បេក្ខជន«បាក់ឌុប»ខេត្តព្រះសីហនុ ដែលនៅឆ្ងាយពីមណ្ឌលប្រឡង នឹងទទួលបានការ«ស្នាក់នៅ អាហារ និងការផ្ញើយានជំនិះ» ឥតគិតថ្លៃ

ព្រះសីហនុ៖ បេក្ខជនប្រឡងដែលស្ថិតនៅឆ្ងាយពីមណ្ឌលប្រឡង និងគណៈកម្មការប្រឡង នឹងទទួលបានការ ស្នាក់នៅ អាហារ និងការផ្ញើយានជំនិះ ឥតគិតថ្លៃ កំឡុងពេលប្រឡងបាក់ឌុប សម័យប្រឡង៖ ១០ សីហា ២០២៦ ខាងមុខនេះ។

លោក ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ បានឧបត្ថម្ភគាំទ្រក្រោមការចាត់ចែងរបស់មន្ទីរអប់រំ យុវជន និងកីឡាខេត្តព្រះសីហនុ និងរដ្ឋបាលខេត្ត ក្រុង ស្រុក ដល់បេក្ខជនប្រឡងដែលស្ថិតនៅឆ្ងាយពីមណ្ឌលប្រឡង និងគណៈកម្មការប្រឡង។

ការឧបត្ថម្ភរួមមាន៖ ផ្តល់ជូនកន្លែងស្នាក់នៅ ចំនួន ២ យប់ អាហារចំនួន ៦ ពេល និងការផ្ញើយានជំនិះ (គ្រប់មណ្ឌលប្រឡងទាំងអស់)។ មណ្ឌលប្រឡងរួមមាន៖ ១.វិទ្យាល័យស្ទឹងហាវ ២.វិទ្យាល័យហ៊ុនសែនកែវផុស ៣.វិទ្យាល័យហ៊ុនសែនព្រៃនប់ ៤.វិទ្យាល័យតេជោសែនបឹងតាព្រហ្ម ៥. វិទ្យាល័យទួលកែវ ៦.វិទ្យាល័យហ៊ុនសែនកំពង់សិលា ៧.វិទ្យាល័យហ៊ុនសែនស្មាច់ដែង ៨.វិទ្យាល័យព្រែកស្វាយក្រុងកោះរ៉ុង។

គួរបញ្ជាក់ថា នៅសល់ប្រមាណ៣ថ្ងៃទៀតប៉ុណ្ណោះ ការប្រឡងបាក់ឌុបនឹងឈានមកដល់ រួមជាមួយបេក្ខជនប្រឡងប្រមាណជាង ១៥ម៉ឺននាក់ ក្នុងនោះ ថ្នាក់វិទ្យាសាស្ត្រជិត៤ម៉ឺននាក់ និង បេក្ខជនថ្នាក់វិទ្យាសាស្ត្រសង្គមជាង ១១ម៉ឺននាក់៕