បំណែក«គ្រាប់រ៉ុក្កែត»ចិនទំហំប៉ុនរថយន្តធ្លាក់នៅប្រទេសឥណ្ឌូនេស៊ី

ហ្សាការតា៖ អាជ្ញាធរឥណ្ឌូនេស៊ីបានចាប់ផ្តើមការស៊ើបអង្កេតជាផ្លូវការកាលពីថ្ងៃទី ២០ ខែតុលា បន្ទាប់ពីបានរកឃើញបំណែកលោហៈធំៗចំនួនពីរ ដែលគេសង្ស័យថាជាផ្នែកនៃរ៉ុក្កែតអវកាសចិន ធ្លាក់ចូលទៅក្នុងចម្ការដូងប្រេងមួយកន្លែង នៅជិតតំបន់លំនៅឋានរបស់កម្មករក្នុងខេត្តកាលីម៉ាន់តាន់កណ្តាលលើកោះបូណេអូ។ ហេតុការណ៍នេះបានកើតឡើងបន្ទាប់ពីអ្នកស្រុកបានឮសំឡេងផ្ទុះយ៉ាងខ្លាំងកាលពីល្ងាចថ្ងៃទី ១៨ ខែតុលា ហើយនៅព្រឹកថ្ងៃទី ១៩ ខែតុលា កម្មករចម្ការម្នាក់ឈ្មោះ Wardi Tamroni បានប្រទះឃើញបំណែកទីមួយ ដែលជាបន្ទះអាលុយមីញ៉ូមប្រវែង ៩ ម៉ែត្រ មានស្នាមឆេះ និងមានទំហំប៉ុនរថយន្ត នៅចម្ងាយប្រហែល ៣ គីឡូម៉ែត្រពីលំនៅឋានរបស់ក្រុមហ៊ុន Agro Bukit។ លុះមកដល់ព្រឹកថ្ងៃទី ២០ ខែតុលា បំណែកទីពីរដែលមានរាងមូល ក៏ត្រូវបានគេរកឃើញបន្ថែមនៅចម្ងាយប្រហែល ១ គីឡូម៉ែត្រពីទីតាំងទីមួយ។

យោងតាមទីភ្នាក់ងារជាតិសម្រាប់ការស្រាវជ្រាវ និងនវានុវត្តន៍របស់ឥណ្ឌូនេស៊ី (BRIN) បានឱ្យដឹងថា បំណែកទាំងនោះទំនងជាសមាសភាគធន់នឹងកម្ដៅដែលមិនបានឆេះអស់ របស់រ៉ុក្កែតចិនប្រភេទ Zhuque-2E ដែលប្រទេសចិនបានបាញ់បង្ហោះផ្កាយរណបចំនួន ១០ គ្រឿងទៅកាន់ទីអវកាសកាលពីសប្តាហ៍មុន។ អ្នកនាំពាក្យផ្នែកអាកាសចរស៊ីវិលឥណ្ឌូនេស៊ី លោក Zachrudien និងអាជ្ញាធរប៉ូលិសក្នុងស្រុកបានបញ្ជាក់ថា សំណាងល្អដែលហេតុការណ៍ធ្លាក់បំណែកអវកាសនេះ មិនបានបណ្តាលឱ្យមានមនុស្សរងគ្រោះថ្នាក់ ឬខូចខាតទ្រព្យសម្បត្តិឡើយ ហើយវត្ថុទាំងនោះក៏ពុំមានផ្ទុកសារធាតុវិទ្យុសកម្ម ឬជាតិពុលនោះដែរ។ បច្ចុប្បន្ន បំណែកដែលប្រមូលបានទាំងពីរត្រូវបានបញ្ជូនទៅកាន់មូលដ្ឋានទ័ពអាកាសក្បែរនោះដើម្បីធ្វើការពិនិត្យ និងផ្ទៀងផ្ទាត់៕