អាម៉េរិក៖ រដ្ឋបាល លោក ដូណាល់ ត្រាំ កាលពីថ្ងៃចន្ទ បានដាក់ចេញនូវវិធានការរឹតបន្តឹងថ្មីលើការនាំចេញបន្ទះឈីបបញ្ញាសិប្បនិម្មិត (AI) កម្រិតខ្ពស់របស់ក្រុមហ៊ុន Nvidia ទៅកាន់ប្រទេសមួយចំនួននៅអាស៊ីអាគ្នេយ៍ រួមមាន ម៉ាឡេស៊ី សិង្ហបុរី ថៃ ឥណ្ឌូណេស៊ី និងប្រទេសប្រេស៊ីល ដោយតម្រូវឱ្យមានអាជ្ញាប័ណ្ណនាំចេញជាមុន ដើម្បីទប់ស្កាត់ការបង្វែរបច្ចេកវិទ្យាទាំងនេះចូលទៅប្រទេសចិន។ ការតម្លើងសម្ពាធផ្នែកបច្ចេកវិទ្យានេះ កើតឡើងចំពេលដែលលោក ត្រាំ កំពុងធ្វើដំណើរទៅកាន់ប្រទេសចិន ដើម្បីជួបពិភាក្សាទ្វេភាគីជាមួយប្រធានាធិបតី ស៊ី ជីនពីង នៅថ្ងៃព្រហស្បតិ៍សប្តាហ៍នេះ ក្នុងទីក្រុងសិនជិន អំឡុងកិច្ចប្រជុំកំពូល APEC។
យោងតាមការចេញផ្សាយរបស់ទីភ្នាក់ងារសារព័ត៌មានរ៉យទ័រ មជ្ឈមណ្ឌលទិន្នន័យ នៅក្រៅប្រទេសដែលផ្គត់ផ្គង់ថាមពលគណនាក្នុងទំហំធំដល់ក្រុមហ៊ុនចិន ក៏ត្រូវតម្រូវឱ្យស្នើសុំអាជ្ញាប័ណ្ណពីអាម៉េរិកក្នុងរយៈពេល ៩០ ថ្ងៃ ប៉ុន្តែវិធានការនេះបានលើកលែងចំពោះប្រព័ន្ធដែលប្រើប្រាស់ដោយក្រុមហ៊ុនលក់រាយតាមអនឡាញ និងបណ្តាញសង្គម។
ឆ្លើយតបនឹងវិធានការនេះ អ្នកនាំពាក្យក្រសួងការបរទេសចិន លោក Guo Jiakun បានថ្លែងកាលពីថ្ងៃអង្គារថា ទីក្រុងប៉េកាំងនឹងចាត់ «វិធានការចាំបាច់» ដើម្បីការពារផលប្រយោជន៍របស់ខ្លួន និងបានរិះគន់ទង្វើរបស់អាម៉េរិកថាជា «ការបង្ខិតបង្ខំផ្នែកសេដ្ឋកិច្ច»។
គួរបញ្ជាក់ថា ចំណាត់ការនេះត្រូវបានប្រកាសឡើងតែប៉ុន្មានថ្ងៃប៉ុណ្ណោះ បន្ទាប់ពីនាយកប្រតិបត្តិក្រុមហ៊ុន Nvidia លោក Jensen Huang បានលាលែងពីតំណែង ជុំវិញរឿងអាស្រូវទំនាក់ទំនងស្នេហាជាមួយស្ត្រីជនជាតិចិនម្នាក់ដែលសង្ស័យថាជាចារកម្ម និងធ្លាប់ធ្វើការនៅក្រុមហ៊ុន Megaspeed មានមូលដ្ឋាននៅសិង្ហបុរី ដែលកំពុងរងការស៊ើបអង្កេតពីបទលួចបង្វែរបន្ទះឈីបទៅឱ្យចិន៕