មីយ៉ាន់ម៉ា៖ យោងតាមទីភ្នាក់ងារសារព័ត៌មានចិនស៊ិនហួរ បានឲ្យដឹងថា យោងតាមរបាយការណ៍របស់ទូរទស្សន៍ជាតិមីយ៉ាន់ម៉ានៅថ្ងៃទី ២ ប៉ូលីសបានដោះលែងអ្នកតវ៉ាចំនួន ៥១១ នាក់ ដែលត្រូវបានឃុំខ្លួននៅព្រឹកថ្ងៃដដែល។
ចាប់តាំងពីដើមខែកុម្ភៈ ការតវ៉ានិងបាតុកម្មបានបន្តនៅតាមកន្លែងជាច្រើន ក្នុងប្រទេសមីយ៉ាន់ម៉ា។ ការទាមទាររបស់ក្រុមអ្នកតវ៉ារួមមានការដោះលែងទីប្រឹក្សារដ្ឋលោកស្រី អ៊ុង សានស៊ូជី ដែលត្រូវបានឃុំខ្លួនដោយយោធាមីយ៉ាន់ម៉ាខណៈការតវ៉ាជាបន្តបន្ទាប់បណ្តាលឱ្យមានមនុស្សស្លាប់និងរបួសជាច្រើននាក់។
រដ្ឋប្រហារកាលពីថ្ងៃទី១ ខែកុម្ភៈបានបញ្ឈប់ជំហានបណ្ដោះអាសន្នរបស់មីយ៉ាន់ម៉ាឆ្ពោះទៅលទ្ធិប្រជាធិបតេយ្យ បន្ទាប់ពីការគ្រប់គ្រងយោធាជិត៥០ឆ្នាំ និងបានត្រូវបានថ្កោលទោស និងដាក់ទណ្ឌកម្មពីសហរដ្ឋអាមេរិក និងបណ្តាប្រទេសលោកខាងលិច និងការព្រួយបារម្ភកាន់តែខ្លាំងឡើងក្នុងចំណោមប្រទេសជិតខាង។
គួរបញ្ជាក់ផងដែរថា យ៉ាងហោចណាស់ បាតុករតវ៉ាចំនួន ២១នាក់ ត្រូវបានសម្លាប់ ចាប់តាំងពីភាពច្របូកច្របល់បានចាប់ផ្តើមដំបូងមកម្ល៉េះ។ កងទ័ពបាននិយាយថា ប៉ូលីសម្នាក់ត្រូវបានសម្លាប់៕
