អានហ៊ួយ៖ និស្សិតអាហារូបករណ៍ អ.ម.ត នៃសាកលវិទ្យាល័យ Anhui Jianzhu បានបង្ហាញអំពីប្រវត្តិសាស្ត្រ វប្បធម៌ ប្រពៃណី និងទំនៀមទម្លាប់ដ៏ថ្លៃថ្លារបស់ជាតិ ក្នុង«កម្មវិធីផ្លាស់ប្តូរវប្បធម៌កម្ពុជា-ចិន» ដែលបានស្តែងចេញពីតួនាទីជា «ទូតសុឆន្ទៈវប្បធម៌» លើកកម្ពស់អត្តសញ្ញាណជាតិ លើឆាកអន្តរជាតិ។
បើតាមបណ្តាញសង្គមផ្លូវការរបស់សមាគមសិស្ស-និស្សិតអាហារូបករណ៍ អ.ម.ត បានបង្ហាញថា កាលពីថ្ងៃទី១០ ខែតុលា ឆ្នាំ២០២៦ និស្សិតអាហារូបករណ៍ អ.ម.ត ដែលកំពុងសិក្សានៅសាកលវិទ្យាល័យ Anhui Jianzhu University ខេត្តអានហ៊ួយ សាធារណរដ្ឋប្រជាមានិតចិន បានរួមគ្នារៀបចំ និងចូលរួមយ៉ាងសកម្មក្នុង «កម្មវិធីផ្លាស់ប្តូរវប្បធម៌កម្ពុជា-ចិន»។
ក្នុងឱកាសនេះ និស្សិត អ.ម.ត បានបង្ហាញអំពីប្រវត្តិសាស្ត្រ វប្បធម៌ ប្រពៃណី និងទំនៀមទម្លាប់ដ៏ថ្លៃថ្លារបស់ជាតិ ព្រមទាំងបានកែច្នៃការបង្ហាញម៉ូដសម្លៀកបំពាក់ប្រពៃណី អរិយធម៌នៃការរស់នៅ និងសក្តានុពលទេសចរណ៍ដ៏សម្បូរបែបរបស់កម្ពុជា ជូនដល់ថ្នាក់ដឹកនាំ គណៈគ្រប់គ្រង សាស្ត្រាចារ្យ និងនិស្សិតអន្តរជាតិបានជ្រួតជ្រាប និងយល់ដឹងកាន់តែស៊ីជម្រៅ។
សកម្មភាពប្រកបដោយភាពច្នៃប្រឌិត និងមោទនភាពនេះ គឺជាសក្ខីភាពស្តែងចេញពីតួនាទីជា «ទូតសុឆន្ទៈវប្បធម៌» របស់យុវជនជ័យលាភី អ.ម.ត ក្នុងការលើកកម្ពស់កិត្យានុភាព អត្តសញ្ញាណជាតិ និងការរឹតចំណងមិត្តភាព ព្រមទាំងកិច្ចសហប្រតិបត្តិការរវាងប្រជាជន និងប្រជាជននៅលើឆាកអន្តរជាតិ ស្របតាមចក្ខុវិស័យយុទ្ធសាស្ត្រនៃការអភិវឌ្ឍ «មូលធនមនុស្ស» និងការទូតវប្បធម៌៕
