អ៊ីស្រាអែលថារ៉ុក្កែតជាង ១.០០០ គ្រាប់ត្រូវបានបាញ់ដោយពួកសកម្មប្រយុទ្ធប៉ាឡេស្ទីន

អ៊ីស្រាអែល៖ ការបាញ់ផ្លោងទៅមកដ៏សាហាវរវាងក្រុមសកម្មប្រយុទ្ធប៉ាឡេស្ទីននៅតំបន់ហ្គាហ្សាស្ទ្រីបនិងយោធាអ៊ីស្រាអែល បានកើនឡើងយ៉ាងខ្លាំង។ អ៊ីស្រាអែលនិយាយថារ៉ុក្កែតជាង ១.០០០ គ្រាប់ត្រូវបានបាញ់ដោយពួកសកម្មប្រយុទ្ធប៉ាឡេស្ទីន។ ជាការឆ្លើយតបអ៊ីស្រាអែលបានធ្វើការវាយប្រហារតាមអាកាសរាប់រយនៅលើតំបន់ហ្គាហ្សា ដោយបានបំផ្លាញអគារប៉មចំនួន ៣ និងបានសម្លាប់មន្ត្រីជាន់ខ្ពស់ហាម៉ាស។នេះបើយោងតាមសារព័ត៌មាន BBC ។

ចាប់តាំងពីថ្ងៃច័ន្ទ មកយ៉ាងហោចណាស់ជនជាតិប៉ាឡេស្ទីន ៦៥ នាក់និងប្រជាជន ៦ នាក់នៅអ៊ីស្រាអែលបានស្លាប់។ នោះរាប់បញ្ចូលទាំងកុមារប៉ាឡេស្ទីន ១៦ នាក់ដែលជាប់នៅក្នុងជម្លោះ។

ការប្រយុទ្ធបានផ្ទុះឡើងនៅយប់ថ្ងៃច័ន្ទ បន្ទាប់ពីការកើនឡើងនៃភាពតានតឹងរវាងអ៊ីស្រាអែលនិងប៉ាឡេស្ទីននៅក្រុង Jerusalem ខាងកើតដែលបានឈានដល់ការប៉ះទង្គិចគ្នានៅទីសក្ការៈមួយដែលគោរពបូជាដោយជនជាតិមូស្លីមនិងជនជាតិជ្វីហ្វ។

លោក ណេតាន់ យ៉ាហ៊ូ (Netanyahu)បានមានប្រសាសន៍ថា រដ្ឋាភិបាលនឹងប្រើកម្លាំងទាំងអស់របស់ខ្លួន ដើម្បីការពារអ៊ីស្រាអែលពីសត្រូវនៅខាងក្រៅនិងកុបកម្មនៅខាងក្នុង។ ក្រុមសកម្មប្រយុទ្ធនៅតំបន់ហ្គាហ្សាបានចាប់ផ្តើមបាញ់រ៉ុក្កែតចូលទឹកដីអ៊ីស្រាអែលនៅយប់ថ្ងៃច័ន្ទហើយអ៊ីស្រាអែលបានឆ្លើយតបដោយវាយគោលដៅនៅលើទឹកដីនេះវិញ។

កាលពីថ្ងៃពុធអ៊ីស្រាអែលបាននិយាយថា ខ្លួនបានសម្លាប់មន្ត្រីជាន់ខ្ពស់របស់ក្រុមហាម៉ាសនៅតំបន់ហ្កាហ្សា ហើយក៏ជាគោលដៅសម្រាប់ទីតាំងបាញ់មីស៊ីលផងដែរ។ នាយករដ្ឋមន្រ្តីអ៊ីស្រាអែលបាននិយាយថា នេះគ្រាន់តែជាការចាប់ផ្តើមប៉ុណ្ណោះ។

