សិស្សនិទ្ទេស A ទាំង ២០២២នាក់ នឹងទទួលបានឱកាសជួបសំណេះសំណាលជាមួយ សម្តេច ហ៊ុន ម៉ាណែត នៅថ្ងៃស្អែកនេះ

ភ្នំពេញ៖ សម្តេច ហ៊ុន ម៉ាណែត និងលោកជំទាវបណ្ឌិត នឹងជួបសំណេះសំណាល ជាមួយ សិស្សនិទ្ទេស A ទាំង ២០២២នាក់ នៅមជ្ឈមណ្ឌលសន្និបាត និងពិព័រណ៍អន្តរជាតិជ្រោយចង្វារ រាជធានីភ្នំពេញ នៅព្រឹកស្អែកនេះ គឺថ្ងៃពុធ ទី២៨ ខែតុលា ឆ្នាំ២០២៦។

កម្មវិធីសំណេះសំណាលនេះ ធ្វើឡើងសម្រាប់សិស្សឆ្នើមនិទ្ទេស A នៃការប្រឡងបាក់ឌុប សម័យប្រឡងថ្ងៃទី១០ ខែសីហា ឆ្នាំ២០២៦ និងការប្រឡងសញ្ញាបត្របច្ចេកទេស និងវិជ្ជាជីវៈកម្រិត៣ សម័យប្រឡងថ្ងៃទី២២ ខែកក្កដា ឆ្នាំ២០២៦។

គោលបំណងនៃកម្មវិធី គឺដើម្បីអបអរសាទរ និងលើកទឹកចិត្តដល់សិស្សានុសិស្សដែលបានខិតខំប្រឹងប្រែងរហូតទទួលបានលទ្ធផលល្អប្រសើរ។ លើសពីនេះ ក៏ជាការដាស់តឿននិងជំរុញឱ្យយុវជនបន្តការសិក្សារៀនសូត្រ ក៏ដូចជាអភិវឌ្ឍសមត្ថភាពផ្ទាល់ខ្លួនឱ្យកាន់តែខ្លាំងក្លា ដើម្បីចូលរួមចំណែកយ៉ាងសំខាន់ក្នុងការកសាងធនធានមនុស្ស និងអភិវឌ្ឍសង្គមជាតិឱ្យកាន់តែរីកចម្រើនទៅមុខ។

ក្រសួងអប់រំ បានអំពាវនាវឱ្យ មាតាបិតា អាណាព្យាបាលសិស្ស និងសិស្សានុសិស្សជ័យលាភីនិទ្ទេស A ទាំងអស់ត្រៀមខ្លួនចូលរួមក្នុងកម្មវិធីនេះតាមការគួរ៕