ថៅកែហ្វេសប៊ុក បញ្ជាទិញ«ប្រាសាទបុរាណ»អាយុជាង ២០០ឆ្នាំ តម្លៃប្រមាណ ២៣-៣៥ លានដុល្លារអាម៉េរិក

អាម៉េរិក៖ ថៅកែក្រុមហ៊ុន Facebook លោក Mark Zuckerberg បានបញ្ជាទិញប្រាសាទ Strancally Castle ទំហំ ៤៤០ ហិកតា នៅប្រទេសអៀរឡង់ យោងតាមរបាយការណ៍របស់ The Guardian និង The Irish Times នាយកប្រតិបត្តិក្រុមហ៊ុន Meta លោក Mark Zuckerberg និងភរិយារបស់លោក គឺលោកស្រី Priscilla Chan បានបញ្ជាទិញប្រាសាទនេះក្នុងតម្លៃចន្លោះពី ២៣-៣៥ លានដុល្លារអាម៉េរិក។ វិមានប្រាសាទប្រវត្តិសាស្ត្រដ៏ធំនេះត្រូវបានគេរំពឹងថានឹងបម្រើជាកន្លែងសម្រាប់គូស្វាមីភរិយា និងក្រុមគ្រួសាររបស់អ្នកទាំងពីរ នៅពេលដែលពួកគេទៅទស្សនាប្រទេសអៀរឡង់។

បើតាមអ្នកនាំពាក្យរបស់ក្រុមហ៊ុន Meta បានបញ្ជាក់ថា លោក Zuckerberg និងក្រុមគ្រួសាររបស់គាត់មានការរំភើបរីករាយក្នុងការចំណាយពេលនៅប្រទេសអៀរឡង់ ហើយការបញ្ជាទិញនេះក៏ដើម្បីថែរក្សាបេតិកភណ្ឌនៃអចលនទ្រព្យប្រវត្តិសាស្ត្រដ៏អស្ចារ្យមួយនេះ ដោយតម្លៃទិញដែលបានចរចាជាឯកជនមិនត្រូវបានបង្ហាញឱ្យដឹងនោះទេ ប៉ុន្តែរបាយការណ៍បានប៉ាន់ប្រមាណថាកិច្ចព្រមព្រៀងនេះមានតម្លៃចន្លោះពី ២០ លានអឺរ៉ូ ទៅ ៣០ លានអឺរ៉ូ រឺជាដុល្លារពី ២៣-៣៥ លានដុល្លារអាម៉េរិក។

គួររម្លឹកថាប្រាសាទ Strancally ត្រូវបានសាងសង់ក្នុងឆ្នាំ ១៨៣០ សម្រាប់សមាជិកសភាអភិរក្សនិយមលោក John Keily ហើយត្រូវបានរចនាឡើងដោយស្ថាបត្យករល្បីឈ្មោះ James និង George Richard Pain។ វិមានដ៏អស្ចារ្យនេះត្រូវបានគេស្គាល់ដោយសារមានទំហំធំ និងការចនាឡើងដោយអស្ចារ្យ ប្រាសាទនេះត្រូវបានទិញ និងជួសជុលឡើងវិញនៅដើមទសវត្សរ៍ឆ្នាំ ២០០០ ដោយលោក Michael Alen-Buckley សហស្ថាបនិកក្រុមហ៊ុនវិនិយោគ RAB Capital ដែលមានមូលដ្ឋាននៅទីក្រុងឡុងដ៍ និងភរិយារបស់គាត់គឺលោកស្រី Giancarla Buckley។ បន្ទាប់ពីប្រហែល ២៥ ឆ្នាំ អចលនទ្រព្យនេះបានផ្លាស់ប្តូរម្ចាស់ថ្មីម្តងទៀត ដោយគ្រួសារលោក Zuckerberg បានក្លាយជាម្ចាស់ថ្មី។ប្រាសាទ Strancally មានទីតាំងស្ថិតនៅក្នុងជ្រលងភ្នំ Blackwater ដ៏ស្រស់ស្អាត ដែលជាតំបន់ដ៏ល្បីល្បាញសម្រាប់ទេសភាព ទេសចរណ៍ និងបេតិកភណ្ឌស្ថាបត្យកម្ម៕