ក្រុមហ៊ុនរថយន្ត Volkswagen ប្រកាសប្រមូលរថយន្តមកវិញ ២២,៥២៤ គ្រឿង ក្រោយសាកថ្មឡើងកំដៅ

អាល្លឺម៉ង់៖ ក្រុមហ៊ុនរថយន្ត Volkswagen កំពុងធ្វើការប្រមូលត្រឡប់មកវិញនូវរថយន្តប្រភេទ Crossover ម៉ូដែល ID.4 សរុបចំនួន ២២,៥២៤ គ្រឿង នៅក្នុងសហរដ្ឋអាម៉េរិក បន្ទាប់ពីរកឃើញថាថ្មដែលមានតង់ស្យុងខ្ពស់មួយចំនួនអាចនឹងឡើងកម្ដៅខ្លាំង និងបង្កហានិភ័យនៃការឆេះក្នុងអំឡុងពេលសាកថ្ម ខណៈដែលមូលហេតុចម្បងនៃបញ្ហានេះនៅមិនទាន់ត្រូវបានរកឃើញនៅឡើយទេ។ រថយន្តដែលរងផលប៉ះពាល់គឺស្ថិតក្នុងម៉ូដែលឆ្នាំ ២០២៣ ដល់ ២០២៦ ដែលបានផលិតចន្លោះថ្ងៃទី ១ ខែមករា ឆ្នាំ ២០២៣ និងថ្ងៃទី ១ ខែកុម្ភៈ ឆ្នាំ ២០២៥ ដែលពាក់ព័ន្ធនឹងកញ្ចប់ថ្មផលិតដោយក្រុមហ៊ុន SK Battery America ដោយមានរបាយការណ៍កើតឡើងជាង ២០ ករណីរួចមកហើយតាំងពីចុងឆ្នាំ ២០២៤ មក។

ក្រុមហ៊ុន Volkswagen បានណែនាំឱ្យម្ចាស់រថយន្តទាំងអស់បញ្ឈប់ការសាកថ្មលើសពីកម្រិត ៨០ ភាគរយ ដោយក្រុមហ៊ុននឹងធ្វើបច្ចុប្បន្នភាពកម្មវិធីតាមប្រព័ន្ធអ៊ីនធឺណិត (over-the-air software update) ដើម្បីកំណត់កម្រិតសាកថ្មនេះដោយស្វ័យប្រវត្តិ ឬផ្តល់ជូននូវស្ទីគ័រព្រមានសម្រាប់រថយន្តដែលមិនអាចអាប់ដេតបាន។ ទន្ទឹមនឹងនេះ ម្ចាស់រថយន្តនៅតែអាចបើកបរបានធម្មតា ប៉ុន្តែត្រូវរក្សាកម្រិតថ្មឱ្យនៅត្រឹម ឬក្រោម ៨០ ភាគរយ និងរង់ចាំលិខិតជូនដំណឹងជាផ្លូវការពីក្រុមហ៊ុនដែលគ្រោងនឹងផ្ញើជូននៅចុងខែវិច្ឆិកា ឬដើមខែធ្នូ ឆ្នាំ ២០២៦ ខាងមុខនេះ៕