ភ្នំពេញ៖ យុវជនកម្ពុជា ៦នាក់បានចូលរួមនៅក្នុងកិច្ចសន្ទនានៅក្នុង The Third China-Cambodia-Thailand Track II Dialogue ជាមួយប្រតិភូតំណាងកម្ពុជា ដែលមានដូចជា សាស្ត្រាចារ្យ អ្នកស្រាវជ្រាវ និងអ្នកជំនាញផ្នែកគោលនយោបាយ នៅទីក្រុងសិនជិន ប្រទេសចិន នៅថ្ងៃទី១១ និងទី១២ ខែតុលា ឆ្នាំ២០២៦។
កិច្ចសន្ទនាមួយនេះ ត្រូវបានរៀបចំឡើងដោយដោយសាកលវិទ្យាល័យកិច្ចការបរទេសចិន (China Foreign Affairs University – CFAU) ដែលមានប្រតិភូចូលរួមសរុបប្រមាណ ៩០នាក់ មកពីប្រទេសចិន កម្ពុជា និងថៃ។ ជាមួយគ្នា កិច្ចសន្ទនា គឺផ្តោតលើទស្សនៈវិស័យនាពេលអនាគត និងការពង្រឹងសន្តិភាពយូរអង្វែង និងការកសាងទំនុកចិត្តរវាងកម្ពុជានឹងថៃ ។ កិច្ចសន្ទនាលើកទី៣នេះ គឺបន្តពីកិច្ចព្រមព្រៀងរួម ៥ចំណុច ដែលសម្រេចបានដោយរដ្ឋមន្ត្រីការបរទេសចិន កម្ពុជា និងថៃ នៅបឹងហ្វូសៀន ខេត្តយូណាន ប្រទេសចិន កាលពីខែធ្នូ ឆ្នាំ២០២៥ ព្រមទាំងកិច្ចសន្ទនា Track II លើកទី១ និងលើកទី២ ដែលបានប្រព្រឹត្តទៅនៅទីក្រុងប៉េកាំង កាលពីខែកុម្ភៈ និងខែមេសា ឆ្នាំ២០២៦។
ទន្ទឹមគ្នា យុវជនកម្ពុជាទាំង ៦រូបដែលចូលរួមនៅក្នុងកម្មវិធីរួមមាន លោក ទង សុវណ្ណវីតា, លោក ផេង ធាន, លោក ឡុងសុវិទូ, កញ្ញា ទ្រី លីគៀង, កញ្ញា ហ៊ុន មុនីរ័ត្ន, និងកញ្ញា គង់ ជាមុនីរ័តន៍។
យុវជន ទង សុវណ្ណវីតា បានប្រាប់មកកាន់ ស៊ីស៊ីថាមស៍ថា ការចូលរួមនៅក្នុងវេទិកាសន្ទនានេះ ធ្វើឱ្យគាត់ចាប់អារម្មណ៍ខ្លាំងទៅលើទស្សនៈ និងការគិត ពីយុវជនដទៃទៀត ជាពិសេសភាគីខាងថៃ។ ថ្វីត្បិតតែប្រតិភូមកពីប្រទេសផ្សេងគ្នា ប៉ុន្តែគោលដៅរួមមួយ គឺចង់ឃើញសន្តិភាព ឱកាសទទួលបានការអប់រំ និងជីវភាពរស់នៅកាន់តែប្រសើរសម្រាប់ប្រជាជននៅតាមតំបន់ព្រំដែន។ បន្ថែមពីនេះ នៅក្នុងបទបង្ហាញស្តីពីការពង្រឹងទំនាក់ទំនងរវាងប្រជាជន និងការផ្លាស់ប្តូរវប្បធម៌ គាត់ក៏បានលើកយក សុភាសិតខ្មែរមួយថា «ចង្កឹះមួយបាច់ កាច់មិនបាក់» ដើម្បីរំលេចពីសារៈសំខាន់នៃសាមគ្គីភាព ព្រោះនៅពេលដែលកម្ពុជា ថៃ និងចិន រួមដៃសហការគ្នា ប្រទេសទាំងបីនឹងកាន់តែរឹងមាំ និងអាចជួយគ្នាដោះស្រាយបញ្ហាប្រឈមនានាបានកាន់តែប្រសើរ។ យុវជនរូបនេះ យល់ឃើញថា កិច្ចសន្ទនានេះបានបង្ហាញឱ្យឃើញពីការអនុវត្តជាក់ស្តែងនូវស្មារតីនៃគំនិតផ្តួចផ្តើមអរិយធម៌សកល (Global Civilization Initiative) ដែលលើកកម្ពស់ការគោរពភាពចម្រុះនៃអរិយធម៌ និងការពង្រឹងទំនាក់ទំនងរវាងប្រជាជន ហើយគាត់សង្ឃឹមថា មិត្តភាព និងទំនាក់ទំនងដែលយើងកសាងឡើងក្នុងវេទិកានេះ នឹងបន្តរីកចម្រើន ហើយយុវជនកម្ពុជា ថៃ និងចិន នឹងមានឱកាសសហការគ្នាកាន់តែច្រើននាពេលអនាគត។ ជាចុងក្រោយ គាត់បានបង្ហាញក្តីកោតសរសើរចំពោះ ប្រទេសចិន ដែលបានជួយជំរុញឱ្យមានជំនួប និងការផ្លាស់ប្តូរយោបល់រវាងយុវជននៃប្រទេសទាំងបីផងដែរ។
ចំណែកកញ្ញា ទ្រី លីគៀង ក៏បានបន្ថែមថា “ខ្ញុំមានអារម្មណ៍ថា កិច្ចសន្ទនារឿងជាច្រើនដែលខ្ញុំមិននឹកស្មានដល់។ខ្ញុំចាប់អារម្មណ៍ជាងគេ គឺអ្នកចូលរួមគ្រប់រូបមានការយោគយល់គ្នា និងបើកចិត្តស្តាប់មតិរបស់គ្នាទៅវិញទៅមក។ ជាពិសេស ខ្ញុំពិតជាកោតសរសើរយុវជនថៃ ដែលមានចំណេះដឹង និងអាចបង្ហាញទស្សនៈរបស់ខ្លួនបានយ៉ាងច្បាស់លាស់សមហេតុសមផល ក្នុងការពិភាក្សា”។ កញ្ញាបន្ត ដោយរៀបរាប់ពីបទពិសោធន៍ដែលចូលរួមកិច្ចសន្ទនា ថាពិតជាមានតម្លៃ បើទោះបីជាកិច្ចសន្ទនាបែបនេះមិនមែនជាការពិភាក្សានៅកម្រិតថ្នាក់ដឹកនាំក៏ដោយ ក៏នៅតែមានសារៈសំខាន់ដែរ ព្រោះវាជាឱកាសឱ្យភាគីនីមួយៗជួបគ្នា និយាយគ្នា ចែករំលែកគំនិត និងស្តាប់មតិពីភាគីផ្សេងៗ អាចជួយឱ្យយល់ពីគ្នាកាន់តែច្បាស់ និងបង្កើតទំនុកចិត្តរវាងគ្នាបាន។កញ្ញាពិតជាសប្បាយចិត្តដែលបានចូលរួមក្នុងកិច្ចសន្ទនានេះ និងបានរៀនសូត្រអ្វីថ្មីៗ ស្គាល់ទស្សនៈផ្សេងៗ និងទទួលបានអនុស្សាវរីយ៍ល្អៗជាច្រើន។
គួរបញ្ជាក់ថា កិច្ចសន្ទនានេះបានបញ្ចប់ដោយមានការឯកភាពលើអនុសាសន៍ពីភាគីទាំងអស់ ដែលឆ្លុះបញ្ចាំងពីការប្តេជ្ញាចិត្តរួមក្នុងការលើកកម្ពស់កិច្ចសន្ទនា ការយោគយល់គ្នាទៅវិញទៅមក និងការកសាងសន្តិភាពយូរអង្វែង។នៅក្នុងការផ្លាស់ប្តូរយុវជន តំណាងយុវជនមកពីកម្ពុជា និងថៃ បានឯកភាពគ្នាលើគំនិតផ្តួចផ្តើមមួយដែលផ្តោតលើយុវជនជាស្នូល។ គំនិតផ្តួចផ្តើមនេះលើកឡើងពីតួនាទីរបស់យុវជនក្នុងនាមជាអ្នកភ្ជាប់ទំនាក់ទំនងរវាងប្រជាជននៃប្រទេសទាំងពីរ អ្នករួមចំណែកក្នុងការកសាងសន្តិភាព អ្នកគាំទ្រសហគមន៍តាមតំបន់ព្រំដែន និងជាសំឡេងក្នុងកិច្ចសហប្រតិបត្តិការក្នុងតំបន់។ ជាមួយគ្នានេះ ក៏បានអំពាវនាវឱ្យបន្តជំរុញការផ្លាស់ប្តូរយុវជនរវាងប្រទេសទាំងបីផងដែរ៕
