UNICEF៖ កុមារ ១,៣ លាននាក់ នៅកម្ពុជា ប្រឈមនឹងហានិភ័យអាកាសធាតុបង្កដោយបាតុភូត El Niño (អែលនីញ៉ូ)

ភ្នំពេញ៖ អង្គការ UNICEF នៅកម្ពុជា បានលើកឡើងថា កុមារ ១,៣ លាននាក់ នៅកម្ពុជា ប្រឈមនឹងហានិភ័យអាកាសធាតុបង្កដោយបាតុភូត El Niño (អែលនីញ៉ូ)។ បាតុភូតនេះអាចធ្វើឱ្យខ្វះខាតទឹកប្រើប្រាស់ប្រចាំថ្ងៃ និងទឹកសម្រាប់បង្កបង្កើនផល ដែលបង្កើតសម្ពាធលើប្រាក់ចំណូលគ្រួសារ ព្រមទាំងបង្ករការរំខានដល់ការសិក្សា និងសេវាសុខាភិបាល។

ក្នុងខ្លឹមសាររបស់អង្គការ UNICEF បានលើកឡើងថា បាតុភូត El Niño (អែលនីញ៉ូ) ឆ្នាំ២០២៦-២០២៧ ត្រូវបានព្យាករណ៍ថានឹងមានឥទ្ធិពលខ្លាំងក្លារជាងឆ្នាំរាល់ដង។ កុមារជាង ៣៤៧ លាននាក់នៅតាមបណ្តាប្រទេសជិត ១០០ ទូទាំងពិភពលោក ត្រូវបានគេរំពឹងថានឹងប្រឈមមុខនឹងស្ថានភាពធាតុអាកាសស្ងួតហួតហែង ឬសើមខុសពីធម្មតា។ ដោយឡែកសម្រាប់ប្រទេសកម្ពុជា កុមារប្រមាណ ១,៣ លាននាក់នៅកម្ពុជា ប្រឈមនឹងហានិភ័យបម្រែបម្រួលអាកាសធាតុបង្កដោយ បាតុភូត El Niño។

សម្រាប់គ្រួសារនីមួយៗ បាតុភូតនេះអាចធ្វើឱ្យខ្វះខាតទឹកប្រើប្រាស់ប្រចាំថ្ងៃ និងទឹកសម្រាប់បង្កបង្កើនផល ដែលបង្កើតសម្ពាធលើប្រាក់ចំណូលគ្រួសារ ព្រមទាំងបង្ករការរំខានដល់ការសិក្សា និងសេវាសុខាភិបាលផងដែរ។ តាមការវាយតម្លៃចុងក្រោយបានបង្ហាញថា សាលារៀនជាង ៣.៨៧២ ខ្នង និងមណ្ឌលសុខភាពចំនួន ៤០១ កន្លែង (ត្រូវជាប្រមាណមួយភាគបីនៃសាលារៀន និងមណ្ឌលសុខភាពទាំងអស់នៅទូទាំងប្រទេស) កំពុងស្ថិតក្នុងហានិភ័យនៃការរងគ្រោះដោយគ្រោះធម្មជាតិរួមមានគ្រោះរាំងស្ងួតធ្ងន់ធ្ងរ ទឹកជំនន់ និងគ្រោះធម្មជាតិផ្សេងទៀត។

គួរបញ្ជាក់ថា El Niño គឺជាបាតុភូតអាកាសធាតុធម្មជាតិមួយដែលកើតឡើងដោយសារសីតុណ្ហភាពផ្ទៃសមុទ្រប៉ាស៊ីហ្វិកកើនឡើងក្តៅជាងធម្មតា។ បាតុភូតនេះបង្កឱ្យមានការប្រែប្រួលរបបទឹកភ្លៀង និងសីតុណ្ហភាពនៅទូទាំងពិភពលោក ដែលបណ្តាលឲ្យតំបន់ខ្លះជួបវិបត្តិគ្រោះរាំងស្ងួត និងការកើនឡើងកម្ដៅខ្លាំង ខណៈតំបន់ខ្លះទៀតជួបប្រទះការធ្លាក់ភ្លៀងគំហុក និងគ្រោះទឹកជំនន់។ ការប្រែប្រួលអាកាសធាតុដ៏ធ្ងន់ធ្ងរទាំងនេះ អាចប៉ះពាល់យ៉ាងខ្លាំងដល់ប្រភពទឹក ស្បៀងអាហារ ជីវភាពរស់នៅ និងសេវាចាំបាច់នានាដែលកុមារត្រូវការពឹងផ្អែកជាប្រចាំ៕