តូក្យូ៖ នៅក្នុងប្រទេសជប៉ុន ឪពុកម្តាយជាច្រើនបានជួបជុំគ្នាក្នុងកម្មវិធី ស្វែងរកគូស្រករជំនួសកូនៗដែលនៅលីវ ត្រូវបានគេស្គាល់ថាជា «Proxy Konkatsu» (ការស្វែងរកគូស្រករជំនួស)។ ព្រឹត្តិការណ៍នេះត្រូវបានរៀបចំឡើងដោយអង្គការ សមាគម Good Match Parents' Association។ ក្រុមឪពុកម្តាយជាច្រើន បានសិក្សាលើបញ្ជីឈ្មោះបេក្ខជនជាមុន ដោយពិនិត្យលើអាយុ កម្ពស់ មុខរបរ និងកម្រិតវប្បធម៌ រួចទើបចូលទៅជជែកផ្ទាល់ជាមួយគ្នារវាងអាណាព្យាបាល និងអាណាព្យាបាល។ ប្រសិនបើភាគីទាំងពីរមានការចាប់អារម្មណ៍ដូចគ្នា ពួកគាត់នឹងផ្លាស់ប្តូររូបថត និងប្រវត្តិរូបសង្ខេបយ៉ាងលម្អិត ដើម្បីយកទៅផ្ទះពិភាក្សាជាមួយកូនៗ មុនពេលឈានដល់ការរៀបចំការជួបមុខគ្នារវាងយុវជនទាំងពីរ។
យោងតាមការចេញផ្សាយរបស់កាសែត Japan Daily និន្នាការនេះបានរីកចម្រើនគួរឱ្យកត់សម្គាល់ ដោយកើនឡើងពីអ្នកចូលរួមត្រឹមតែពីរបីដប់នាក់ នៅពេលដែលសមាគមនេះចាប់ផ្តើមបង្កើតឡើងក្នុងឆ្នាំ២០០៥ រហូតដល់ប្រមាណ ២០០នាក់ នៅក្នុងព្រឹត្តិការណ៍ធំៗតាមបណ្តាទីក្រុងជប៉ុន នាពេលបច្ចុប្បន្ន។ ផ្អែកលើទិន្នន័យត្រឹមឆ្នាំ២០២០ បុរស ២៨.៣% និងស្ត្រី ១៧.៨% របស់ជប៉ុន មានអាយុ ៥០ឆ្នាំ នៅតែមិនទាន់រៀបការ។ ការអង្កេតរបស់ភ្នាក់ងារកុមារ និងគ្រួសារ (Children and Families Agency) បានរកឃើញថា យុវជននៅលីវរហូតដល់ ៣៥.១% បានថ្លែងថា ពួកគេគ្មានបំណងចង់រៀបការនោះឡើយ៕
