩ ទាំងវ៉ាក់សាំងជំនួយ និងការបញ្ជាទិញពីប្រទេសចិនប្រមាណជាង ៦.៥លានដូសហើយ ក្នុងនោះវ៉ាក់សាំងស៊ីណូវ៉ាក់ចំនួន ៤.៥លានដូស វ៉ាក់សាំងស៊ីណូហ្វាមចំនួន ២,២លានដូស និងវ៉ាក់សាំងកូវីសែល(អាស្ត្រាហ្សេនីកា) ដែលជាជំនួយពីអង្គការសុខភាពពិភពលោកចំនួន ៣២ម៉ឺន ៤ពាន់ដូស។

នេះបើតាមរបាយការណ៍របស់អនុគណៈកម្មាការតាមដាន និងវាយតម្លៃ នៃគណៈកម្មការចំពោះកិច្ចចាក់វ៉ាក់សាំងកូវីដ-១៩ ក្នុងក្របខណ្ឌទូទាំងប្រទេស (គ.វ.ក-១៩) គិតចាប់ពីថ្ងៃទី១០ ខែកុម្ភៈ ឆ្នាំ២០២១ ដល់ថ្ងៃទី០៧ ខែមិថុនា ឆ្នាំ២០២១ ចំនួនវ៉ាក់សាំងការពារកូវីដចំនួន ជាង ២លាន ៧៦ម៉ឺននាក់ហើយ (២,៧៦៦,១៩៨ នាក់) ស្មើនឹង ២៧,៦៦ភាគរយ នៃគម្រោងផែនការយុទ្ធនាការចាក់វ៉ាក់សាំងប្រឆាំងជំងឺកូវីដ-១៩ របស់រាជរដ្ឋាភិបាលក្នុងការចាក់ជូនប្រជាជននៅទូទាំងប្រទេសកម្ពុជា ឱ្យបានដល់ ចំនួន ១០លាននាក់ ដោយឥតគិតថ្លៃ នៅត្រឹមចុងឆ្នាំ២០២១ នេះ ឬដើមឆ្នាំ២០២២ ខាងមុខ។

សូមបញ្ជាក់ថា វ៉ាក់សាំងនឹងមកដល់កម្ពុជា ជាបន្តបន្ទាប់ទៀត ដែលមានចំនួន ១លានដូស នឹងមកដល់ថ្ងៃទី១២ មិថុនា ២០២១ និងវា៉ក់សាំង ១លានដូសបន្ថែម នឹងត្រូវដឹកមកដល់កម្ពុជាទៀតនៅថ្ងៃទី១៩ មិថុនា ២០២១ ខាងមុខនេះ៕