សៀមរាប៖ យុវតី តាំង នីតា គឺជាសិស្សឆ្នើមដែលបានប្រឡងជាប់សញ្ញាបត្រមធ្យមសិក្សាទុតិយភូមិ (បាក់ឌុប) ទទួលបាននិទ្ទេស A គ្រប់មុខវិជ្ជា ក្នុងឆ្នាំ២០២៦ មកពីខេត្តកំពង់ធំ។រូបគេបានប្រមូលថវិកាដែលទទួលបានពីកាដូលើកទឹកចិត្តប្រមាណ ១១,០០០,០០០ រៀល ទៅបរិច្ចាគជូនដល់មន្ទីរពេទ្យជ័យវរ្ម័នទី៧ (គន្ធបុប្ផាសៀមរាប) ដើម្បីជួយសង្គ្រោះកុមាក្រីក្រ។
មន្ទីរពេទ្យជ័យវរ្ម័នទី៧ (គន្ធបុប្ផាសៀមរាប) បានសម្តែងពីមោទនភាពក្រៃលែង ចំពោះយុវតីនិទ្ទេស A តាំង នីតា ដែលមិនត្រឹមតែជាសិស្សពូកែ មានប្រាជ្ញាឈ្លាសវៃ និងខិតខំតស៊ូ ក្នុងការសិក្សារហូតទទួលបានលទ្ធផលដ៏ត្រចះត្រចង់ប៉ុណ្ណោះទេ ថែមទាំងមានបេះដូងមនុស្សធម៌ទូលំទូលាយ ចេះជួយចែករំលែកក្តីស្រឡាញ់ ដល់កុមារកម្ពុជាដែលកំពុងត្រូវការ ការព្យាបាល។
មន្ទីរពេទ្យ បានចាត់ទុកសកម្មភាពដ៏ប្រពៃរបស់យុវតីនិទ្ទេស A តាំង នីតា គឺជាគំរូដ៏ល្អ និងគួរឱ្យស្ងើចសរសើរបំផុត សម្រាប់យុវជនជំនាន់ក្រោយ និងបានលើកទឹកចិត្តប្អូនស្រីបន្តខិតខំប្រឹងប្រែងរៀនសូត្រ ដើម្បីសម្រេចបាននូវរាល់ក្តីស្រមៃ និងក្លាយជាទំពាំងស្នងឫស្សីដ៏រឹងមាំ ក្នុងការអភិវឌ្ឍប្រទេសជាតិ៕
