ភ្នំពេញ៖ យុវជន៣ក្រុម ដែលមានឈ្មោះថា Peeko, Jormnong-ចំណង និង Sokhapheap Digital ទទួលបានជ័យលាភីក្នុងកម្មវិធី ITM Innovation Hackathon 2026 ក្រោយបង្កើតគម្រោងកម្មវិធីឌីជីថលជួយដោះស្រាយបញ្ហាក្នុងសង្គម។ យុវជនទាំង៣ក្រុម ទទួលបានការបណ្តុះបណ្តាលពីគ្រូបង្គោល និងបទពិសោធន៍ជាក់ស្តែង ទម្រាំអាចអភិវឌ្ឍគម្រោងកម្មវិធីឌីជីថល ជួយដោះស្រាយបញ្ហាដែលកំពុងកើតមាននៅក្នុងសង្គម។
ក្នុងកម្មវិធី ITM Innovation Hackathon 2026 យុវជនក្រុម Peeko ទទួលបានជ័យលាភីលេខ១។ Peeko បានបង្កើត APP ស្វែងរកទីតាំង និងព័ត៌មានជាក់ស្តែង ដែលអនុញ្ញាតឱ្យអ្នកប្រើប្រាស់ ស្វែងរកភោជនីយដ្ឋាន ហាងកាហ្វេ និងកន្លែងកម្សាន្តនៅជិតខ្លួន ហើយពិនិត្យស្ថានភាពរបស់កន្លែងនោះមុនពេលធ្វើដំណើរ។ តាមរយៈការសហការជាមួយអាជីវកម្មក្នុងស្រុក និងប្រព័ន្ធកាមេរ៉ាស្វ័យប្រវត្តិ វេទិកានឹងផ្តល់ព័ត៌មានដូចជា ស្ថានភាពកន្លែងចត កម្រិតមនុស្ស កន្លែងអង្គុយ និងពេលវេលាអាប់ដេតចុងក្រោយ ដូចជា «បានធ្វើបច្ចុប្បន្នភាពកាលពី ២ នាទីមុន» ដោយមិនចាំបាច់ពឹងផ្អែកលើការធ្វើបច្ចុប្បន្នភាពដោយដៃពីអាជីវកម្ម។ជាមួយគ្នានេះ អ្នកប្រើប្រាស់អាចមើល អាកាសធាតុ ចម្ងាយ និងពេលវេលាធ្វើដំណើរ ប្រូម៉ូសិន ការវាយតម្លៃ និងរូបភាព ដើម្បីប្រៀបធៀបជម្រើស និងជ្រើសរើសកន្លែងដែលសមស្របបំផុត មុនពេលចេញដំណើរ។
ក្រុម Jormnong-ចំណង ទទួលបានលេខ២ ដោយបានបង្កើតជាកម្មវិធីសម្រាប់ការរៀនសូត្រពីមិត្តភក្តិ ដែលភ្ជាប់សិស្សថ្នាក់ទី១០ ដល់ទី១២ ជាមួយនិស្សិតសាកលវិទ្យាល័យដែលមានការផ្ទៀងផ្ទាត់អត្តសញ្ញាណ ស្របតាមមុខវិជ្ជា ជំនាញ និងតម្រូវការរបស់សិស្ស។និស្សិតសាកលវិទ្យាល័យអាចបង្កើតប្រវត្តិរូប បង្ហាញពីជំនាញ និងបទពិសោធន៍ កំណត់ពេលវេលា និងតម្លៃសម្រាប់ការផ្តល់ការណែនាំ ព្រមទាំងចែករំលែកចំណេះដឹង និងបទពិសោធន៍ជាក់ស្តែងតាមរយៈការជួបប្រជុំតាមអនឡាញ។ តាមរយៈនេះ ពួកគេអាចបង្កើតចំណូលពីជំនាញរបស់ខ្លួន និងទទួលបានបទពិសោធន៍ក្នុងការណែនាំអ្នកដទៃ។ សម្រាប់សិស្សវិញ ពួកគេអាចស្វែងរកប្រវត្តិរូប Mentor ផ្សេងៗ ជ្រើសរើស Jormnong Mentor ដែលសមស្រប កក់វគ្គណែនាំតាមអនឡាញ និងទទួលបានការគាំទ្រផ្នែកសិក្សាជាលក្ខណៈមួយទល់មួយ។ ពួកគេក៏អាចទទួលបានការណែនាំជាក់ស្តែងអំពីការជ្រើសរើសជំនាញនៅសាកលវិទ្យាល័យ អាហារូបករណ៍ និងផ្លូវអាជីពពីនិស្សិតដែលមានបទពិសោធន៍ផ្ទាល់។ មុខងារសំខាន់ៗរបស់កម្មវិធីរួមមាន ការចុះឈ្មោះអ្នកប្រើប្រាស់ ប្រវត្តិរូបសិស្ស និង Mentor ប្រព័ន្ធផ្គូផ្គងតាមបុគ្គលិកលក្ខណៈ និងតម្រូវការ ការកក់វគ្គណែនាំ ការផ្ញើសារ ការវាយតម្លៃ និងមតិយោបល់ ព្រមទាំងព័ត៌មានអំពីសាកលវិទ្យាល័យ និងអាហារូបករណ៍។
ចំណែកជ័យលាភីលេខ៣ បានទៅលើក្រុម Sokhapheap Digital ដែលបានបង្កើតកម្មវិធីកំណត់ត្រាសុខភាពឌីជីថលដែលមានសុវត្ថិភាព អាចផ្តល់កន្លែងតែមួយសម្រាប់អ្នកជំងឺក្នុងការរក្សាទុក និងគ្រប់គ្រងព័ត៌មានសុខភាពរបស់ខ្លួន ដូចជា ប្រវត្តិជំងឺ វេជ្ជបញ្ជា លទ្ធផលតេស្តមន្ទីរពិសោធន៍ ប្រវត្តិការចាក់វ៉ាក់សាំង និងរោគវិនិច្ឆ័យពីមុន។ អ្នកជំងឺអាចចូលប្រើព័ត៌មានទាំងនេះបានយ៉ាងងាយស្រួល និងចែករំលែកទៅកាន់វេជ្ជបណ្ឌិត ឬអ្នកផ្តល់សេវាសុខាភិបាលផ្សេងទៀតបានភ្លាមៗ ដោយមានការអនុញ្ញាតពីអ្នកជំងឺ។ វាជួយឱ្យវេជ្ជបណ្ឌិតទទួលបានព័ត៌មានសុខភាពដែលចាំបាច់ និងមានភាពពេញលេញ ដើម្បីជួយក្នុងការផ្តល់ការថែទាំដែលមានប្រសិទ្ធភាព និងបន្តបានល្អប្រសើរ៕
