អាម៉េរិក៖ ថៅកែក្រុមហ៊ុនសម្ព័ន្ធធំរបស់ META លោក ម៉ាក ហ្សាក់ឃើបឺក ដែលមានក្រុមហ៊ុនតូចៗពីក្រោមដូចជា Facebook,Instagram, Whataspp,Threads និងបណ្តាញសង្គមធំៗជាច្រើនទៀតបានសម្រេចផ្តល់សំណងទៅតុលាការសហព័ន្ធក្នុងទំហំរហូតដល់ ១៨ ពាន់លានដុល្លារអាម៉េរិក ដើម្បីដោះស្រាយបណ្តឹងជាច្រើនដែលបានប្តឹងដោយរដ្ឋនានាទូទាំងសហរដ្ឋអាម៉េរិកថា ក្រុមហ៊ុនបានរចនាកម្មវិធីទាំងនោះដើម្បីធ្វើឱ្យកុមារញៀន បំភាន់អ្នកប្រើប្រាស់អំពីសុវត្ថិភាពរបស់ពួកគេ និងប្រមូលទិន្នន័យផ្ទាល់ខ្លួនរបស់កុមារដែលបានប្រើប្រាស់បណ្តាញសង្គមបស់ខ្លួនមិនត្រឹមត្រូវ។
បើតាមទីភ្នាក់ងារព័ត៌មាន រ៉យទ័រ ការដោះស្រាយដែលបានប្រកាសកាលពីថ្ងៃពុធ បានបញ្ចប់ការកាត់ក្តីសហព័ន្ធ លើការចោទប្រកាន់ថា ផលិតផលរបស់ក្រុមហ៊ុន Meta បានធ្វើឱ្យប៉ះពាល់ដល់កុមារ និងក្រុមហ៊ុនបានបំភាន់សាធារណជនអំពីសុវត្ថិភាពរបស់ពួកគេ។ រដ្ឋចំនួនបួនគឺ រដ្ឋកាលីហ្វ័រញ៉ា រដ្ឋខូឡូរ៉ាដូ រដ្ឋ Kentucky និងរដ្ឋញូវជើស៊ី ត្រូវបានគេរំពឹងថានឹងស្វែងរកការពិន័យរដ្ឋប្បវេណីជិត ២០០ ពាន់លានដុល្លារបន្ថែមទៀត ខណៈពេលដែលក្រុមហ៊ុន Meta មិនឆ្លងកាត់ការផ្លាស់ប្តូរជាមូលដ្ឋានលើ កិច្ចព្រមព្រៀង ដើម្បីកំណត់ពីរបៀបដែលអាចប្រើប្រាស់បានចំពោះកុមារ ។
លោក Phil Weiser អគ្គរដ្ឋអាជ្ញារដ្ឋ Colorado បានប្រកាសនៅក្នុងសេចក្តីថ្លែងការណ៍មួយថា ចំណុចសំខាន់នៃសំណុំរឿងនេះគឺដើម្បីការពារកូនៗរបស់យើង ហើយពេលនេះយើងកំពុងទទួលបាន ដំណោះស្រាយនេះគឺមានអត្ថន័យខ្លាំងណាស់។
គួររម្លឹកថាតុលាការសហព័ន្ធសហរដ្ឋអាម៉េរិកបានប្តឹង និងចោទប្រកាន់ក្រុមហ៊ុន META ដែលមានសម្ព័ន្ធបណ្តាញសង្គមធំៗជាច្រើនរួមមាន Facebook, Instagram, Whatsapp ជាដើមថាបានបង្កើតបណ្តាញសង្គមទាំងនេះបង្កើនទៅជាការញៀនដល់អ្នកប្រើប្រាស់វ័យក្មេង។ តុលាការសហព័ន្ធអាម៉េរិកបានស្នើសុំឱ្យក្រុមហ៊ុន META ត្រូវរងពិន័យប្រាក់ប្រមាណ ២០០ ពាន់លានដុល្លារអាម៉េរិក ចំពោះការរចនា និងផលិតបណ្តាញសង្គមដែលបណ្តាលឱ្យញៀនដល់កុមារ។
មេធាវីរបស់ Meta គឺលោក Paul Schmidt បានទទួលស្គាល់ថាអ្នកប្រើប្រាស់មួយចំនួនមានបទពិសោធន៍អវិជ្ជមានលើកម្មវិធី ប៉ុន្តែលោកបានអះអាងថាក្រុមហ៊ុនបានព្យាយាមបង្កើតឧបករណ៍កម្មវិធីដើម្បីជួយពួកគេ។ មុនពេលការកាត់ក្តីចាប់ផ្តើម ក្រុមហ៊ុនបានបដិសេធការចោទប្រកាន់ទាំងនេះ ដោយទទូចថាខ្លួនបានធ្វើការជាមួយឪពុកម្តាយ អ្នកជំនាញ និងការអនុវត្តច្បាប់ ដើម្បីបញ្ចូលការការពារសម្រាប់កុមារដែលបានប្រើប្រាស់បណ្តាញសង្គមរបស់ខ្លួន៕
