អ៊ីស្រាអែល ដាក់សម្ពាធឱ្យត្រាំប្រើប្រាស់នុយក្លេអ៊ែរលើអ៊ីរ៉ង់

វ៉ាស៊ីនតោន៖ អ្នករាយការណ៍ និងជាអ្នកវិភាគព័ត៌មានដ៏ល្បីល្បាញរបស់អាម៉េរិក លោក Tucker Carlson បានបង្ហោះសារព្រមានជាបន្តបន្ទាប់ ដោយលើកឡើងថា រដ្ឋបាលរបស់ប្រធានាធិបតីអាម៉េរិក លោក ដូណាល់ ត្រាំ (Donald Trump) អាចនឹងឈានដល់ការសម្រេចចិត្តត្រឹមចុងសប្តាហ៍ខាងមុខនេះ (ប្រហែលថ្ងៃទី ៧ ខែវិច្ឆិកា) ថាតើត្រូវប្រើប្រាស់អាវុធនុយក្លេអ៊ែរវាយប្រហារលើប្រទេសអ៊ីរ៉ង់ដែរឬទេ។ ការលើកឡើងនេះកើតឡើងបន្ទាប់ពីមានសម្ពាធយ៉ាងខ្លាំងពីនាយករដ្ឋមន្ត្រីអ៊ីស្រាអែល លោក Benjamin Netanyahu ដែលបានជំរុញឱ្យអាម៉េរិកបំផ្លាញទីតាំងអ៊ុយរ៉ាញ៉ូមក្រោមដីឈ្មោះ Pickax Mountain ក្នុងប្រទេសអ៊ីរ៉ង់ ដែលស្ថិតនៅក្រោមគ្រឹះថ្មក្រានីតជម្រៅ ៣០០ ហ្វីត ដែលអាវុធធម្មតាមិនអាចទម្លាយបាន។

យោងតាមការបញ្ជាក់របស់លោក Carlson តាមបណ្តាញសង្គម X លោកបានរៀបរាប់ថា នាយករដ្ឋមន្រ្តីអ៊ីស្រាអែលលោក Netanyahu កំពុងស្ថិតក្នុងស្ថានភាពទាល់ច្រកផ្នែកនយោបាយនៅក្នុងស្រុក បន្ទាប់ពីលទ្ធផលនៃការបោះឆ្នោតកន្លងមកមិនអាចឱ្យលោកបង្កើតរដ្ឋាភិបាលដែលមាន ៦១ អាសនៈក្នុងសភា (Knesset) បានឡើយ លើកលែងតែមានការជ្រោមជ្រែងដោយផ្ទាល់ពីរដ្ឋបាលលោក ត្រាំ។ កត្តានេះធ្វើឱ្យរូបលោកត្រូវការជម្លោះយោធាយ៉ាងចាំបាច់។ ដើម្បីសម្រេចគោលដៅនេះ លោក Netanyahu បានដាក់សម្ពាធលើមន្ត្រីជាន់ខ្ពស់អាម៉េរិក រួមមាន រដ្ឋមន្ត្រីការពារជាតិ លោក Pete Hegseth, មេបញ្ជាការ CENTCOM លោក Brad Cooper, រដ្ឋមន្ត្រីការបរទេស លោក Marco Rubio, និងនាយកទីភ្នាក់ងារ CIA លោក John Ratcliffe ឱ្យគាំទ្រការចាប់ផ្តើមប្រតិបត្តិការយោធាឡើងវិញ ព្រមទាំងមានការទាស់ទែងប្រឆាំងនឹងកិច្ចព្រមព្រៀងសន្តិភាពអ៊ីរ៉ង់ដែលកំពុងព្រាងនៅទីក្រុងដូហា ដែលសូម្បីតែអតីតប្រធានាធិបតី Barack Obama ក៏ត្រូវបានគេរាយការណ៍ថាប្រឆាំងនឹងកិច្ចព្រមព្រៀងនោះដែរ។

លោក Carlson បានកត់សម្គាល់ថា លោក ត្រាំ ផ្ទាល់នៅតែមានការស្ទាក់ស្ទើរ និងកំពុងស្តាប់ការទាញហេតុផលពីអនុប្រធានាធិបតី លោក JD Vance និងបេសកជនពិសេស លោក Steve Witkoff ដែលជឿថាកិច្ចព្រមព្រៀងការទូតជាមួយអ៊ីរ៉ង់នៅតែអាចកើតមានឡើង។ ទោះបីជាការចរចាមានភាពសមុគស្មាញ ជាពិសេសបន្ទាប់ពីការសម្លាប់មេដឹកនាំកំពូល Ayatollah Ali Khamenei កាលពីខែកុម្ភៈមកក៏ដោយ ប៉ុន្តែប្រភពជិតស្និទ្ធនឹងអ្នកធ្វើសេចក្តីសម្រេចចិត្តក្នុងទីក្រុងតេអេរ៉ង់ បានឱ្យដឹងថា ភាគីអ៊ីរ៉ង់មានការឯកភាពគ្នាក្នុងការជៀសវាងសង្គ្រាមបន្ថែម និងចង់បានកិច្ចព្រមព្រៀង។

លោក Carlson ក៏បានព្រមានអំពីផលប៉ះពាល់ដ៏ធ្ងន់ធ្ងរដល់សកលលោក ប្រសិនបើការវាយប្រហារនុយក្លេអ៊ែរកើតឡើង ដោយប្រទេសសម្ព័ន្ធមិត្តអាម៉េរិកនៅមជ្ឈិមបូព៌ា មានការភ័យខ្លាចយ៉ាងខ្លាំង ដោយ កាលពីថ្ងៃទី ២៧ ខែកញ្ញា លោក Netanyahu បានហោះទៅកាន់ទីក្រុងអាប៊ូដាប៊ី ដើម្បីស្វែងរកការគាំទ្រពីអារ៉ាប់រួម (UAE) ប៉ុន្តែត្រូវបានបដិសេធ។ សង្គ្រាម ៨ ខែកន្លងមកនេះ បានធ្វើឱ្យសេដ្ឋកិច្ចតំបន់ និងទីផ្សារថាមពលសកលរង្គោះរង្គើ ដោយក្នុងខែតុលា កប៉ាល់ដឹកប្រេង (Supertankers) ចំនួន ១១ គ្រឿងក្នុងចំណោម ៨៥០ គ្រឿងលើពិភពលោក ត្រូវបានខូចខាតធ្ងន់ធ្ងរនៅច្រកសមុទ្រហ័រមូស។ លោកព្រមានថា ការផ្ទុះអាវុធនុយក្លេអ៊ែរនៅ Pickax Mountain នឹងធ្វើឱ្យវិទ្យុសកម្មបំពុលទឹកសមុទ្រនៅឈូងសមុទ្រពែក្ស ដែលប៉ះពាល់ដល់ប្រភពទឹកស្អាតរបស់មនុស្សជាង ១០០ លាននាក់។