វេទិកានវានុវត្តន៍ Pujiang ឆ្នាំ២០២៦ របស់ចិន ភ្ជាប់ទំនាក់ទំនងប្រទេសជាង ៥០ ក្នុងកិច្ចសហប្រតិបត្តិការបច្ចេកវិទ្យាសកល

ស៊ាងហៃ៖ វេទិកានវានុវត្តន៍ Pujiang ឆ្នាំ២០២៦ (2026 Pujiang Innovation Forum) ត្រូវបានរៀបចំឡើងយ៉ាងអធិកអធមនៅទីក្រុងស៊ាងហៃ ចាប់ពីថ្ងៃទី១១ ដល់ថ្ងៃទី១៤ ខែកញ្ញា ក្រោមប្រធានបទ «ការចែករំលែកនវានុវត្តន៍ និងការកសាងអនាគត៖ បេសកកម្មនៃសហគមន៍វិទ្យាសាស្ត្រ និងបច្ចេកវិទ្យាសកល» ដោយបានទាក់ទាញអ្នកវិទ្យាសាស្ត្រ អ្នករៀបចំគោលនយោបាយ និងតំណាងឧស្សាហកម្មមកពីជាង ៥០ប្រទេស និងអង្គការអន្តរជាតិជាង ២០។ នៅក្នុងព្រឹត្តិការណ៍រយៈពេល ៤ថ្ងៃនេះ អាហ្វ្រិកខាងត្បូងបានសាងប្រវត្តិសាស្ត្រជាប្រជាជាតិអាហ្វ្រិកដំបូងគេដែលធ្វើជា «ប្រទេសកិត្តិយស» (Country of Honor) ដោយបានដាក់តាំងបង្ហាញគម្រោងជាង ១០ គ្របដណ្តប់លើវិស័យកសិកម្ម វេជ្ជសាស្ត្រ អវកាស និងថាមពលអ៊ីដ្រូសែន។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Science and Technology Daily ។

បើតាម Science and Technology Daily ក្រុងស៊ាងហៃបានឈានដល់កិច្ចព្រមព្រៀងជាប្រវត្តិសាស្ត្រជាមួយអង្គការ UNESCO ដើម្បីបង្កើត «សម្ព័ន្ធទីក្រុងនវានុវត្តន៍សកល» (Global Innovative Cities Alliance) ដើមី្បជំរុញកិច្ចសហប្រតិបត្តិការបច្ចេកវិទ្យាឆ្លងទីក្រុង ព្រមទាំងបានចេញផ្សាយ «បញ្ជីទស្សនាវដ្តីវិទ្យាសាស្ត្រ និងបច្ចេកវិទ្យាថ្នាក់ពិភពលោកឆ្នាំ២០២៥» ដើម្បីលើកកម្ពស់ប្រព័ន្ធអេកូឡូស៊ីសិក្សាស្រាវជ្រាវឱ្យមានសមធម៌។

វេទិកានេះក៏បានដាក់បង្ហាញនូវសមិទ្ធផលបច្ចេកវិទ្យាកម្រិតខ្ពស់ជឿនលឿនជាច្រើន រួមមានគម្រោងហេដ្ឋារចនាសម្ព័ន្ធគណនាក្នុងអវកាស «Pearl Constellation» និងការព្យាបាលជំងឺមហារីក «CAR-T therapy» ព្រមទាំងបានលើកឡើងនូវសំណួរស្រាវជ្រាវគ្រឹះសំខាន់ៗចំនួន ១០ ទាក់ទងនឹងបញ្ញាសិប្បនិម្មិត (AI) វិទ្យាសាស្ត្រក្វង់តុំ (Quantum) និងជីវវិទ្យា ដើម្បីចង្អុលបង្ហាញទិសដៅស្រាវជ្រាវជាយុទ្ធសាស្ត្រ។

ក្នុងឱកាសនោះ លោក Benoit Dubuis ប្រធានបណ្ឌិត្យសភាវិទ្យាសាស្ត្រវិស្វកម្មស្វីស បានថ្លែងថា គ្មានប្រទេសណាមួយអាចដោះស្រាយបញ្ហាសកលតែម្នាក់ឯងបានឡើយ ហើយប្រទេសចិនមានចំណុចខ្លាំងពិសេសលើទំហំ និងល្បឿននៃការអភិវឌ្ឍ។ បន្ថែមពីនោះ ប្រធានាធិបតីអាហ្វ្រិកខាងត្បូង លោក Cyril Ramaphosa និងរដ្ឋមន្ត្រីវិទ្យាសាស្ត្រ និងបច្ចេកវិទ្យាចិន លោក Yin Hejun ក៏បានផ្ញើសារលើកទឹកចិត្តឱ្យមានកិច្ចសហប្រតិបត្តិការបើកចំហកាន់តែទូលំទូលាយ។

គួររំលឹកថា វេទិកានវានុវត្តន៍ Pujiang ដែលត្រូវបានបង្កើតឡើងតាំងពីឆ្នាំ២០០៨ ដោយក្រសួងវិទ្យាសាស្ត្រ និងបច្ចេកវិទ្យាចិន រួមជាមួយរដ្ឋបាលក្រុងស៊ាងហៃ បានក្លាយជាផ្ទាំងទស្សនីយភាព និងជាកម្លាំងចលករដ៏សំខាន់ក្នុងការជំរុញកិច្ចសហប្រតិបត្តិការបច្ចេកវិទ្យាសកលលោក៕