វ៉ាស៊ីនតោន៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានថ្លែងប្រាប់អ្នកសារព័ត៌មាននៅសេតវិមានថា លោកបាននិយាយទូរស័ព្ទផ្ទាល់ជាមួយនាយកប្រតិបត្តិ (CEO) ក្រុមហ៊ុន Nvidia លោក Jensen Huang កាលពីថ្ងៃចន្ទ ហើយលោក Huang បានបដិសេធថាមិនបានដឹងទាល់តែសោះថា ស្ត្រីដែលលោកមានទំនាក់ទំនងស្នេហាក្រៅអាពាហ៍ពិពាហ៍ជាមួយ គឺជាចារនារីឱ្យប្រទេសចិន។ ការលើកឡើងរបស់ប្រធានាធិបតីអាម៉េរិក បានធ្វើឡើងបន្ទាប់ពីសារព័ត៌មាន The New York Times បានរាយការណ៍ថា ទីភ្នាក់ងារចារកម្មសហរដ្ឋអាម៉េរិកបានតាមដានអ្នកស្រី Alice Huang ថ្នាក់ដឹកនាំក្រុមហ៊ុន Megaspeed International ដោយសង្ស័យថាជាភ្នាក់ងារចារកម្មឱ្យក្រសួងសន្តិសុខរដ្ឋចិន ដែលត្រូវគេជ្រើសរើសឱ្យប្រមូលព័ត៌មានសម្ងាត់អំពី CEO ក្រុមហ៊ុន Nvidia និងព្យាយាមជះឥទ្ធិពលឱ្យមានការបញ្ជូនបន្ទះឈីបបញ្ញាសិប្បនិម្មិត (AI) ដ៏ទំនើបទៅកាន់ប្រទេសចិន។
លោក ត្រាំ បានបញ្ជាក់ថា លោកមានការ ភ្ញាក់ផ្អើលយ៉ាងខ្លាំង ចំពោះការចោទប្រកាន់ដែលបានជំរុញឱ្យក្រុមប្រឹក្សាភិបាលក្រុមហ៊ុន Nvidia ចាប់ផ្តើមធ្វើការស៊ើបអង្កេតដោយឯករាជ្យមួយ។ លោក ត្រាំ ថ្លែងថា៖ «ខ្ញុំបានសួរគាត់ថា 'តើលោកបានដឹងទេថា នាងគឺជាចារនារី?' គាត់ឆ្លើយថា 'ខ្ញុំមិនបានដឹងទេថា នាងគឺជាចារនារី' ហើយខ្ញុំពិតជាជឿគាត់»។ លោក ត្រាំ ក៏បានសម្តែងការអាណិតអាសូរដល់លោក Huang ផងដែរ ដោយលើកឡើងថា លោក Huang កំពុងរងទុក្ខលំបាកយ៉ាងខ្លាំង ដោយសារផលប៉ះពាល់ដល់ភរិយា និងគ្រួសាររបស់លោក ប៉ុន្តែលោកជឿជាក់ថា លោក Huang ជាមនុស្សមានកិត្តិយស និងសេចក្តីថ្លៃថ្នូរ ហើយនឹងអាចឆ្លងផុតវិបត្តិនេះដោយសុវត្ថិភាព៕
