១០ នាក់ បានស្លាប់ និង ២៣ នាក់ រងរបួស ពី «គ្រោះជំនន់ទឹកភ្លៀងខ្លាំង» នៅខេត្តមួយនៅចិន

ចិន៖មនុស្សយ៉ាងហោច ១០ នាក់ បានស្លាប់ និង ២៣ នាក់ផ្សេងទៀតរងរបួស ក្នុងគ្រោះ«ជំនន់ទឹកភ្លៀង»នៅតំបន់ទេសចរណ៍ និងជ្រលងភ្នំ Shuangshimen ក្នុងទីក្រុង Huichuan ស្រុក Weiyuan នៃទីក្រុង Dingxi ភាគពាយព្យខេត្ត Gansu ប្រទេសចិន។

ជំនន់ទឹកភ្លៀងនេះ បានវាយប្រហារជ្រលងភ្នំ Shuangshimen កាលពីវេលាម៉ោងប្រហែល ១៤:០០ កាលពីរសៀលថ្ងៃអាទិត្យម្សិលមិញ ដោយសារភ្លៀងធ្លាក់ខ្លាំងរយៈពេលខ្លីនៅតំបន់ខាងលើ ដែលបាននាំយកល្បាប់ដី និងថ្មធ្លាក់ចុះមកក្រោមយ៉ាងគំហុក និង ធ្វើឱ្យភ្ញៀវទេសចរដែលកំពុងបោះតង់នៅទីនោះជាប់គាំងក្នុងទឹកជំនន់។

អាជ្ញាធរមូលដ្ឋានចិន បានចល័តកម្លាំងសង្គ្រោះ ៣០៥ នាក់ មកពីស្ថាប័នគ្រប់គ្រងគ្រោះអាសន្ន ពន្លត់អគ្គិភ័យ សុខាភិបាល និងទេសចរណ៍-វប្បធម៌ ទៅកាន់ទីតាំងកើតហេតុ ដើម្បីបើកកិច្ចប្រតិបត្តិការសង្គ្រោះបន្ទាន់ និង ការងារជម្លៀសជនរងគ្រោះ ដោយមានការប្រើប្រាស់ដ្រូនចំនួន ៣ គ្រឿងជួយសម្រួលរុករក រហូតអាចជម្លៀសអ្នកជាប់គាំងចំនួន ២៤៧ នាក់ដោយសុវត្ថិភាព ទោះបីជួបការរំខានដោយសារភ្លៀងធ្លាក់ជាបន្តបន្ទាប់ ។

អាជ្ញាធរចិន បញ្ជូនក្រុមការងារចុះទៅផ្ទាល់នៅកន្លែងកើតហេតុ និង បានដាក់ឱ្យដំណើរការកម្រិតឆ្លើយតបបន្ទាន់។ ចំណែកនាយកដ្ឋានឧតុនិយមខេត្ត Gansu បានដំឡើងកម្រិតឆ្លើយតបបន្ទាន់ ចំពោះភ្លៀងធ្លាក់ខ្លាំងហើយបន្តតាមដានស្ថានភាពជាប្រចាំ៕