រដ្ឋាភិបាលវៀតណាម បញ្ជូនសេចក្តីព្រាងច្បាប់ ស្នើលុបទោសប្រហារជីវិតសម្រាប់បទល្មើសចំនួន ៦

វៀតណាម៖ រដ្ឋាភិបាលវៀតណាម បានដាក់សេចក្តីព្រាងច្បាប់ធ្វើវិសោធនកម្មក្រមព្រហ្មទណ្ឌ ទៅកាន់គណៈកម្មាធិការអចិន្ត្រៃយ៍នៃរដ្ឋសភា កាលពីថ្ងៃទី១៨ ខែសីហា ដោយស្នើលុបចោលទោសប្រហារជីវិតសម្រាប់បទល្មើសចំនួន ៦ និងរក្សាទុកត្រឹមតែ ៤ បទល្មើសប៉ុណ្ណោះ ព្រមទាំងបន្ថែមបទល្មើសថ្មីចំនួន ៩ ផ្សេងទៀត។យោងតាមអនុរដ្ឋមន្ត្រីក្រសួងសន្តិសុខសាធារណៈ លោក Le Van Tuyen បទល្មើសទាំង ៤ ដែលត្រូវរក្សាទោសប្រហារជីវិត រួមមាន៖ បទក្បត់ជាតិ បទឃាតកម្ម បទភេរវកម្ម និងបទផលិតគ្រឿងញៀនខុសច្បាប់។ រីឯបទល្មើសទាំង ៦ ដែលត្រូវស្នើលុបចោលទោសប្រហារជីវិត រួមមាន៖ បទបះបោរ បទរំលោភសេពសន្ថវៈលើអនីតិជនអាយុក្រោម ១៦ឆ្នាំ បទជួញដូរគ្រឿងញៀន បទឧក្រិដ្ឋកម្មប្រឆាំងមនុស្សជាតិ បទឧក្រិដ្ឋកម្មសង្គ្រាម និងបទភេរវកម្មប្រឆាំងរដ្ឋាភិបាល (ដោយបូកបញ្ចូលក្នុងបទភេរវកម្មទូទៅ)។

យោងតាមការចេញផ្សាយរបស់កាសែត Vietnam.VN ការកាត់បន្ថយទោសប្រហារជីវិតនេះ គឺដើម្បីអនុវត្តតាមគោលនយោបាយបក្សវៀតណាម និងស្របតាមនិន្នាការច្បាប់រីកចម្រើនអន្តរជាតិ។

ប្រធានគណៈកម្មាធិការច្បាប់ និងយុត្តិធម៌ លោក Phan Chí Hiếu បានលើកឡើងថា សមាជិកគណៈកម្មាធិការជាច្រើនបានស្នើឱ្យមានការពិចារណាយ៉ាងហ្មត់ចត់លើការលុបចោលទោសប្រហារជីវិតសម្រាប់បទល្មើសធ្ងន់ធ្ងរ ដូចជាការជួញដូរគ្រឿងញៀន និងការរំលោភសេពសន្ថវៈលើកុមារ ដើម្បីកុំឱ្យប៉ះពាល់ដល់ប្រសិទ្ធភាពនៃការទប់ស្កាត់ និងបង្ក្រាបបទល្មើស។

សេចក្តីព្រាងច្បាប់ថ្មីក៏បានស្នើបន្ថែមបទល្មើសថ្មីចំនួន ៩ ផ្តោតលើវិស័យសេដ្ឋកិច្ច សន្តិសុខសាយប័រ បច្ចេកវិទ្យាជាន់ខ្ពស់ បរិស្ថាន និងសន្តិសុខសាធារណៈ ព្រមទាំងពង្រីកវិសាលភាពនៃការលើកលែងការទទួលខុសត្រូវព្រហ្មទណ្ឌ សម្រាប់ការស្រាវជ្រាវ និងការសាកល្បងបច្ចេកវិទ្យាថ្មីៗ ដើម្បីធានានូវគោលនយោបាយច្បាប់ដែលមានលក្ខណៈមនុស្សធម៌ផងដែរ៕