រដ្ឋចំនួន ២៥ របស់សហរដ្ឋអាម៉េរិកប្តឹងរដ្ឋបាលលោក ត្រាំ ពីបទដំឡើងពន្ធគយសកលខុសច្បាប់

អាម៉េរិក៖សម្ព័ន្ធភាពនៃរដ្ឋចំនួន ២៥ របស់សហរដ្ឋអាម៉េរិក និងរដ្ឋសហព័ន្ធបានដាក់ពាក្យបណ្តឹងមួយកាលពីថ្ងៃចន្ទ នៅតុលាការពាណិជ្ជកម្មអន្តរជាតិសហរដ្ឋអាម៉េរិក ដើម្បីរារាំងការប៉ុនប៉ងចុងក្រោយរបស់រដ្ឋបាលលោក ត្រាំ ក្នុងការដាក់ពន្ធសកលម្តងទៀតចន្លោះពី ១០% ទៅ ១២.៥%។ បណ្តឹងនេះចោទប្រកាន់ថា ការិយាល័យតំណាងពាណិជ្ជកម្មសហរដ្ឋអាម៉េរិក (USTR) បានប្រើប្រាស់ការស៊ើបអង្កេតដោយប្រើប្រាស់លេសលើកម្លាំងពលកម្មបង្ខំសកលផ្នែកច្បាប់ ដើម្បីកំណត់របាំងពាណិជ្ជកម្មឡើងវិញ ដែលពីមុនត្រូវបានតុលាការសហព័ន្ធធ្លាប់បានទាន់ចោល។ ដើមបណ្តឹងបានបញ្ជាក់នៅក្នុងឯកសារតុលាការថាការប៉ុនប៉ងលើកទីបីរបស់រដ្ឋបាលលោកត្រាំក្នុងការដាក់ពន្ធគយទូទាំងពិភពលោក ឥឡូវនេះតាមរយៈមាត្រា ៣០១ នៃច្បាប់ពាណិជ្ជកម្មគឺខុសច្បាប់ដូចគ្នា ហើយពាក្យបណ្តឹងផ្លូវច្បាប់ពិពណ៌នាអំពីសកម្មភាពរបស់រដ្ឋបាលត្រាំថាធ្វើតាមអំពើចិត្ត និងផ្ទុយនឹងច្បាប់ក្នុងការដាក់ពន្ធគយ។

បើតាមទីភ្នាក់ងារព័ត៌មានអាណាដូលូ (Anadolu Agency) ដើមបណ្តឹងអះអាងថា USTR (ការិយាល័យតំណាងពាណិជ្ជកម្មសហរដ្ឋអាមេរិក) បានធ្វើការស៊ើបអង្កេតប្រញាប់ប្រញាល់ទៅលើសេដ្ឋកិច្ចប្រទេសពាក់ព័ន្ធចំនួន ៦០ ក្នុងរយៈពេលត្រឹមតែពីរខែកន្លះប៉ុណ្ណោះ ដែលជាដំណើរការមួយដែលជាធម្មតាត្រូវការពេលជាងមួយឆ្នាំ។ រដ្ឋទាំងនោះអះអាងថា រដ្ឋបាលបានកំណត់ជាមុននូវលទ្ធផល ដោយកត់សម្គាល់ថា ពន្ធអនុវត្តដូចគ្នាចំពោះវត្ថុធាតុដើម និងទំនិញសម្រេចដោយមិនគិតពីភាពរីករាលដាលនៃកម្លាំងពលកម្មបង្ខំនៅក្នុងទីផ្សារជាក់លាក់។

អគ្គរដ្ឋអាជ្ញានៃទីក្រុងញូវយ៉ក លោកស្រី Letitia James បាននិយាយនៅក្នុងសេចក្តីថ្លែងការណ៍មួយថាមិនថារដ្ឋបាលលោកត្រាំ ព្យាយាមបង្ហាញអំពីភាពត្រឹមត្រូវរបស់ខ្លួនយ៉ាងណានោះទេ ច្បាប់ និងរដ្ឋធម្មនុញ្ញរបស់អាម៉េរិកគឺច្បាស់ណាស់ថា ប្រធានាធិបតីមិនមានអំណាចក្នុងការដាក់ពន្ធគយយ៉ាងទូលំទូលាយលើប្រទេសណាតាមអំពើចិត្តរបស់ខ្លួនឡើយ។

ជាការឆ្លើយតបអ្នកនាំពាក្យសេតវិមានលោក Kush Desai បានអះអាងនៅក្នុងសេចក្តីថ្លែងការណ៍មួយថាសហរដ្ឋអាម៉េរិកកំពុងប្រើប្រាស់អំណាចស្របច្បាប់របស់ខ្លួនដើម្បីលុបបំបាត់សកម្មភាព គោលនយោបាយ និងការអនុវត្តមិនសមហេតុផលដែលជាបន្ទុកដល់ពាណិជ្ជកម្មអាម៉េរិក។លោកថាការបរាជ័យរបស់បរទេសក្នុងការអនុវត្តស្តង់ដារការងារធ្វើឱ្យប៉ះពាល់ដល់កម្មករអាម៉េរិកដោយផ្ទាល់ ហើយអាម៉េរិកត្រូវតែដោះស្រាយ។ លោក Desai បញ្ជាក់ទៀតថាពន្ធមាត្រា ៣០១ បានដំណើរការជា ឧបករណ៍ប្រើប្រាស់បានយូរស្របច្បាប់ចាប់តាំងពីអាណត្តិដំបូងរបស់ប្រធានាធិបតីអាម៉េរិកលោក ដូណាល់ត្រាំ ហើយនៅតែជាឧបករណ៍សម្រាប់គោលនយោបាយពាណិជ្ជកម្ម។

គួររម្លឹកថារដ្ឋដែលចូលរួមក្នុងការប្រឹងរដ្ឋបាលលោកត្រាំនេះរួមមាន Oregon, Arizona, California, Colorado, Connecticut, Delaware, Hawaii, Illinois, Kentucky, Maine, Maryland, Massachusetts, Michigan, Minnesota, Nevada, New Jersey, New Mexico, New York, North Carolina, Pennsylvania, Rhode Island, Vermont, Virginia, Washington និង Wisconsin ៕