ត្រាំព្រមានការបិទរដ្ឋាភិបាលអាម៉េរិកអាចនឹងកើតមាននៅក្នុងខែកញ្ញា

អាម៉េរិក៖ ប្រធានាធិបតីសហរដ្ឋអាម៉េរិក លោក ដូណាល់ ត្រាំ កាលពីថ្ងៃពុធ បានព្រមានថា រដ្ឋាភិបាលសហព័ន្ធអាចនឹងប្រឈមមុខនឹងការបិទទ្វារនៅក្នុងខែកញ្ញា ដោយសារតែការខ្វែងគំនិតគ្នារវាងគណបក្សនយោបាយលើការចំណាយរបស់សហព័ន្ធនៅតែបន្ត។ ថ្លែងនៅក្នុងរដ្ឋ Georgia លោក ត្រាំ បញ្ជាក់ថា រដ្ឋាភិបាលសហព័ន្ធអាចនឹងបិទទ្វារនៅក្នុងខែកញ្ញា ដោយសារតែគណបក្សសាធារណរដ្ឋ និងគណបក្សប្រជាធិបតេយ្យនៅតែមានការខ្វែងគំនិតគ្នាលើអាទិភាពនៃការចំណាយ។

ទីភ្នាក់ងារព័ត៌មាន CCTV បានរាយការណ៍ថា កាលពីថ្ងៃអង្គារសភាតំណាងរាស្ត្រសហរដ្ឋអាម៉េរិកដែលគ្រប់គ្រងដោយគណបក្សសាធារណរដ្ឋ បានអនុម័តច្បាប់ចំណាយរយៈពេលខ្លី ដែលនឹងផ្តល់មូលនិធិដល់ភ្នាក់ងាររដ្ឋាភិបាលសហព័ន្ធរហូតដល់ថ្ងៃទី ៤ ខែធ្នូ ដោយមានគោលបំណងការពារការបិទទ្វាររដ្ឋាភិបាលមុនការបោះឆ្នោតពាក់កណ្តាលអាណត្តិខែវិច្ឆិកា។ វិធានការផ្តល់មូលនិធិបណ្តោះអាសន្ន ដែលត្រូវបានគេស្គាល់ផងដែរថាជាដំណោះស្រាយបន្ត (CR) ឥឡូវនេះនឹងត្រូវបញ្ជូនទៅព្រឹទ្ធសភាដើម្បីពិចារណា។ ថ្នាក់ដឹកនាំគណបក្សសាធារណរដ្ឋនៅក្នុងព្រឹទ្ធសភាកំពុងចរចាជាមួយគណបក្សប្រជាធិបតេយ្យ ហើយក៏កំពុងថ្លឹងថ្លែងសំណើផ្តល់មូលនិធិរយៈពេលខ្លីដាច់ដោយឡែកមួយផងដែរ។

ប្រសិនបើសភាបរាជ័យក្នុងការអនុម័តច្បាប់ស្តីពីការបែងចែកថវិកាមិនទាន់ពេលវេលា មូលនិធិសម្រាប់ភ្នាក់ងារ និងកម្មវិធីសហព័ន្ធភាគច្រើននឹងផុតកំណត់នៅពាក់កណ្តាលអធ្រាត្រថ្ងៃទី ៣០ ខែកញ្ញា នោះអាចនឹងបង្កឱ្យមានការបិទទ្វាររដ្ឋាភិបាលម្តងទៀត។

គួររម្លឹកថាការបិទរដ្ឋាភិបាលអាម៉េរិក រឺ ប្រែជាភាសាអង់គ្លេសហៅថា US Government shuts down នេះគឺជារឿងមួយដែលធ្វើឲ្យពិភពលោកទាំងមូលមានការភ្ញាក់ផ្អើលជាខ្លាំង។ ដើមចមដំបូលឡើយនៃបិទនេះដោយសារតែគណបក្សធំៗទាំង២មាន បក្សប្រជាធិបតេយ្យ និងបក្សសាធារណៈរដ្ឋខ្វែងគំនិតគ្នាក្នុងការអនុម័តច្បាប់ថវិកាជាតិ នេះបានន័យថាស្ថាប័នរដ្ឋ សេវាសាធារណៈរដ្ឋរបស់អាម៉េរិកនៅទូទាំងសកលលោកត្រូវបិទទ្វារលែងដំណើរសឹងទាំងស្រុងរួមទាំងបណ្តាញស្ថានទូតរបស់អាម៉េរិកនាៗកាត់បន្ថយការផ្សព្វផ្សាយ និងផ្អាកសេវាកម្មមិនចាំបាច់មួយចំនួនរបស់ខ្លួនចេញ។

ការបិទរដ្ឋាភិបាលរបស់អាម៉េរិកនេះមិនមែនជាលើកទី ១ នោះទេ ដោយមានការបិទរដ្ឋាភិបាលចំនួន ១៥ ដងមកចាប់តាំងពីឆ្នាំ ១៩៨១ ក៏ប៉ុន្តែការបិទរដ្ឋាភិបាលយូរបំផុតនោះគឺកាលពីថ្ងៃទី ២១ ខែធ្នូ ឆ្នាំ ២០១៨ ក្រោមរដ្ឋបាលអាណត្តិទី ១ របស់ Trump រួមជាមួយនឹងសមាជិកព្រឹទ្ធសភា និងសភាភាគច្រើនមកពីសាធារណរដ្ឋ ដោយ វិបត្តិពេលនោះកើតឡើងដោយសារតែគោលនយោបាយរិតត្បិតថវិកាជាតិ របស់លោកដូណាល់ ត្រាំ ដែលចង់តែកាត់បន្ថយការចំណាយ ជាពិសេសនៅក្នុងវិស័យសង្គមកិច្ចជួយប្រជាពលរដ្ឋក្រីក្រ ហើយក្រោយមកក៏មានការខ្វែងគំនិតគ្នាជាមួយបក្សប្រជាធិបតេយ្យរហូតដល់បិទខ្ទប់ដល់ទៅជាង ៣៥ថ្ងៃ ដោយវិបត្តិ SHUTDOWN នេះប៉ះពាល់ជាខ្លាំងដល់លុយដុល្លារ និងទីផ្សារពិភពលោក។ ការទាស់គំនិតគ្នារវាងបក្សធំៗទាំងពីរគឺបក្សប្រជាធិបតេយ្យ និងបក្សសាធារណៈរដ្ឋនោះគឺដោយសារតែគណបក្សសាធារណរដ្ឋដែលគ្រប់គ្រងសភានិងសេតវិមានក្រោមការដឹកនាំរបស់លោក ដូណាល់ ត្រាំ ចង់ឲ្យមានការកាត់បន្ថយថវិការជាតិលើកម្មវិធីសង្គម ខណៈដែលគណបក្សប្រជាធិបតេយ្យទាមទារការការពារសម្រាប់ការថែទាំសុខភាព និងសិទ្ធិផ្សេងៗទៀតដែលធ្លាប់មាន និងអនុម័តដោយប្រធានាធិបតីជំនាន់មុន។ កត្តាមិនចុះសម្រុងរវាងបក្សធំៗទាំងពីរនេះហើយទើបជំរុញឲ្យរដ្ឋបាលអាម៉េរិកបិទទ្វាមិនបញ្ចេញថវិការជាតិផ្សេងៗដល់មន្រ្តីបម្រើការក្នុងរដ្ឋ៕