កោះតៃវ៉ាន់ ចេញការព្រមាននៃការមកដល់នៃព្យុះទីហ្វុងឆាំពី

តៃប៉ិ៖ អាជ្ញាធរនៃកោះតៃវ៉ាន់បានចេញការព្រមានអាសន្នសម្រាប់តំបន់ដីគោកទូទាំងកោះតៃវ៉ាន់នៅថ្ងៃព្រហស្បតិ៍ ទី២២ ខែតុលា នេះដើម្បីត្រៀមលក្ខណៈទប់ទល់នឹងឥទ្ធិពលនៃព្យុះទីហ្វុងដ៏ខ្លាំងក្លាឆាំពី (Champi) ដែលជាព្យុះដ៏ធំបំផុតមួយនៅមហាសមុទ្រប៉ាស៊ីហ្វិកនាឆ្នាំនេះ។ រដ្ឋបាលឧតុនិយមមជ្ឈិមតៃវ៉ាន់ (CWA) បានបញ្ជាក់ថា ទោះបីជាព្យុះនេះបានថមថយឥទ្ធិពលបន្តិចបន្តួចពីកម្រិត Super Typhoon ក៏ដោយ ប៉ុន្តែវានៅតែរក្សាកម្លាំងខ្យល់បក់បោកយ៉ាងសាហាវខ្លាំងជាង ២២៧ គីឡូម៉ែត្រក្នុងមួយម៉ោងនៅជិតចំណុចកណ្តាលរបស់វា ហើយព្យុះនេះកំពុងស្ថិតនៅចម្ងាយប្រហែល ២៥០ គីឡូម៉ែត្រភាគអាគ្នេយ៍នៃស្រុកយីឡាន (Yilan) ដោយគ្របដណ្តប់ពង្រីកដល់ ៣២០ គីឡូម៉ែត្រ ដែលធំល្មមនឹងជះឥទ្ធិពលលើផ្ទៃដីភាគច្រើននៃកោះតៃវ៉ាន់រយៈពេលជិត ២ ថ្ងៃពេញ។

យោងតាមទិន្នន័យព្យាករណ៍របស់ CWA ព្យុះទីហ្វុង «ឆាំពី» ត្រូវបានគេរំពឹងថានឹងខិតចូលជិតតៃវ៉ាន់បំផុតនៅចុងថ្ងៃសុក្រ ទី២៣ ខែតុលា ខាងមុខដោយបក់កាត់តាមតំបន់ឆ្នេរភាគឦសាន មុនពេលបត់ឆ្ពោះទៅទិសខាងជើងកាត់តាមដែនសមុទ្រជិតទីក្រុងសៀងហៃ និងឆ្ពោះទៅភាគខាងត្បូងនៃប្រទេសជប៉ុន។ អាជ្ញាធរបានផ្ញើសារអាសន្នតាមទូរស័ព្ទដៃទៅកាន់ពលរដ្ឋនៅតាមទីក្រុងជាប់ឆ្នេរ ដើម្បីព្រមានពីគ្រោះថ្នាក់នៃរលកសមុទ្រដែលមានកម្ពស់ខ្ពស់ជាង ៦ ម៉ែត្រ និងគ្រោះទឹកជំនន់ពីបរិមាណទឹកភ្លៀងសរុបដែលអាចធ្លាក់ចុះជិត ១ ម៉ែត្រនៅតំបន់ភ្នំភាគខាងជើង រួមទាំងតំបន់ភ្នំក្បែររដ្ឋធានីតៃប៉ិ។

ជាការឆ្លើយតបក្រសួងដឹកជញ្ជូនតៃវ៉ាន់បានប្រកាសលុបចោលជើងហោះហើរចំនួន ១២៥ ជើង ដែលភាគច្រើនជាជើងហោះហើរក្នុងស្រុក ខណៈដែលបណ្តាញផ្លូវដែកនៅតែបន្តដំណើរការជាធម្មតា។ ក្រសួងមហាផ្ទៃបានឱ្យដឹងថា ពុំទាន់មានបទបញ្ជាឱ្យជម្លៀសប្រជាពលរដ្ឋនៅឡើយទេ៕