វ៉ាស៊ីនតោន៖ នៅក្នុងបទសម្ភាសន៍តាមទូរស័ព្ទជាមួយកាសែត The New York Times កាលពីយប់ថ្ងៃអង្គារ ប្រធានាធិបតីសហរដ្ឋអាម៉េរិក លោក ដូណាល់ ត្រាំ បានប្រកាសថា លោក «ពិតជាមានឆន្ទៈ» ក្នុងការទទួលយកលទ្ធផលនៃការបោះឆ្នោតពាក់កណ្តាលអាណត្តិ ហើយត្រៀមខ្លួនរួចជាស្រេចក្នុងការបើកទ្វារធ្វើការជាមួយគណបក្សប្រជាធិបតេយ្យ ដែលកំពុងឈានឆ្ពោះទៅកាន់ការគ្រប់គ្រងទាំងសភាតំណាងរាស្ត្រ និងព្រឹទ្ធសភា ដើម្បីស្វែងរកដំណោះស្រាយរួមគ្នា ជាពិសេសលើបញ្ហាប្រឈមនានាដែលកំពុងតែកើតមាន។
យោងតាម The New York Times ទោះបីជាគណបក្សសាធារណរដ្ឋបានជួបប្រទះនឹងការបរាជ័យ និងបរិយាកាសនៅក្នុងសេតវិមានអំឡុងពេលតាមដានលទ្ធផលត្រូវបានពណ៌នាថាមានភាពស្ងាត់ជ្រងំយ៉ាងណាក៏ដោយ ក៏លោក ត្រាំ បានអះអាងថា លោកមិនមានការសោកស្តាយអ្វីឡើយចំពោះរយៈពេលពីរឆ្នាំដំបូងនៃអាណត្តិទីពីររបស់លោក ដោយចាត់ទុកថាវាជាសម័យកាលដ៏ជោគជ័យបំផុត និងមិនស្តាយក្រោយចំពោះការសម្រេចចិត្តធ្វើសង្គ្រាមជាមួយអ៊ីរ៉ង់នោះឡើយ ទោះបីជាលោកបានទទួលស្គាល់ថាការឡើងថ្លៃនៃតម្លៃប្រេងឥន្ធនៈបណ្តាលឱ្យអ្នកបោះឆ្នោតមិនសប្បាយចិត្តក៏ដោយ។ លោក ត្រាំ បានបន្តបន្ទោសថា មូលហេតុចម្បងនៃការបរាជ័យរបស់បក្សគឺបណ្តាលមកពីរូបលោកផ្ទាល់មិនមានឈ្មោះនៅលើសន្លឹកឆ្នោត ដើម្បីជួយជំរុញទឹកចិត្តអ្នកបោះឆ្នោតឱ្យចេញមកគាំទ្រឱ្យបានគ្រប់គ្រាន់៕
