វៀតណាម ដាក់គោលដៅទាក់ទាញ«ទេសចរមូស្លីម»ដល់២ពាន់លាននាក់ មកលេងប្រទេសខ្លួន តាមរយៈស្លាកសញ្ញាអាហារ “ហាឡាល់” (Halal)

គូឡាឡាំពួ៖ ប្រទេសវៀតណាមកំពុងស្វះស្វែងយ៉ាងខ្លាំង ក្នុងការទទួលបានវិញ្ញាបនបត្រស្ដង់ដារ «ហាឡាល» (Halal) លើផលិតផលចំណីអាហារ និងសេវាកម្មរបស់ខ្លួន ដើម្បីទាក់ទាញភ្ញៀវទេសចរមូស្លីមឱ្យបានដល់ ២ពាន់លាននាក់ និងពង្រីកការនាំចេញទៅកាន់ទីផ្សារឥស្លាម។ បច្ចុប្បន្ន ការនាំចេញរបស់វៀតណាមទៅកាន់ប្រទេសម៉ាឡេស៊ីនៅមានកម្រិត (មានទំហំ ៥.៣៣ ពាន់លានដុល្លារ ធៀបនឹងការនាំចូល ១១ ពាន់លានដុល្លារក្នុងឆ្នាំ២០២៥) ដោយសារកង្វះខាតស្ដង់ដារហាឡាល់ ប៉ុន្តែមន្ត្រីពាណិជ្ជកម្មវៀតណាមលោក Phung Van Thanh បានគូសបញ្ជាក់ថា នេះជាឱកាសធំធេងណាស់ ព្រោះផលិតផលកសិកម្មរុក្ខជាតិរបស់វៀតណាមជាង ៨០% គឺស្របតាមគោលការណ៍គ្រឹះនៃអាហារហាឡាលរួចជាស្រេច (គ្មានជាតិស្រវឹង និងគ្មានជាតិជ្រូក)។នេះបើយោងតាមការចេញផ្សាយរបស់កាសែតTuoi Tre News។

ថ្លែងក្នុងព្រឹត្តិការណ៍ពិព័រណ៍អាហារហាឡាលអន្តរជាតិ (MIHAS 2026) នៅម៉ាឡេស៊ី តំណាងអាជីវកម្មវៀតណាមនៅម៉ាឡេស៊ី លោកស្រី Tran Thi Xuyen បានបញ្ជាក់ថា ការសុំវិញ្ញាបនបត្រហាឡាល់មិនស្មុគស្មាញ ឬអស់លុយច្រើនដូចការគិតនោះទេ ដោយចំណាយដើមទុនត្រឹមតែ ១,០០០ ទៅ ១,២០០ ដុល្លារប៉ុណ្ណោះ ប៉ុន្តែវាជា «សំបុត្រមាស» បើកទ្វារទៅកាន់ទីផ្សារអ្នកប្រើប្រាស់មូស្លីមជិត ២ ប៊ីលាននាក់នៅលើពិភពលោក។

លោកស្រីបានគូសបញ្ជាក់ថា ប្រសិនបើអាជីវកម្មវៀតណាមចាប់យកឱកាសនេះបានច្រើន ពាណិជ្ជកម្មរវាងវៀតណាម និងម៉ាឡេស៊ី អាចកើនឡើងដល់ ២៥ ពាន់លានដុល្លារក្នុងមួយឆ្នាំ។ គួរបញ្ជាក់ថាព្រឹត្តិការណ៍ពិព័រណ៍អាហារហាឡាល់អន្តរជាតិ (MIHAS 2026) នៅម៉ាឡេស៊ី ដែលទើបបញ្ចប់កាលពីថ្ងៃទី២៦ ខែកញ្ញា ឆ្នាំ២០២៦ កន្លងទៅ អាចបង្កើតការលក់បានរហូតដល់ ១.៦៦ ប៊ីលានដុល្លារអាម៉េរិក បង្ហាញយ៉ាងច្បាស់ពីទំហំសេដ្ឋកិច្ចដ៏មហិមានៃទីផ្សារមូស្លីមនាពេលបច្ចុប្បន្ន៕