បាញ់ប្រហារនៅសាលាបឋមសិក្សាក្នុងរដ្ឋអូរីហ្គិន សម្លាប់មនុស្ស ៤នាក់ និងរបួស ២ នាក់

អាម៉េរិក៖ ការបាញ់ប្រហារដ៏រន្ធត់ និងសោកសៅមួយបានកើតឡើងនៅសាលាបឋមសិក្សា Silver Rail ស្ថិតក្នុងទីក្រុង Bend រដ្ឋ Oregon សហរដ្ឋអាម៉េរិក កាលពីរសៀលថ្ងៃព្រហស្បតិ៍ ដោយបានផ្តាច់ជីវិតមនុស្ស ៤ នាក់ ក្នុងនោះមានកុមារតូចៗចំនួន ៣ នាក់ (អាយុ ៥ ឆ្នាំ, ៨ ឆ្នាំ និង ១១ ឆ្នាំ) និងគ្រូបង្រៀនម្នាក់។ អាជ្ញាធរបានបញ្ជាក់ថា កុមារអាយុ ៧ ឆ្នាំម្នាក់ និងគ្រូបង្រៀនម្នាក់ទៀតបានរងរបួស ហើយត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យភ្លាមៗ។

យោងតាមការលើកឡើងរបស់លោក Mike Krantz ប្រធាននាយកដ្ឋានប៉ូលីសទីក្រុង Bend នៅក្នុងសន្និសីទសារព័ត៌មាន បានឱ្យដឹងថា ខ្មាន់កាំភ្លើងគឺជាយុវជនអាយុ ១៦ ឆ្នាំម្នាក់រស់នៅក្នុងទីក្រុង Bend។ រូបគេបានប្រដាប់ដោយកាំភ្លើងវែងមួយដើម ហើយបានបង្ខំចិត្តចូលទៅក្នុងសាលារៀននៅវេលាម៉ោងប្រហែល ១ រសៀល ដោយបាញ់ប្រហារទៅលើទ្វារដែលចាក់សោ។ មុនពេលចូលទៅក្នុងសាលា ប៉ូលីសបានទទួលការហៅទូរស័ព្ទអាសន្ន (911) ដំបូងដែលរាយការណ៍ថា មានបុរសមិនស្គាល់អត្តសញ្ញាណម្នាក់បានបាញ់ប្រហារទៅលើរថយន្តមួយគ្រឿងនៅខាងក្រៅ។

លោកបន្ថែមទៀតថា សោកនាដកម្មនេះត្រូវបានបញ្ឈប់ បន្ទាប់ពីសមាជិកសហគមន៍ម្នាក់ដែលបានឃើញហេតុការណ៍ បានដើរតាមខ្មាន់កាំភ្លើងចូលទៅក្នុងសាលា ហើយបានបាញ់សម្លាប់រូបគេនៅនឹងកន្លែង មុនពេលកម្លាំងប៉ូលីសមកដល់។ ភ្លាមៗបន្ទាប់ពីកើតហេតុ សាលាបឋមសិក្សា Silver Rail ត្រូវបានដាក់ឱ្យស្ថិតក្នុងស្ថានភាពបិទទ្វារអាសន្ន (Lockdown) ខណៈអាជ្ញាធរប៉ូលីសបានបង្កើតទីតាំងជួបជុំថ្មីបណ្តោះអាសន្ននៅព្រះវិហារ Journey ដែលនៅជិតនោះ ដើម្បីឱ្យឪពុកម្តាយ និងអាណាព្យាបាលមកជួបជុំកូនៗរបស់ពួកគេ។

បច្ចុប្បន្ន អាជ្ញាធរប៉ូលីសទីក្រុង Bend សហការជាមួយភ្នាក់ងារ FBI កំពុងធ្វើការស៊ើបអង្កេតយ៉ាងយកចិត្តទុកដាក់ ដើម្បីស្វែងរកមូលហេតុ និងស្វែងយល់ថាតើខ្មាន់កាំភ្លើងរូបនេះមានទំនាក់ទំនងអ្វីជាមួយសាលារៀនដែរឬទេ។ ព្រឹត្តិការណ៍នេះបានបង្កឱ្យមានការតក់ស្លុតយ៉ាងខ្លាំងដល់សហគមន៍ទីក្រុង Bend ដែលជាទីក្រុងមួយធ្លាប់តែទទួលបានការកោតសរសើរថាជាកន្លែងមានសុវត្ថិភាពខ្ពស់ និងសមរម្យសម្រាប់គ្រួសាររស់នៅ៕