កម្ពុជា ជាប់ឈ្មោះក្នុងបញ្ជី «ប្រទេសល្អបំផុតទាំង ២០ លើលោក» របស់ទស្សនាវដ្តី Condé Nast Traveller

ក្រុងឡុងដ៍៖ ប្រទេសកម្ពុជា រួមជាមួយឥណ្ឌូណេស៊ី ថៃ និងវៀតណាម បានបង្ហាញវត្តមាននៅក្នុងបញ្ជីឈ្មោះ «ប្រទេសល្អបំផុតទាំង ២០ លើពិភពលោក» សម្រាប់ទេសចរ ផ្អែកតាមការបោះឆ្នោតពានរង្វាន់ Readers' Choice Awards របស់ទស្សនាវដ្តីទេសចរណ៍ដ៏ល្បីល្បាញរបស់អង់គ្លេស Condé Nast Traveller ដែលមានការចូលរួមបោះឆ្នោតពីអ្នកអានជាង ៨០០,០០០ នាក់។

នៅក្នុងបញ្ជីពិភពលោកនេះ កម្ពុជាទទួលបានចំណាត់ថ្នាក់លេខ ១៦។ ទស្សនាវដ្តី Condé Nast Traveller បានគូសបញ្ជាក់ថា សក្តានុពលទេសចរណ៍កម្ពុជាមិនត្រឹមតែមានប្រាសាទអង្គរវត្តដ៏ល្បីល្បាញប៉ុណ្ណោះទេ ប៉ុន្តែថែមទាំងលេចធ្លោតាមរយៈភាពរវើកនៃទីផ្សារក្នុងរាជធានីភ្នំពេញ, ធម្មជាតិដ៏ស្ងប់ស្ងាត់នៃជួរភ្នំក្រវាញ និងឆ្នេរសមុទ្រដ៏ស្រស់ស្អាត ជាពិសេសក្នុងអំឡុងរដូវប្រាំងចាប់ពីខែវិច្ឆិកា ដល់ខែមេសា។

គួរបញ្ជាក់ថា នៅក្នុងការវាយតម្លៃអន្តរជាតិនេះ ប្រទេសក្រិក បានជាប់ចំណាត់ថ្នាក់លេខ ១ ជាប្រទេសល្អបំផុតលើពិភពលោកសម្រាប់ទេសចរ តាមពីក្រោយដោយជប៉ុន (លេខ ២) និងអ៊ីតាលី (លេខ ៣)។ ដោយឡែកនៅក្នុងតំបន់អាស៊ីអាគ្នេយ៍ ប្រទេសឥណ្ឌូណេស៊ីទទួលបានចំណាត់ថ្នាក់ខ្ពស់ជាងគេគឺលេខ ៨ តាមពីក្រោយដោយប្រទេសថៃ (លេខ ១០) និងវៀតណាម (លេខ ១៤)៕