ថៃ ត្រៀមបញ្ជូនគណៈប្រតិភូ មកចូលរួមកិច្ចប្រជុំកំពូលហ្វ្រង់កូហ្វូនី លើកទី២០ នៅក្រុងភ្នំពេញ

ថៃ៖ ប្រទេសថៃ បានប្រកាសថា ខ្លួននឹងបញ្ជូនគណៈប្រតិភូក្នុងឋានៈជាសង្កេតការណ៍ មកចូលរួមកិច្ចប្រជុំកំពូលហ្វ្រង់កូហ្វូនី (Francophonie Summit) លើកទី២០ ដែលនឹងប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែវិច្ឆិកា ឆ្នាំ២០២៦ ខាងមុខនេះ នៅក្នុងរាជធានីភ្នំពេញ។

លោក Sihasak Phuangketkeow ឧបនាយករដ្ឋមន្ត្រី និងជារដ្ឋមន្ត្រីការបរទេសថៃ បានបញ្ជាក់នាថ្ងៃអង្គារ នេះថា ប្រទេសថៃនឹងចូលរួមក្នុងនាមជាសង្កេតការណ៍ នៃកិច្ចប្រជុំកំពូលដែលកម្ពុជាធ្វើជាម្ចាស់ផ្ទះ ក្រោមក្របខ័ណ្ឌនៃអង្គការអន្តរជាតិហ្វ្រង់កូហ្វូនី (OIF)។

គួរបញ្ជាក់ថា កម្ពុជា ត្រៀមខ្លួនរួចជាស្រេចក្នុងការធ្វើជាម្ចាស់ផ្ទះរៀបចំកិច្ចប្រជុំកំពូលហ្វ្រង់កូហ្វូនី លើកទី២០ នាថ្ងៃទី១៤-១៦ ខែវិច្ឆិកានេះ ដោយមានការចូលរួមពីប្រមុខរដ្ឋ និងប្រមុខរដ្ឋាភិបាលនៃបណ្តារដ្ឋសមាជិកជាច្រើន រួមទាំងប្រធានាធិបតីបារាំង លោក Emmanuel Macron ដែលនឹងអញ្ជើញមកបំពេញទស្សនកិច្ចផ្លូវការនៅកម្ពុជា។

មកទល់ពេលនេះ ក្នុងចំណោមរដ្ឋសមាជិក និងរដ្ឋសង្កេតការណ៍នៃអង្គការ LA Francophonie (OIF) ទាំង ៩០ មាន ៧៩ប្រទេសហើយបានបញ្ជាក់ពីការចូលរួម។ កិច្ចប្រជុំកំពូលជាប្រវត្តិសាស្ត្រនេះ នឹងទទួលស្វាគមន៍គណៈប្រតិភូអន្តរជាតិជិត ១០០០នាក់ ព្រមទាំងប្រមុខរដ្ឋ និងប្រមុខរដ្ឋាភិបាលមកពី ២០ប្រទេស (មិនរាប់បញ្ចូលមន្ត្រីអមដំណើរកម្រិតផ្សេងទៀត) និងអ្នកសារព័ត៌មានជាតិ-អន្តរជាតិជាង ១២០០នាក់ ដែលបានចុះឈ្មោះយកព័ត៌មាន៕