សភាតំណាងរាស្ត្រអាម៉េរិក រារាំងដំណើរការចោទប្រកាន់ ទម្លាក់រដ្ឋមន្ត្រីការពារជាតិអាម៉េរិក Pete Hegseth ចេញពីតំណែង

វ៉ាស៊ីនតោន៖ សភាតំណាងរាស្ត្រអាម៉េរិក ដែលដឹកនាំដោយគណបក្សសាធារណរដ្ឋ បានចាត់វិធានការកាលពីថ្ងៃអង្គារ (ទី១០ ខែវិច្ឆិកា) ដើម្បីរារាំងកិច្ចខិតខំប្រឹងប្រែងក្នុងការចោទប្រកាន់ដើម្បីទម្លាក់រដ្ឋមន្ត្រីការពារជាតិ Pete Hegseth ចេញពីតំណែង។ ការបោះឆ្នោតលើសំណើបែបនីតិវិធីនេះ បានធ្វើឡើងត្រឹមតែប៉ុន្មានម៉ោងប៉ុណ្ណោះ បន្ទាប់ពីលោក Hegseth បានរិះគន់យ៉ាងខ្លាំងចំពោះកិច្ចខិតខំប្រឹងប្រែងទម្លាក់រូបលោក ដោយចាត់ទុកថាជារឿងល្ខោន។ លោកក៏បានការពារកំណត់ត្រាការងាររបស់ខ្លួននៅមន្ទីរបញ្ចកោណយ៉ាងម៉ឺងម៉ាត់ ដែលទទួលបានការកោតសរសើរពីប្រធានាធិបតី Donald Trump ផ្ទាល់។

សមាជិកគណបក្សសាធារណរដ្ឋបានអនុម័តសំណើមួយដើម្បីបញ្ជូនចំណុចចោទប្រកាន់ចំនួន ៨ ទៅកាន់គណៈកម្មាធិការតុលាការ (Judiciary Committee)។ លោក Thomas Massie សមាជិកសភាតំណាងរាស្ត្រអាម៉េរិក និងជាអ្នកផ្តួចផ្តើមគំនិតចោទប្រកាន់នេះ បានព្រមានថា សកម្មភាពនេះនឹងធ្វើឱ្យសំណើនេះត្រូវបរាជ័យ (ឬស្លាប់ទៅវិញ)។ លោក Massie ដែលជាសមាជិកគណបក្សសាធារណរដ្ឋមកពីរដ្ឋ Kentucky និងត្រៀមចាកចេញពីតំណែង បានសង្ឃឹមថានឹងទទួលបានសំឡេងគាំទ្រពីសមាជិកគណបក្សសាធារណរដ្ឋមួយចំនួន ដែលមិនពេញចិត្តនឹងគោលនយោបាយរបស់លោក Hegseth និងមានការព្រួយបារម្ភចំពោះភាពមិនពេញនិយមនៃសង្គ្រាមជាមួយអ៊ីរ៉ង់។

គណបក្សប្រជាធិបតេយ្យបានបង្ហាញការគាំទ្រយ៉ាងខ្លាំងចំពោះកិច្ចខិតខំប្រឹងប្រែងទម្លាក់លោក Hegseth នេះ ហើយពួកគេបានព្យាយាមជួយលោក Massie ក្នុងការបើកផ្លូវឆ្ពោះទៅរកការបោះឆ្នោតលើសំណើទម្លាក់រូបលោក។ ប្រសិនបើកើតឡើងមែន លោក Hegseth នឹងក្លាយជារដ្ឋមន្ត្រីការពារជាតិអាម៉េរិកដំបូងគេដែលត្រូវបានចោទប្រកាន់ដើម្បីទម្លាក់ចេញពីតំណែង៕