ក្រុមហាម៉ាសដែលគ្រប់គ្រងតំបន់ហ្គាហ្សាបានបញ្ជាក់ ពីការស្លាប់របស់មេបញ្ជាការរបស់ខ្លួននៅក្នុងទីក្រុងហ្គាហ្សា និង "អ្នកចម្បាំង" ផ្សេងទៀត។ នៅក្នុងសេចក្តីថ្លែងការណ៍មួយដែលបានរាយការណ៍ដោយទីភ្នាក់ងារសារព័ត៌មានរ៉យទ័របានបញ្ជាក់ថា “មេដឹកនាំនិងទាហានរាប់ពាន់នាក់នឹងដើរតាមគន្លងរបស់ពួកគេ” ។

ប៉ុន្តែក្រសួងការបរទេសរុស្ស៊ីនៅក្នុងសេចក្តីថ្លែងការណ៍មួយបានដកស្រង់សម្តីអ្នកនាំពាក្យហាម៉ាស់ថាចលនានេះបានត្រៀមរួចរាល់សម្រាប់បទឈប់បាញ់ ប្រសិនបើអ៊ីស្រាអែលបញ្ឈប់ "អំពើហឹង្សា" នៅក្នុងក្រុងJerusalem ខាងកើតនិង "វិធានការខុសច្បាប់ក្នុងការគោរពជនជាតិអារ៉ាប់ ដែលជាជនជាតិដើមរបស់ខ្លួន" ។

ក្រសួងសុខាភិបាលដែលគ្រប់គ្រងដោយហាម៉ាសនៅតំបន់ហ្គាហ្សានិយាយថា មនុស្សជាង ៣៦០ នាក់បានរងរបួសនៅទីនោះ ចាប់តាំងពីជម្លោះបានចាប់ផ្តើមមានមនុស្ស ៦៥ នាក់ដែលបានស្លាប់។ អ្នកស្រុកត្រូវបានគេព្រមានឱ្យជម្លៀសចេញពីអគារមុនពេលយន្តហោះចម្បាំងវាយប្រហារ។ ទោះយ៉ាងណាមន្ត្រីសុខាភិបាលបាននិយាយថា នៅតែមានការស្លាប់របស់ជនស៊ីវិល។ សមាជិក ៥ នាក់នៃគ្រួសារមួយ ត្រូវបានសម្លាប់នៅក្នុងការវាយប្រហារតាមអាកាសមួយកាលពីថ្ងៃអង្គាររួមទាំងបងប្អូនប្រុស ២ នាក់ផងដែរ។

ប្រជាជនអ៊ីស្រាអែលរាប់លាននាក់បានធ្វើដំណើរទៅកាន់ជម្រកគ្រាប់បែកនៅល្ងាចថ្ងៃពុធ នេះបើយោងតាម IDF នៅពេលដែលការព្រមាននៃការបាញ់រ៉ុក្កែតបានផ្ទុះឡើងនៅទូទាំងប្រទេស។ នៅព្រឹកថ្ងៃពុធទាហានអ៊ីស្រាអែលម្នាក់ត្រូវបានសម្លាប់ដោយមីស៊ីលប្រឆាំងរថក្រោះ ដែលបាញ់ចេញពីហ្គាហ្សាចូលទឹកដីអ៊ីស្រាអែល។

មានរបាយការណ៍មិនចុះសម្រុងគ្នាទាក់ទងនឹងជោគវាសនារបស់ក្មេងប្រុសអាយុ ៦ ឆ្នាំម្នាក់ ដែលបានរងការវាយប្រហារដោយគ្រាប់រ៉ុក្កែតលើទីប្រជុំជន Sderot ដោយអ្នកខ្លះនិយាយថា គាត់បានស្លាប់នៅក្នុងការវាយប្រហារនេះ។

ប៉ូលីសអ៊ីស្រាអែលបានរាយការណ៍ពីអ្វីដែលគេហៅថា កុបកម្មហឹង្សានៅក្នុងតំបន់រាប់សិបកន្លែងនៃប្រទេសទាំងយប់ដោយមានមនុស្ស ២៧០ នាក់ត្រូវបានចាប់ខ្លួន៕