ក្រុម Hacker កូរ៉េខាងជើង ប្រើបច្ចេកវិទ្យា AI ដើម្បីលួចព័ត៌មានសម្ងាត់សត្រូវ កាន់តែលឿន

ព្យុងយ៉ាង៖ ក្រុមហ៊ុនសន្តិសុខបច្ចេកវិទ្យាកូរ៉េខាងត្បូង Genians បានឱ្យដឹងថា ក្រុម Hacker កូរ៉េខាងជើង បានចាប់ផ្តើមយកបច្ចេកវិទ្យា AI មកប្រើប្រាស់ ដើម្បីជួយធ្វើឱ្យការវាយប្រហារតាមអ៊ីនធឺណិតកាន់តែលឿន ងាយស្រួលវិភាគទិន្នន័យដែលលួចបាន និងបង្កើតសារបោកប្រាស់កាន់តែដូចពិត។

យោងតាមការចេញផ្សាយរបស់ទីភ្នាក់ងារសារព័ត៌មានរ៉យទ័រ ក្រុមហ៊ុនដដែលនេះបានរកឃើញភស្តុតាងដែលបង្ហាញថា ក្រុម Kimsuky ដែលមានទំនាក់ទំនងជាមួយកូរ៉េខាងជើង បានដំឡើងឧបករណ៍សម្រាប់ប្រតិបត្តិការ និងគ្រប់គ្រងម៉ូឌែល AI ក្នុងស្រុក ដូចជា Ollama, GPT4All និង Msty រួមទាំងបច្ចេកវិទ្យាស្វែងរកឯកសារ RAG ដែលអនុញ្ញាតឱ្យពួកគេដំណើរការទិន្នន័យបានដោយមិនចាំបាច់ផ្ញើព័ត៌មានរសើបទៅកាន់សេវាកម្ម AI ខាងក្រៅឡើយ។

ក្រុមហ៊ុន Genians ក៏បានរកឃើញឧបករណ៍សរសេរកូដជំនួយដោយ AI ដូចជា Cursor កម្មវិធីបម្លែងសំឡេងទៅជាអត្ថបទ និងឯកសារនុយបោកប្រាស់ពាក់ព័ន្ធនឹងហិរញ្ញវត្ថុ និងរូបិយប័ណ្ណគ្រីបតូ ដែលបង្កើតឡើងដោយ AI ។

ការរកឃើញនេះបង្ហាញថា ក្រុម Kimsuky កំពុងពង្រីកសមត្ថភាពរបស់ខ្លួនលើសពីការប្រើប្រាស់ AI ត្រឹមតែបង្កើតសារបោកប្រាស់ ដោយឈានទៅរកការបញ្ចូល AI ទៅក្នុងការអភិវឌ្ឍកូដមេរោគ ការវិភាគទិន្នន័យ និងការវាយប្រហារតាមប្រព័ន្ធស្វ័យប្រវត្តិ ដើម្បីបម្រើឱ្យគោលដៅយុទ្ធសាស្ត្រ និងការប្រមូលព័ត៌មានសម្ងាត់របស់កូរ៉េខាងជើង៕