«ទិវាអន្តរជាតិសម្រាប់យុវជន » លើកទី២៧ នឹងប្រព្រឹត្តទៅក្រោមប្រធានបទ «បរិបទខុសគ្នា ក្តីប្រាថ្នារួមគ្នា» នៅថ្ងៃទី ២៩–៣០ ខែកក្កដា

ភ្នំពេញ៖​ ក្រសួងអប់រំ នឹងរៀបចំ«ទិវាអន្តរជាតិសម្រាប់យុវជន » លើកទី២៧ ក្រោមប្រធានបទ «បរិបទខុសគ្នា ក្តីប្រាថ្នារួមគ្នា» និងការប្រកួត «វគ្គផ្តាច់ព្រ័ត្រ» នៃកម្មវិធីជជែកដេញដោលយុវជនថ្នាក់ជាតិ២០២៦ នៅថ្ងៃទី ២៩–៣០ ខែកក្កដា ២០២៦ នៅ វិទ្យាស្ថានបច្ចេកវិទ្យាកម្ពុជា ចាប់ពីម៉ោង ៧:៣០ នាទីព្រឹកតទៅ។

យោងតាមគេហទំព័រក្រសួងអប់រំ បានឱ្យដឹងថា កម្មវិធី «ទិវាអន្តរជាតិសម្រាប់យុវជន » លើកទី២៧ មានរយៈពេលពីរថ្ងៃ ដែលថ្ងៃទី១ មានរៀបចំវេទិកាពិភាក្សាចំនួនពីរ ទី១៖ ស្តីពី «ថាមពលបៃតង៖ ការជំរុញអនាគតប្រកបដោយចីរភាពរបស់កម្ពុជា» និងវេទិកាពិភាក្សា ទី២ ស្តីពី «អ្នកបង្កើតមាតិកា៖ ការជំរុញការផ្លាស់ប្តូរជាវិជ្ជមានក្នុងសង្គម»។ បន្ថែមពីនេះ ក៏មានការប្រកួតគម្រោងផែនការសកម្មភាពរបស់ក្រុមប្រឹក្សាយុវជនកម្ពុជា។ នៅថ្ងៃកម្មវិធីថ្ងៃទី៣០ ខែកក្កដា ឆ្នាំ២០២៦ មានរៀបចំការប្រកួត «វគ្គផ្តាច់ព្រ័ត្រ» កម្មវិធីជជែកដេញដោលយុវជនថ្នាក់ជាតិ ឆ្នាំ២០២៦ និងបាឋកថាគន្លឹះ ដោយ ឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ។

បើតាមក្រសួងអប់រំ កិច្ចពិភាក្សាយុវជន នៅក្នុងឆ្នាំ២០២៦នេះ ប្រធានបទទី១ ៖ «ថាមពលបៃតង៖ ការជំរុញអនាគតប្រកបដោយចីរភាពរបស់កម្ពុជា» មានវាគ្មិនកិត្តិយស៖ កញ្ញា ជិន សូនីតា លោក វន់ ឧត្តម (វីលៀម) លោក សា សុខគ្រី លោក យ៉ាន កែវសុភគ្គ សម្របសម្រួលដោយ កញ្ញា ទឹង ផានាថ។ ចំណែកឯប្រធានបទទី២ ៖ «អ្នកបង្កើតមាតិកា ៖ ការជំរុញការផ្លាស់ប្ដូរជាវិជ្ជមានក្នុងសង្គម» វាគ្មិនកិត្តិយស លោកវេជ្ជបណ្ឌិត និត ប៊ុតតុងយី លោក ឈាង ដាវុធ លោក អ៊ុង ប៉េងអាន លោកស្រី ជា ស្រីនា ដែលសម្របសម្រួលដោយ កញ្ញា ធន់ រិទ្ធីសុចេន។

គួរ​បញ្ជាក់ថា កម្មវិធីជជែកដេញដោលយុវជនថ្នាក់ជាតិ ឆ្នាំ២០២៦ បេក្ខជនឆ្នើមពីរក្រុម នឹងចូលរួមប្រកួតក្នុងវគ្គផ្ដាច់ព្រ័ត្រ ទៅលើប្រធានបទ៖ «មានតែចំណេះដឹងមិនគ្រប់គ្រាន់ទេ យុវជនសតវត្សទី២១ ត្រូវប្រើប្រាស់ចំណេះដឹង ដើម្បីកសាងកម្ពុជាឆ្ពោះទៅរកវិបុលភាព» ដែលមានក្រុមស្រប៖ វិទ្យាល័យដំដែក (ខេត្តសៀមរាប) និងក្រុមបដិសេធ៖ សាលាប៊ែលធីអន្តរជាតិ (រាជធានីភ្នំពេញ)៕