ភ្នំពេញ៖ សាលាមធ្យមវិចិត្រសិល្បៈ ជ្រើសរើសសិស្សានុសិស្សចូលរៀនដោយឥតបង់ថ្លៃ សម្រាប់ឆ្នាំសិក្សា២០២៦-២០២៧ ដែលក្នុងនោះរួមមាន ជំនាញសាលាតូរ្យតន្ត្រី សាលាសិល្បៈសូនរូប សាលារបាំ សាលាល្ខោន ព្រមទាំងសាលាសៀក។បេក្ខជនទាំងអស់ត្រូវឆ្លងកាត់ការប្រឡងលើពីរផ្នែកចម្បង គឺវិញ្ញាសាចំណេះទូទៅ និងវិញ្ញាសាជំនាញបច្ចេកទេសទៅតាមឯកទេសនីមួយៗ។
យោងតាមសេចក្តីជូនដំណឹងនៃ សាលាមធ្យមវិចិត្រសិល្បៈ បានឱ្យដឹងថា សាលាមធ្យមវិចិត្រសិល្បៈ ជាគ្រឹះស្ថានសិក្សាចំណេះទូទៅ និងបច្ចេកទេសស្ថិតក្រោមឱវាទក្រសួងវប្បធម៌ និងវិចិត្រសិល្បៈ។ ការជ្រើសរើសសិស្សរៀនដោយឥតបង់ថ្លៃនេះបើកទូលាយសម្រាប់សិស្សដែលបានបញ្ចប់ការសិក្សាចាប់ពីថ្នាក់ទី៣ ថ្នាក់ទី៥ ឬថ្នាក់ទី៧ ពីសាលាខាងក្រៅ ទៅតាមលក្ខខណ្ឌនៃជំនាញ។
បេក្ខជនទាំងអស់ត្រូវឆ្លងកាត់ការប្រឡងលើពីរផ្នែកចម្បង គឺវិញ្ញាសាចំណេះទូទៅ (ភាសាខ្មែរ និងគណិតវិទ្យា តាមកម្មវិធីសិក្សារបស់ក្រសួងអប់រំ យុវជន និងកីឡា) និងវិញ្ញាសាជំនាញបច្ចេកទេសទៅតាមឯកទេសនីមួយៗ ដូចជាការត្រួតពិនិត្យសង្វាក់ភ្លេង ទេពកោសល្យសំឡេង ការគូររូប និងការពិនិត្យកាយសម្បទា។ សម្រាប់សំណុំឯកសារដែលត្រូវបំពេញរួមមាន ពាក្យសុំចុះឈ្មោះប្រឡង ជីវប្រវត្តិសង្ខេប សលាកបត្រឯកត្តជន កាតសិស្ស ឬលិខិតបញ្ជាក់ការសិក្សា សំបុត្រកំណើតចម្លង និងរូបថតថ្មីទំហំ ៤x៦ ចំនួន ៣សន្លឹក។
ការចែក និងទទួលពាក្យប្រឡងចាប់ផ្ដើមពីថ្ងៃជូនដំណឹងនេះរហូតដល់ថ្ងៃទី២៤ ខែកញ្ញា ឆ្នាំ២០២៦ ហើយការប្រឡងនឹងប្រព្រឹត្តទៅនៅថ្ងៃទី០២ ខែតុលា ឆ្នាំ២០២៦ នៅការិយាល័យសិក្សានៃសាលាមធ្យមវិចិត្រសិល្បៈ ដែលមានទីតាំងស្ថិតនៅផ្លូវរថក្រោះម៉ុងឫទ្ធី ភូមិឧកញ៉ាវាំង សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។ ព័ត៌មានលម្អិតបន្ថែម អាណាព្យាបាល និងសិស្សានុសិស្សអាចទាក់ទងតាមទូរស័ព្ទលេខ ០៨៩ ២៥៤ ៣៨៨ ឬ ០១២ ៤៣៥ ៤៦២១ និងអ៊ីមែល [email protected]៕
